கொலு எப்படி வைக்க வேண்டும்

கொலு எப்படி வைக்க வேண்டும்
கொலு வைப்பவர்கள் புரட்டாசியில் வரும் அமாவாசை நாளில் கொலு வைத்து விட வேண்டும். கொலு என்றால் அழகு என்று பொருள். கொலு வைக்கும் முன்பு வீட்டை சுத்தமாக்கி, அழகிய கோலங்கள் போட வேண்டும். மேடை அமைத்து பொம்மைகளை வரிசைப்படுத்த வேண்டும்.
5,7,9 படிகள் அமைத்து கொலு வைக்கலாம். படிக்கட்டுகளில் வெள்ளை அல்லது மஞ்சள் துணியை விரிக்க வேண்டும்.
முதல் படியில் புல், செடி, கொடி ஆகிய தாவர பொம்மைகளை வைக்க வேண்டும். இயற்கையோடு ஒன்றிய வாழ்க்கையை இது குறிக்கிறது.
இரண்டாம் படியில் சங்கால் செய்த பொம்மைகளை வைக்கலாம். நத்தை பொம்மை வைப்பது நலம் பயக்கும். நத்தை போல மெதுவாக நிதானமாக சென்று உயர் இடத்தை பிடிக்க வேண்டும் என்று உறுதி கொள்வதே இதன் பொருள்.
மூன்றாம் படியில் எறும்பு, கரையான் புற்று பொம்மைகளை வைக்க வேண்டும். எறும்பை போல சுறுசுறுப்பு, எத்தனை முறை தகர்த்தாலும் திரும்பத் திரும்ப புற்றைக் கட்டுவது போன்ற திட மனப்பான்மை வேண்டி இந்த பொம்மைகளை அடுக்கிட வேண்டும்.
நண்டு, வண்டு பொம்மைகள் நான்காவது படியில் இடம் பெற வேண்டும். இவற்றின் குணம் ஆழமாக ஊடுருவி பார்ப்பது. எந்த விஷயத்தையும் ஆழமாக சிந்தித்து செயலாற்றுவதை இந்த பொம்மைகள் குறிக்கும்.
ஐந்தாம் படியில் மிருகங்கள், பறவைகள் பொம்மைகள் இருக்க வேண்டும். மிருக குணத்தை விட்டு விட வேண்டும். பறவை போல கூடி வாழ வேண்டும் என்பதே இதன் பொருள்.
ஆறாம் படியில் மனித பொம்மைகள் வைக்க வேண்டும். வாழ்க்கையில் மேற்கண்ட ஐந்து படிகளில் உள்ளது போன்ற குணங்களைக் கடைபிடித்தால் முழு மனிதன் என்ற அந்தஸ்தைப் பெறலாம்.
ஏழாம் படியில் முனிவர்கள், மகான்கள் பொம்மைகளை வைக்க வேண்டும். மனிதன் உயரிய பக்தி மார்க்கத்தை கடைபிடித்தால் மகான்கள் ஆகலாம் என்பதே இதன் பொருள்.
எட்டாம் படியில் தெய்வங்களுக்கு கீழ் ஸ்தானத்தில் இருக்கும் தேவர்கள், நாயன்மார்கள், ஆழ்வார்கள், நவக்கிரக பொம்மைகளை வைக்க வேண்டும். முனிவர், மகான் நிலையை அடையும் மனிதன் தெய்வ நிலைக்கு உயர்வதை இது காட்டுகிறது.
ஒன்பதாம் படியில் பிரம்மா, விஷ்ணு, சிவன் ஆகியோர் தங்கள் தேவியரான சரஸ்வதி, லட்சுமி, பார்வதியுடன் இருக்க வேண்டும். ஆதிபராசக்தி சிலையை நடுவில் பெரிய அளவில் வைக்க வேண்டும்.
உயிர்கள் தங்கள் நிலையை கொஞ்சம் கொஞ்சமாக உயர்த்தி, தெய்வமாக வேண்டும் என்ற தத்துவத்தை உணர்த்தவே கொலு என்ற ஒன்றே உருவானது. நம் வீட்டுக் குழந்தைகளிடம் கொலு வைப்பதன் தத்துவத்தை விளக்கினால் நம் தமிழ் பண்பாடு சிறப்படையும்.

பயனுள்ள பதிவு வைரா...நன்றி.