ஸ்பெக்ட்ரம் விவகாரம்: ஆ.ராசா, கனிமொழி மீது சி.பி.ஐ. புதிய குற்றச்சாட்டு

ஸ்பெக்ட்ரம் வழக்கில் முன்னாள் மத்திய மந்திரி ஆ.ராசா, கனிமொழி உள்ளிட்டோர் மீது புதிய குற்றச்சாட்டுகளை பதிவு செய்யுமாறு சி.பி.ஐ. கோர்ட்டில் சி.பி.ஐ. மனுதாக்கல் செய்தது.

குற்றப்பத்திரிகை

ஸ்பெக்ட்ரம் வழக்கு விசாரணை, டெல்லி பாட்டியாலா ஹவுஸ் வளாகத்தில் உள்ள சி.பி.ஐ. கோர்ட்டில் நீதிபதி ஓ.பி.சைனி முன்பு நடைபெற்று வருகிறது. முன்னாள் தொலைத்தொடர்புத்துறை மந்திரி ஆ.ராசா, தி.மு.க. எம்.பி. கனிமொழி, கலைஞர் டி.வி. நிர்வாக இயக்குனர் சரத்குமார் உள்பட 17 பேர் மீது குற்றம் சாட்டப்பட்டுள்ளது.

அவர்கள் மீது இ.பி.கோ. 120பி, 420, 468 மற்றும் 471 ஆகிய பிரிவுகளின் கீழும், ஊழல் தடுப்பு சட்டத்தின் கீழும் வழக்குப்பதிவு செய்யப்பட்டுள்ளது. குற்றச்சாட்டுகளை பதிவு செய்வது குறித்து விரைவில் கோர்ட்டு அறிவிக்க உள்ளது.

புதிய வழக்கு

இந்நிலையில், திடீர் திருப்பமாக, ஆ.ராசா, கனிமொழி உள்ளிட்டோர் மீது புதிய குற்றச்சாட்டுகளை பதிவு செய்ய சி.பி.ஐ. திட்டமிட்டுள்ளது. இதுதொடர்பாக சி.பி.ஐ. கோர்ட்டில் சி.பி.ஐ. வக்கீல் யு.யு.லலித் நேற்று ஒரு மனு தாக்கல் செய்தார். அதில் கூறப்பட்டு இருப்பதாவது:-

இவ்வழக்கில் குற்றம் சாட்டப்பட்டுள்ள முன்னாள் மத்திய மந்திரி ஆ.ராசா, அவருடைய முன்னாள் செயலாளர் ஆர்.கே.சந்தோலியா, முன்னாள் தொலைத்தொடர்பு செயலாளர் சித்தார்த் பெகுரா ஆகியோர் அரசு ஊழியர்கள். அவர்கள் மதிப்பு வாய்ந்த 2ஜி ஸ்பெக்ட்ரம் அலைவரிசையை ஒதுக்கீடு செய்யும் அதிகாரம் பெற்றிருந்தனர்.

அவர்கள் குற்றம் சாட்டப்பட்ட மற்றவர்களுடன் குற்றச்சதியில் ஈடுபட்டு, விதிமுறைகளை மீறியும், கொள்கைகளுக்கு முரணாகவும், தகுதி விதிமுறைகளை புறக்கணித்தும், மதிப்பு வாய்ந்த 2ஜி ஸ்பெக்ட்ரம் அலைவரிசையை சட்டவிரோதமாக ஒதுக்கீடு செய்துள்ளனர்.

சுவான் டெலிகாம் நிறுவனர் ஷாகித் உஸ்மான் பல்வா, வினோத் கோயங்கா, சுவான் டெலிகாம் நிறுவனம், யுனிடெக் நிர்வாக இயக்குனர் சஞ்சய் சந்திரா, யுனிடெக் ஒயர்லெஸ் நிறுவனம் ஆகியவை தவறாக பலன் அடைவதற்காக இந்த நம்பிக்கை மோசடியை செய்துள்ளனர்.

கனிமொழி

ஆகவே, அரசு ஊழியர்களாக இருந்து கொண்டு நம்பிக்கை மோசடி செய்ததால், ஆ.ராசா, ஆர்.கே.சந்தோலியா, சித்தார்த் பெகுரா ஆகியோர் இ.பி.கோ. 409-வது பிரிவின் கீழ் தண்டிக்கத்தக்க குற்றத்தை செய்துள்ளனர். ஆகவே, அவர்கள் மீது அந்த பிரிவின் கீழ் குற்றம் சாட்ட வேண்டும்.

கனிமொழி உள்ளிட்ட மற்றவர்கள் இ.பி.கோ. 120பியுடன் (குற்றச்சதி) இணைந்து இ.பி.கோ. 409-வது பிரிவின் கீழ் தண்டிக்கத்தக்க குற்றத்தை செய்துள்ளனர். ஆகவே, அவர்கள் மீதும் அதன்படி குற்றம் சாட்ட வேண்டும்.

குற்றப்பத்திரிகையில் ஏற்கனவே கூறப்பட்டுள்ள குற்றச்சாட்டுகளுடன் இந்த புதிய குற்றச்சாட்டுகளையும் சேர்க்க வேண்டும். அதன் அடிப்படையில், மேற்கண்ட குற்றச்சாட்டுகளை பதிவு செய்ய வேண்டும்.

இவ்வாறு அம்மனுவில் கூறப்பட்டுள்ளது.

எதிர்ப்பு

ஆனால், சி.பி.ஐ.யின் மனுவுக்கு குற்றம் சாட்டப்பட்டவர்களின் வக்கீல் கடும் எதிர்ப்பு தெரிவித்தார். குற்றச்சாட்டு பதிவு செய்யும் நடவடிக்கையை தாமதம் செய்வதற்காக, இந்த மனுவை சி.பி.ஐ. தாக்கல் செய்திருப்பதாக அவர் கூறினார்.

தினதந்தி