மஇகா இனி தேவையில்லை

மலேசியாஇன்று

- பிரான்சிஸ் டி.ரோசாரியோ

முத்துப்பழநியப்பன் கூறியதன் தொடர்பில் எழுதப்பட்டது

சாமிவேலு, முத்துப்பழநியப்பன் இருவரும் இந்திய சமூகம் இன்னமும் தங்களுக்கு ஆதரவாக இருப்பதாக நம்பிக்கொண்டு ஏதோ விளையாட்டுக் காட்டிக்கொண்டிருக்கிறார்கள்.

மஇகா என்பது வரலாறாகிவிட்டது. இது மலேசியர் அனைவரும் அறிந்த உண்மை. தங்களின் நலனுக்காக போராட, இந்திய காங்கிரஸ் கட்சியின் கிளையாக வேர்விட்டு முளைத்த இக்கட்சி, இந்திய மலேசியர்களுக்கு இனித் தேவையில்லை. ஏனென்றால் அவர்களுக்காக அது எதையும் இதுவரை செய்ததில்லை.

மலேசியாவில் இந்திய நிபுணர்கள் இருக்கிறார்கள். ஆனால் இவர்கள் எல்லாருமே மஇகா-வைவிட்டு பலகாத தூரம் விலகியே இருக்க விரும்புகிறார்கள்.

டெலிகோம், மெட்ரோட் பங்குகள் மீதான சர்ச்சையைப் பாருங்கள். இரத்தத்தை வியர்வையாக சிந்திப் பெற்ற இந்தியர்களின் பணத்தால் உருவான மைக்காவின் நிலயைப் பாருங்கள். இப்படிப்பட்ட பயங்கரமான திட்டங்களுடனும் இப்படிப்பட்டவர்களுடனும், இந்திய நிபுணர்களை விடுங்கள், நேர்மையான மலேசியர் எவரும் சம்பந்தம் வைத்துக்கொள்ள விரும்புவாரா?

முத்துப்பழநியப்பனும் சரி,மஇகாவில் உள்ள மற்றவர்களும் சரி, நாங்கள் வேறு மாதிரியானவர்கள் என்று சொன்னால் அதை இந்திய மலேசியர்கள் நம்பப் போவதில்லை. நேர்மையான அரசியல்வாதியாக இருந்தால், கட்சியிலிருந்து விலக்கப்பட்டாலும் சரி என்று தலைவருக்கு எதிராகக் குரல் கொடுத்திருக்க வேண்டும்.

இனவாரிக் கட்சிகளை மறப்பதென்று இந்திய மலேசியர்கள் முடிவு செய்துவிட்டார்கள். கடந்த தேர்தலில் அதைச் செயலிலும் காட்டிவிட்டனர். அப்படிச் செய்ததன்வழி, மஇகாவுக்கிருந்ததைக் காட்டிலும் அதிக எண்ணிக்கையில் இந்தியர்கள் இன்று நாடாளுமன்றத்திலும் சட்டமன்றங்களிலும் இடம்பெற்றுள்ளனர்.

இண்ட்ராபுக்கும் தொல்லைகளுக்கு ஆளான அதன் உறுப்பினர்களும் இழைக்கப்பட்ட அநீதிக்கு எதிராக மஇகா என்ன செய்தது? அவர்கள் ஏன் பயங்கரவாதிகள்போல் நடத்தப்படுகிறார்கள்?

சாமியாலும் மஇகா-வாலும் என்ன செய்ய முடிந்தது? அம்னோவுக்கு விண்ணப்பித்துக்
கொள்ளமட்டுமே முடிந்தது. கூட்டணியில் சமப் பங்காளிகள் என்று நம்பி ஏமாந்து கொண்டிருக்கிறது.

பாரிசான் நேசனலில் உறுப்புக் கட்சியாக இருப்பதே அவமானம்தான்.கேவியெஸ் நிலயைப் பாருங்கள். வெளியேறுவேன் என்று மிரட்டினார். போங்கள் என்றார் பிரதமர்.அதன்பின் கப்சிப். பாரிசான் பங்காளிக்கட்சிகள் கீழே தள்ளி மிதிக்கப்படுவதும் முரட்டுத்தனத்தால் அச்சுறுத்தப்படுவதும் வாடிக்கையான ஒன்றுதான்.