ஸ்ரீகதலீகெளரி!

வம்சத்தை "வாழையடி வாழையென வளர்க' என வாழ்த்துவது மரபு. திருக்கழுக்குன்றத்திற்கு வண்டு வனம், கதலி வனம் என்பன பெயர்கள். வாழை வனத்தில் வீற்றிருப்பதால் திருக்கழுக்குன்றப் பெருமானுக்கு கதலி வசந்தர் என்ற பெயர் வழங்குகிறது. அருணகிரிநாதர் இத்தலத்து முருகனை "கதலி வனமேவு பெருமாளே' என்று போற்றியுள்ளார். வாழை வனத்தில் அம்பிகை தவம் மேற்கொண்டு சிவன் அர்ச்சித்து அருள் பெற்றதைத் தல புராணங்கள் கூறுகின்றன. திருப்பைஞ்ஞீலியிலும், திருக்கழுக்குன்றத்திலும் அம்பிகை தவம் செய்து பேறு பெற்றாள்.

தவத்தின் முடிவில் சிவபெருமான் அவளை மணந்து கொண்டதுடன், வாழை வனத்திடை உறையும் அவளைப் பணிந்து போற்றுபவர்களின் வம்சம் வளமாக இருக்கும்படியான வரத்தையும் அளித்தார். இதையொட்டி அன்பர்கள் வாழைமரக் கூட்டங்களுக்கு இடையே அம்பிகையை எழுந்தருளுவித்து வழிபடுகின்றனர்.

அரம்பையர்கள் வாழை மரங்களாக நிழல் பரப்பிப் பணி செய்ய, தவம் புரிந்து கொண்டிருக்கும் அன்னை பராசக்திக்கு ரம்பாகெளரி, அரம்பை வனவாசினி, கதலீ கெளரி என்ற பெயர்கள் வழங்குகின்றன. வாழை மரங்களின் கீழ் அம்பிகையை எழுந்தருளி வைத்து தமது வம்சம் வாழையடி வாழையாகச் சிறந்து வளர்ந்தோங்க நோற்கப்படும் நோன்புக்கு "கதலீ கெளரி நோன்பு' என்பது பெயர்.

ஐந்து ஆவரணங்களுடன் திகழும் கெளரி மண்டலத்தின் நடுவில் வாழை மரங்களின் கீழ் இருக்கும் உயர்ந்த சிம்மாசத்தில் கெளரி தேவி வீற்றிருக்க அவளை வழிபடும் இந்த கதலி கெளரி பூஜை மிகச் சிறப்பானது.

அன்பர்கள், வளமான வாழ்வையும், இதமான மனநிலையையும், அமைதியான குடும்ப வாழ்வையும் அடையப் பிரார்த்தித்து செய்யப்படும் வழிபாடு இந்த கதலீ கெளரிபூஜை. சென்னை மயிலாப்பூர் கபாலீஸ்வரர் ஆலயத்துக்கு எதிரே வாணியர் மண்டபத்தில் வருகிற 25ஆம் தேதி இந்த கதலீ கெளரி பூஜை நடைபெறுகிறது. நவக்கிரகங்கள், ராசிகள், நட்சத்திரங்கள், யோகினி உடனாய சப்தமாதர்கள், கார்த்திகைப் பெண்கள், அரம்பையர்கள் சூழ, சந்திரனும், சஷ்டிதேவியும் பணிசெய்ய வீற்றிருக்கும் கதலீ கெளரியைப் பணிந்து வளமான வாழ்வைப் பெறுவோம்.