பாமரர்களை பயமுறுத்த வேண்டாம்

பாமரர்களை பயமுறுத்த வேண்டாம்


இருபத்தி ஒன்றாம் நூற்றாண்டிலேயே உலக மாந்தர் அனைவருக்கும் தமிழ் மக்கள் உள்பட, நாகரிகமாக அனுதினமும் உயிர்வாழக் குடிநீரும், மின்சக்தியும் மிக மிகத் தேவை. தமிழகத்தில் பலரிடம் பீடக் கணினிகளும், மடிக் கணினிகளும், காதில் செல்பேசிகளும் நம்முடன் அனுதினம் சல்லாபித்துக் கொண்டுள்ளபோது மின்சக்தி குன்றிப் போனால் என்னவாகும் என்று நான் விளக்க வேண்டியதில்லை.

சூழ்வெளி, உயிரினப் பாதுகாப்பளிக்கும் எந்த மின்சக்தி உற்பத்தியும் நமக்குக் கொடைதான். அணுசக்தி நிலையங்களிலிருந்து கிரீன் ஹவுஸ் வாயுக்கள் [ co2 . so2 , - Nitrous Gases ] வெளியாவதில்லை.

அணுசக்தி நிலையத்தைக் கூடங்குளத்தில் அமைக்க வேண்டாமென்று சொல்பவர்கள் , அணு உலைகளில் விபத்துக்கள் நேராது என்னும் உத்தரவாதம் அளிக்க வேண்டுமென அவர்கள் கேட்பது வியப்பாக உள்ளது. இன்று அணுமின் நிலையங்களை விட, மக்கள் அனுதின ஊதியத்துக்குப் பயன்படுத்தும் ரயில் பயணங்களில் ஆபத்துக்கள் மிகையாகிப் பெருகி விட்டன!

அணு ஆயுதங்களால் ஆயிரக்கணக்கான மாந்தர் மாண்டும், கதிக்காயங்களால் துன்புறவும் நேர்ந்த ஜப்பான் பூகம்பத் தீவுகளில் தற்போது 55 அணுமின் நிலையங்கள் பாதுகாப்பாக இயங்கி வருகின்றன. அவற்றுள் கூடங்குள அணு உலைகள் போல் ஆற்றல் கொண்ட ( 1 , 100 MWe ) 14 அசுர அணுமின் சக்தி நிலையங்கள் இயங்கி வருகின்றன.

1950 ம் ஆண்டுமுதல் 30 உலக நாடுகளில் 435 அணுமின் நிலையங்கள் அமெரிக்காவில் திரி மைல் தீவு, ரஷ்யாவில் செர்நோபிள் நிலையம் ஆகிய இரண்டைத் தவிர பாதுகாப்பாக இயங்கி,
3 ,70 , 000 MWe ( 16 % ) ஆற்றலைப் பரிமாறி வருகின்றன. மேலும் 56 நாடுகளில் 284 அணு ஆராய்ச்சி உலைகள், ஆய்வுகள் நடத்திக் கொண்டு வருகின்றன. ஈழத்தீவில் பாதிக்கும் குறைவாக அரை மாங்காய் போலிருக்கும் தென் கொரியாவில் 20 அணுமின் நிலையங்கள் மின்சாரம் தயாரித்து அனுப்பி வருகின்றன.

இந்தியாவில் இயங்கி வருபவை 17 அணுமின் நிலையங்கள். இந்தியாவில் அனைத்து அணுசக்தி நிலையங்களைப் பாதுகாப்பாக இயக்கத் திறமையுள்ள, துணிவுள்ள நிபுணர்கள் ஏராளமாய் இருக்கிறார்கள்.

மற்ற தொழில்துறைகள் எவற்றிலும் பின்பற்றப்படாமல், அணு உலை டிசைன்களில் மட்டும் வலியுறுத்தப்படும் பாதுகாப்பு விதிமுறையை, முதலில் தெரிந்துகொள்ள வேண்டும். அந்த நிர்ப்பந்த விதி இதுதான்: பூகம்பம், சூறாவளி, சுனாமி, சைக்குளோன், ஹர்ரிக்கேன், புயல், யந்திரத்தவறு போன்றவை தூண்டி எந்த விபத்து நேர்ந்தாலும் அணு உலையின் தடுப்புச் சாதனைகள் இயங்கிப் பாதுகாப்பாக, சுயமாக [ Automatic Shutdown Systems ] அணு உலை உடனே நிறுத்தப்பட வேண்டும். வெப்பத் தணிப்பு நீரோட்டம் குன்றி யுரேனிய எரிக்கோல்கள் சிதவுட்ட்ரால், அவற்றின் கதிரியக்கமும் பிளவுத் துக்களும் வெளியேறாது உள்ளடங்கும் ' கோட்டை அரசன்' [ Containment Structure ] கட்டாயம் அமைக்கப் பட வேண்டும். செர்நோபிள் அணு உலையை டிசைன் செய்த நிபுணர்கள் அணுசக்திப் பேரவை நியதிகளைப் பின்பற்றவில்லை.

பாரதத்தில் அணுசக்தி எச்சக் கழிவுகள் மீளியக்க முறையில் பயன்ப்படுத்தப்பட்டு புளுட்டோனியம் அணு ஆயுதங்களுக்கும், வேகப்பெருக்கு அணு உலைகளுக்கும் பயன்படுத்தப்படுவதால் அரசாங்கம் கதிர்க்கழிவு புதைப்பு விவரங்களை தேசியப் பாதுகாப்பு ரகசியமாக [ National Security Secret ] வைத்துள்ளது.

நான் இந்தியாவிலும் கனடாவிலும் 45 ஆண்டுகளுக்கு மேல், யுரேனிய எரிசக்தி ஊட்டும் எந்திரக் கதிரியக்க வேலைகளில் நேரிடையாகத் தொடர்ந்து பணியாற்றி இருக்கிறேன். இப்போது பொறியியல் படித்த என் புதல்வி, கனடாவில் பிக்கரிங் அணுமின் நிலையத்தில் பணி புரிகிறாள். அவளது கணவரும் டார்லிங்டன் என்று அழைக்கப்படும் வேறோர் அணுமின் நிலையத்தில் இஞ்சினியராகப் பணி செய்கிறார். எனக்கோ, அவர்களுக்கோ, அவரது இரண்டு பிள்ளைகளுக்கோ எவருக்கும் ஏழாவது விரல் முளைக்கவில்லை. ஆகவே, ஆதாரமற்ற கருத்துக்களைப் பாமர மக்களிடம் பரப்பி பயமுறுத்தும் வழக்கத்தைக் கைவிடுமாறு வேண்டிக் கொள்கிறேன்.

- கட்டுரை ஆசிரியர், மதுரை மாவட்டம்
திருமங்கலத்தில் பிறந்தவர், இந்தியாவிலும் கனடாவிலும் 45 ஆண்டுகளுக்கு மேல் அணு உலைகளில் பணியாற்றிய பொறியாளர்.

- நன்றி புதிய தலைமுறை.


--

--