உள்ளாட்சி தேர்தல் கடைசி வெளியீடு -- 19 ஆயிரத்து, 646 பேர் போட்டியின்றி தேர்வு செய்யப்பட்டனர்.

தமிழக உள்ளாட்சித் தேர்தலை எதிர்கொள்ளப்போகும் இறுதி வேட்பாளர்கள் பட்டியலை, மாநில தேர்தல் கமிஷன் நேற்று வெளியிட்டது. 1 லட்சத்து, 12 ஆயிரத்து, 697 பதவிகளை கைப்பற்ற, 4 லட்சத்து, 11 ஆயிரத்து, 177 வேட்பாளர்கள் பலப்பரீட்சை நடத்தவுள்ளதால், கடும் போட்டி ஏற்பட்டுள்ளது. 19 ஆயிரத்து, 646 பேர், போட்டியின்றி வெற்றி பெற்றுள்ளனர்.

தமிழகத்தில், 1 லட்சத்து, 32 ஆயிரத்து, 467 உள்ளாட்சிப் பதவிகளுக்கான தேர்தல், வரும் 17 மற்றும் 19ம் தேதிகளில், இரண்டு கட்டமாக நடக்கிறது. இதில், ஊராட்சித் தலைவர் மற்றும் ஊராட்சி உறுப்பினர் பதவிக்கு மட்டும், அரசியல் சார்பற்றும், மற்ற அனைத்து பதவிகளுக்கும் கட்சி அடிப்படையிலும் தேர்தல் நடக்கிறது.
திருச்சி மாநகராட்சியை தவிர்த்து, மற்ற இடங்களில் உள்ள, 1 லட்சத்து, 32 ஆயிரத்து, 401 பதவிகளுக்கு போட்டியிட, 5 லட்சத்து, 27 ஆயிரத்து, 41 பேர் மனு தாக்கல் செய்திருந்தனர். திருச்சி மாநகராட்சிக்கான மனு தாக்கல் கடந்த 30ம் தேதி துவங்கி தொடர்ந்து நடந்து வருகிறது. மனுக்களை வாபஸ் பெறுவதற்கான கெடு, நேற்று முன்தினம் மாலையுடன் முடிந்தது. அ.தி.மு.க., - தி.மு.க., - தே.மு.தி.க., உள்ளிட்ட கட்சிகளில், "சீட்' கிடைக்காதவர்கள் பலர், அதிருப்தி வேட்பாளர்களாக மனு தாக்கல் செய்திருந்தனர்.

அ.தி.மு.க., பொதுச் செயலரான, முதல்வர் ஜெயலலிதாவின் அறிவிப்பை ஏற்று, அக்கட்சி அதிருப்தி வேட்பாளர்கள் பலர், மனுக்களை கடைசி நேரத்தில் வாபஸ் பெற்றனர். இதேபோல, மற்ற கட்சிகளின் அதிருப்தி வேட்பாளர்களும், பேரம் படிந்த நிலையில், பல சுயேச்சைகளும் மனுக்களை வாபஸ் பெற்றனர். இவ்வாறு, ஒன்பது மாநகராட்சிகளில், 94 மேயர், 2,579 கவுன்சிலர், 527 நகராட்சித் தலைவர், 4,351 கவுன்சிலர், 1,322 பேரூராட்சித் தலைவர், 5,323 கவுன்சிலர் பதவிகளுக்கான மனுக்கள் என, மொத்தம், 14 ஆயிரத்து, 196 மனுக்கள் வாபஸ் பெறப்பட்டன.

கிராமப்புற உள்ளாட்சிப் பகுதிகளில், 1,287 மாவட்ட கவுன்சிலர், 10 ஆயிரத்து, 745 ஒன்றிய கவுன்சிலர், 23 ஆயிரத்து, 237 ஊராட்சித் தலைவர், 37 ஆயிரத்து, 518 ஊராட்சி உறுப்பினர் பதவிகளுக்கான மனுக்கள் என, மொத்தம், 72 ஆயிரத்து, 787 மனுக்கள் வாபஸ் பெறப்பட்டன.

நகர்ப்புறம் மற்றும் கிராமப்புற உள்ளாட்சிப் பதவிகளுக்கும் சேர்த்து, மொத்தம், 86 ஆயிரத்து, 983 பேர் வேட்புமனுக்கள், கடைசி நாளில் வாபஸ் பெறப்பட்டன. மேலும், ஒன்றிய கவுன்சிலராக, 30 பேர், ஊராட்சித் தலைவராக, 341 பேர், ஊராட்சி உறுப்பினராக, 18 ஆயிரத்து, 977 பேர், நகராட்சி கவுன்சிலராக, 8 பேர், பேரூராட்சித் தலைவராக, இரண்டு பேர், பேரூராட்சி கவுன்சிலராக, 288 பேர் என, மொத்தம், 19 ஆயிரத்து, 646 பேர் போட்டியின்றி தேர்வு செய்யப்பட்டனர்.

தேர்தல் நடக்க இருக்கும், 1 லட்சத்து, 12 ஆயிரத்து, 697 பதவிகளுக்கான வேட்பாளர்கள் இறுதி பட்டியலை, மாநில தேர்தல் கமிஷன் நேற்று வெளியிட்டது. இப்பதவிகளை கைப்பற்ற, 4 லட்சத்து, 11 ஆயிரத்து, 177 வேட்பாளர்கள் களத்தில் உள்ளனர். வேட்பாளர் பட்டியலோடு, சுயேச்சைகளுக்கான சின்னங்களும் வெளியிடப்பட்டு விட்டன.
ஒரு லட்சத்து, 12 ஆயிரம் பதவிகளை கைப்பற்ற மும்மடங்கு வேட்பாளர்கள் பலப்பரீட்சை நடத்தவுள்ளதால், போட்டி கடுமையாக இருக்கும் என தெரிகிறது. தினமலர்

பலமான போட்டிதான். தனித்தனியா பலப்பரீட்சை செய்து பார்த்துக்குறாங்க. நடக்கட்டும்.

திமுக , அதிமுக இவற்றின் உண்மையான பலம் இந்த தேர்தலில் தெரிந்து விடும்