பத்மஸ்ரீ விருதுக்கு விவசாயியின் பெயர் பரிந்துரை

**இளமாறன்** · **இளமாறன்** Fri Oct 07, 2011 9:44 pm

பத்மஸ்ரீ விருதுக்கு விவசாயியின் பெயர் பரிந்துரை

First Published : 07 Oct 2011 02:20:53 AM IST

புதுச்சேரி, அக். 6: புதுச்சேரி கூடப்பாக்கத்தைச் சேர்ந்த விவசாயி வெங்கடபதி ரெட்டியாரின் பெயரை பத்மஸ்ரீ விருதுக்கு புதுச்சேரி அரசு பரிந்துரை செய்துள்ளது.

புதுச்சேரி துணைநிலை ஆளுநர் இக்பால் சிங் தலைமையில், முதல்வர் ரங்கசாமி உள்ளிட்ட அமைச்சர்கள்

கலந்துகொண்டு நடந்த உயர்நிலைக்குழு, இவருடைய சேவையையும், பங்களிப்பையும் பாராட்டி மத்திய அரசுக்குப் பரிந்துரை செய்துள்ளது.

வெங்கடபதி ரெட்டியார் விவசாயக் குடும்பத்தைச் சேர்ந்தவர். பள்ளிப் படிப்பைக் கூட முடிக்காதவர். ஆனால் ஏன்? எதற்கு? என்ற கேள்விகளைக் கேட்டுக் கொண்டே இருப்பார். இதுதான் விவசாயத்தில் அவரை ஆராய்ச்சி செய்யத் தூண்டியது. கனகாம்பரம் பூ செடிகளில் பல்வேறு ரகங்களை உருவாக்கி சாதனை படைத்தவர்.

இதில் விவசாயிகள் வர்த்தக ரீதியாக பணம் சம்பாதிக்கும் வகையில் புதிய ரகங்களை உருவாக்கிக் கொடுத்தார். இப்போது வறண்ட நிலம் உள்பட எல்லா நிலங்களுக்கும் ஏற்ற வகையிலான சவுக்கு ரகங்களை உருவாக்கிக் கொடுத்து வருகிறார். இவரது சவுக்கை நாற்றங்காலில் இருந்து வறட்சியால் அதிகம் பாதிக்கப்பட்ட ஆந்திரப் பகுதிக்கு நாற்றுகள் சென்று சாகுபடி செய்யப்பட்டுள்ளன. ஆந்திர அரசு அந்த மக்களுக்கு உதவி செய்ய இவரிடம் இருந்து நாற்றுகளை வாங்கிச் சென்றுள்ளது.

பல்வேறு கஷ்டங்களை அனுபவிக்கும் விவசாயிகள் சாகுபடியில் லாபம் ஈட்ட வேண்டும் என்பது இவருடைய ஆசை. அதை நிறைவேற்றும் வகையில் இவர் பல்வேறு புதிய ரகங்களை உருவாக்கிக் கொண்டே இருக்கிறார். இதற்காக பல்வேறு நவீன தொழில்நுட்பங்களையும் கற்றுக் கொண்டு அதைச் செயல்படுத்துகிறார்.

இவருடையச் சேவைக்காக முன்னாள் குடியரசுத் தலைவர் அப்துல் கலாம், இவரை தில்லிக்கு வரவழைத்து பாராட்டியுள்ளார். இவருடைய ஆராய்ச்சிகளின் வழிமுறைகளும், ஆராய்ச்சிகளின் முடிவுகளும் பல்வேறு பல்கலைக்கழகங்கள், ஆராய்ச்சி நிறுவனங்களால் ஏற்றுக் கொள்ளப்பட்டவை.

தினமணி