குண்டாகாதீங்க! அப்புறம் நினைச்சாலும் ஒல்லியாக முடியாது!!

முரளிராஜா · முரளிராஜா Tue May 15, 2012 3:16 pm

ஒல்லியாக இருப்பவர்கள் ஆசைப்பட்டு குண்டாகிவிட்டால் அவர்களால் எந்த காரணத்தைக் கொண்டும் ஒல்லியாக முடியாது என்று ஆய்வாளர்கள் அதிர்ச்சி தகவலை தெரிவித்துள்ளனர்.

ஆணோ, பெண்ணோ முன்பெல்லாம் காடு கழனி என்று கிராமங்களில் வேலை பார்த்தனர். ஆனால் இன்றைக்கு பெரும்பாலானவர்கள் உடல் உழைப்பு குறைந்த வேலையைத்தான் பார்க்கும் சூழல் உருவாகியுள்ளது.

இதனால் இடுப்பு, பின்பகுதி என பெரும்பாலான பகுதிகள் பெருத்து குண்டாகிவிடுகின்றனர். உடல் பருமன் பிரச்சினை என்பது இன்றைக்கு அனைவரையும் பாதிக்கின்ற ஒன்றாகிவிட்டது.

முன்பெல்லாம் 40 வயதுகளில்தான் ஆண் மற்றும் பெண்களுக்கு உடல் பருமன், தொப்பை போன்ற பிரச்னைகள் தலை தூக்கின. ஆனால் இன்றைக்கு 25 வயதிற்கு மேற்பட்டவர்கள் கூட உடல்பருமனால் பாதிக்கப்பட்டுள்ளனர்.

உடல் பருமன் அடைந்தவர்கள், ஒருகட்டத்திற்கு பின்னர்தான் சுதாரித்துக்கொண்டு உடற்பயிற்சி, டயட் என்று பல்வேறு முயற்சிகளை மேற்கொள்கிறார்கள். ஆனால் இவ்வாறு உடற்பயிற்சி மற்றும் டயட் போன்றவற்றினால் உடல் எடை குறைந்து ஒல்லியானாலும், ஏறக்குறைய ஓராண்டுக்குள் உடல் மீண்டும் பருமன் ஆகிவிடுவதாக சமீபத்திய ஆய்வு ஒன்று கூறுகிறது. சுமார் 25,000 பேர்களை கொண்டு நடத்தப்பட்ட ஆய்விலேயே இது தெரியவந்துள்ளது.

1946 ஆம் ஆண்டில் பிறந்த 5,362 ஆண் மற்றும் பெண்களையும், 1958 ஆம் ஆண்டில் பிறந்த 20,000 பேர்களையும் இந்த ஆய்வுக்கு உட்படுத்தினர் விஞ்ஞானிகள். ஆய்வுக்கு உட்படுத்தப்பட்டவர்களின் உடல் எடை,ரத்த அழுத்தம் மற்றும் அவர்களது வாழ்க்கை நடைமுறை ஆகியவை கணக்கில் எடுத்துக்கொள்ளப்பட்டது.

ஆய்வின் முடிவில் 1980 ஆம் ஆண்டுகளில் மேற்கூறிய இரு பிரிவினருமே உடல் பருமன் அடைந்த பின்னர் உடற்பயிற்சி மற்றும் டயட்டினால் ஒல்லியாகி,பிறகு மீண்டும் படிப்படியாக உடல் எடை அதிகரித்தது தெரியவந்தது.

அதாவது ஒருவர் ஒருமுறை குண்டாகிவிட்டால், மீண்டும் ஒருபோதும் ஒல்லியாக முடியாது. இடையில் ஒல்லியானாலும் உடல் மீண்டும் பழைய பருமன் நிலைக்கே சென்றுவிடும்.

அதற்காக ஏற்கனவே உடல் பருமனாகிவிட்டவர்கள் டயட் இருப்பது, உடற் பயிற்சி செய்வது போன்றவற்றை கைவிட்டுவிட வேண்டாம்.குறைவாக மற்றும் கலோரி குறைந்த உணவுகளை உண்பது மற்றும் உடற் பயிற்சி போன்றவை உடல் மேலும் குண்டாகாமலும், உயர் ரத்த அழுத்தம் ஏற்படாலும் தடுக்கும் என்று கூறும் ஆய்வாளர்கள், இப்பிரச்னைக்கு உள்ள ஒரே தீர்வு,முன்கூட்டியே உடல் பருமனாகாமல் பார்த்துக்கொள்வதுதான் என்கிறார்கள் ஆய்வாளர்கள்.

ஒல்லியாக இருப்பவர்களே குண்டாக வேண்டும் என்று நினைக்கும் முன்பு ஒருமுறை யோசித்துக்கொள்வது நல்லது.
நன்றி போல்ட் ஸ்கை