பொன்முடி வீடு, அலுவலகம் உள்பட 20 இடங்களில் சோதனை

முன்னாள் அமைச்சர் பொன்முடி மீது வருமானத்துக்கு அதிகமாக சொத்து குவித்ததாக லஞ்ச ஒழிப்பு போலீசார் வழக்குப்பதிவு செய்துள்ளனர். இதையொட்டி, நேற்று பொன்முடியின் வீடுகள், அலுவலகங்கள் உள்பட 20 இடங்களில் லஞ்ச ஒழிப்பு போலீசார் அதிரடி சோதனை நடத்தினார்கள்.

இதுதொடர்பாக நேற்று மாலை லஞ்ச ஒழிப்பு போலீசார் வெளியிட்டுள்ள ஒரு செய்திக்குறிப்பில் கூறியிருப்பதாவது:-

சொத்து குவிப்பு வழக்கு

தமிழக முன்னாள் உயர் கல்வி மற்றும் கனிமவளத்துறை அமைச்சர் க.பொன்முடி என்ற தெய்வசிகாமணி மீது வருமானத்துக்கு அதிகமாக சொத்து குவிப்பு சம்பந்தமாக விசாரணை மேற்கொள்ளப்பட்டது. அந்த விசாரணை அடிப்படையில் போதுமான ஆதாரங்கள் பெறப்பட்டது.

இதையொட்டி, விழுப்புரம் லஞ்ச ஒழிப்பு போலீசார் லஞ்ச ஒழிப்பு சட்டப்பிரிவுகளின்கீழ் முன்னாள் அமைச்சர் பொன்முடி மீது வருமானத்துக்கு அதிகமாக சொத்து குவித்ததாக (13.4.2006 முதல் 31.3.2010 வரையிலான காலகட்டத்தில்) வழக்குப்பதிவு செய்யப்பட்டது. இந்த வழக்கையொட்டி பொன்முடி மற்றும் அவருடைய சகோதரர்கள், உறவினர்களின் வீடுகள், அலுவலகங்களில் லஞ்ச ஒழிப்பு போலீசார் சோதனை மேற்கொண்டனர்.

20 இடங்களில் சோதனை

கீழ்க்கண்ட 20 இடங்களில் நேற்று காலை 7 மணி முதல் 20 தனிப்படை லஞ்ச ஒழிப்பு போலீசார் சோதனை மேற்கொண்டனர். சோதனை நடந்த இடங்கள் விவரம் வருமாறு:-

1. விழுப்புரம் கிழக்கு சண்முகபுரம் காலனி திருப்பனாழ்வார் தெருவில் இருக்கும் பொன்முடியின் நிரந்தர வீடு.

2. விழுப்புரம் நடேசன் நகரில் உள்ள பொன்முடியின் முதலாவது இளைய சகோதரர் நடனசிகாமணி வீடு.

3. விழுப்புரம் ஜவஹர்லால் நேரு ரோட்டில் இருக்கும் பொன்முடியின் 2-வது இளைய சகோதரர் டாக்டர் கே.தியாகராஜனின் வீடு.

4. விழுப்புரம் பழைய கோர்ட்டு சாலையில் இருக்கும் பொன்முடியின் நெருங்கிய நண்பர் மணிவண்ணனின் வீடு.

சென்னையில்

5. சென்னை சைதாப்பேட்டை ஸ்ரீநகர் காலனி வடக்கு அவென்யூவில் இருக்கும் பொன்முடியின் மனைவி விசாலாட்சியின் பெயரில் உள்ள வீடு.

6. சென்னை கே.கே.நகர் ஆர்.கே.சண்முகம் பொன்கில் அடுக்குமாடி குடியிருப்பில் இருக்கும் வீடு. இந்த வீட்டில் பொன்முடியின் 2-வது மகனின் மாமனார் டாக்டர் கே.பாலசுப்பிரமணியன் வசிக்கிறார்.

7. சென்னை கே.கே.நகர் ஆர்.கே.சண்முகம் சாலையில் இருக்கும் கே.எம். மருத்துவமனை. இந்த மருத்துவமனை பொன்முடியின் 2-வது மகனின் மாமனார் டாக்டர் கே.பாலசுப்பிரமணியனின் மருத்துவமனையாகும்.

8. சென்னை கே.கே.நகர் ஆர்.கே.சண்முகம் சாலையில் உள்ள கே.எம்.ஆஸ்பத்திரி. இந்த ஆஸ்பத்திரியும் டாக்டர் கே.பாலசுப்பிரமணியனின் ஆஸ்பத்திரிதான்.

9. சென்னை எழும்பூர் எத்திராஜ் சாலையில் உள்ள தொழில் அதிபர் நஜ்முதீன் என்பவரின் வீடு.

10. விழுப்புரம் ஜவஹர்லால் நேரு ரோட்டில் உள்ள மரகதம் ஆஸ்பத்திரி. இந்த ஆஸ்பத்திரி பொன்முடியின் 2-வது சகோதரர் டாக்டர் கே.தியாகராஜனின் ஆஸ்பத்திரியாகும்.

11. விழுப்புரம் அருகேயுள்ள கபியாம்புலியூரில் இருக்கும் `சிகா' அறக்கட்டளை அலுவலகம். இந்த அறக்கட்டளையில் பொன்முடியின் மாமியார் சரஸ்வதி உறுப்பினராக உள்ளார்.

12. கடலூர் திருப்பாப்புலியூர் சிதம்பரம் ரோட்டில் இருக்கும் விஷால் ஆட்டோ மொபைல் அலுவலகம். இந்த அலுவலகம் பொன்முடியின் மனைவி விசாலாட்சிக்கு சொந்தமானதாகும்.

புதுச்சேரியில் சோதனை

13. புதுச்சேரி குயவர்பாளையம் 2-வது மெயின் ரோட்டில் இருக்கும் பொன்முடியின் 3-வது இளைய சகோதரர் ராஜாசிகாமணியின் ஆஸ்பத்திரி.

14. சென்னை ராஜா அண்ணாமலைபுரம் கிரீன்வேஸ் ரோட்டில் இருக்கும் `எவர் ஸ்மைல் எண்டர்பிரைசஸ்' நிறுவனம். இந்த நிறுவனத்தில் பொன்முடியின் மனைவி விசாலாட்சி பங்குதாரராக உள்ளார்.

15. சென்னை ராஜாஅண்ணாமலைபுரம் கிரீன்வேஸ் ரோட்டில் ரமணியம் அடுக்குமாடி கட்டிடத்தில் உள்ள விஷால் ஏற்றுமதி நிறுவனம். இந்த நிறுவனம் விசாலாட்சியின் பெயரில் உள்ளது.

16. சென்னை ராஜா அண்ணாமலைபுரம் கிரீன்வேஸ் ரோட்டில் ரமணியம் அடுக்குமாடி கட்டிடத்தில் உள்ள `கயல்பொன்னி அன்கோ' என்ற நிறுவனம். இந்த நிறுவனம் பொன்முடியின் மூத்த மகன் டாக்டர் கவுதமனின் நிறுவனம் ஆகும்.

17. சென்னை ராஜா அண்ணாமலைபுரம் கிரீன்வேஸ் ரோட்டில் உள்ள ரமணியம் அடுக்குமாடி குடியிருப்பில் இருக்கும் சூர்யா கல்வி அறக்கட்டளை அலுவலகம். இது பொன்முடியின் மகனுக்கு சொந்தமானது.

18. சென்னை வேப்பேரி வள்ளியம்மாள் ரோட்டில் உள்ள பர்னாஸ் இன்டர்நேஷனல் என்ற நிறுவனம். (இது தமிழக முன்னாள் கவர்னர் சுர்ஜித் பர்னாலாவின் மகனுடைய நிறுவனம் என்று கூறப்படுகிறது).

19. சென்னை தியாகராயநகர் பாலாஜி அவென்யூ 1-வது தெருவில் உள்ள வீடு. இந்த வீடு பொன்முடியின் 2-வது மகன் டாக்டர் அசோக்கின் மாமனார் டாக்டர் கே.பாலசுப்பிரமணியனின் வீடாகும்.

20. விழுப்புரம் தாலுகா வளுதாரெட்டி கணேசநகரில் இருக்கும் வீடு. இந்த வீடு பொன்முடியின் நண்பர் திரிசங்கு என்பவருக்கு சொந்தமானது.

முக்கிய ஆவணங்கள்

மேற்கண்ட 20 இடங்களில் நடந்த சோதனையில் முக்கிய ஆவணங்கள் சிக்கியதாக கூறப்படுகிறது. சென்னையில் நடந்த சோதனைக்கு துணை போலீஸ் சூப்பிரண்டுகள் பொன்னுசாமி, நடராஜன், சுதாகர், திருநாவுக்கரசு, வல்சராஜன், அலிபாஷா, சரஸ்வதி மற்றும் இன்ஸ்பெக்டர்கள் உச்சப்பட்டி பரமசாமி, அசோகன் உள்பட 50-க்கும் மேற்பட்ட அதிகாரிகள் பங்கேற்றனர். சென்னை சைதாப்பேட்டை பகுதியில் 3 மாடியில் புதிதாக பிரமாண்ட கட்டிடம் ஒன்றையும் பொன்முடி கட்டி வருவதாக சோதனையில் கண்டறியப்பட்டுள்ளதாகவும், அது தொடர்பான ஆவணங்கள் சிக்கியுள்ளதாகவும் லஞ்ச ஒழிப்பு போலீசார் தெரிவித்தனர்.

தினதந்தி