தனித் தொழிற்துறையை உருவாக்கும் 'பேஸ்புக் அப்ளிகேசன்கள்' _

பேஸ்புக் சமூகவலையமைப்பின் மூலம் அமெரிக்காவின் பொருளாதரத்திற்கு பங்களிப்பினை மேற்கொள்ள முடிந்துள்ளதாக புதிய ஆய்வுகள் தெரிவித்துள்ளன.

மேரிலேண்ட் பல்கலைக்கழகத்தினைச் சேர்ந்த ஆராய்ச்சியாளர்களே இம்முடிவினை வெளியிட்டுள்ளனர்

அதாவது பேஸ்புக் 182, 744 புதிய வேலைவாய்ப்புகள் உருவாக வழிவகுத்துள்ளதுடன் , 12.19 பில்லியன் அமெரிக்க டொலர்கள் வருமானத்தினை அந்நாட்டின் பொருளாதாரத்திற்கு ஈட்டிக்கொடுத்துள்ளது.

அப்ளிகேசன்கள் உருவாக்குவதற்காக 235,644 புதிய வேலைவாய்ப்புகளை உருவாக்க பங்களிப்பு செய்துள்ளதாக அந்த ஆய்வுகள் சுட்டிக்காட்டுகின்றன.

பேஸ்புக்கானது சுமார் 750 மில்லியன் பாவனையாளர்களைக் கொண்டுள்ளது.

பெரும்பாலும் பேஸ்புக்கிற்கான அப்பிளிகேசன்களை மூன்றாந் தரப்பினரே உருவாக்குகின்றன.

தினசரி பேஸ்புக்கில் 20 மில்லியன் அப்பிளிகேசன்களை நிறுவுகின்றனர்(Install). மேலும், நிறுவனங்களால் உருவாக்கப்படும் கணனி விளையாட்டுகளில் பலர் ஈடுபடுகின்றனர்.

அதனால் இவ்வாறு மூன்றாந்தரப்பு மென்பொருள் நிறுவனங்களால் அப்பிளிகேசன்கள் உருவாக்கப்படும்போது அவற்றின் மூலம் வேலைவாய்ப்புகள் அதிகரிக்கின்றன.

அந்நிறுவனங்கள் தனியாக டெவலப்பர்களை மட்டும் பணிக்கமர்த்துவது இல்லை, அந்நிறுவனத்தின் சிற்றூழியர்கள் முதல் பொறியியலாளர்கள் வரை அனைவரும் வேலைவாய்ப்பினை பெறுகின்றனர்.

மேலும் இவற்றுடன் தொடர்புடைய மற்றைய நிறுவனங்களும் வளர்ச்சியடைகின்றன.

அந்த நிறுவனங்களுக்கு சந்தைப்படுத்தும் வழியாகவும் பேஸ்புக் திகழ்கின்றது. இதன் மூலம் நிறுவனங்கள் வேகமாக வளர்ச்சியடைவதனால் அவற்றிலும் வேலைவாய்ப்புக்கள் பெருகுவதாக ஆய்வின் முடிவுகள் தெரிவித்துள்ளன.

சமூக இணையத்தளங்களே புதியதொரு தொழிற்துறையை உருவாக்கி வருவதாக வல்லுநர்கள் தெரிவிக்கின்றனர்.

பேஸ்புக் மட்டுமன்றி அப்பிள் நிறுவனம் தனது 'அப் ஸ்டோரில்' 15 பில்லியனிற்கும் மேற்பட்ட தரவிறக்கங்கள் மேற்கொள்ளப்பட்டுள்ளதாகவும் இதன் பெறுமதி 2.5 பில்லியன் எனவும் கூறுகின்றது. இத்தொகையில் 70% டெவலப்பர்களுக்கே செல்கின்றமை குறிப்பிடத்தக்கது.