திடீர் `குபேரபுரி' கிராமம்!

அந்தக் கிராமத்தின் மண் சாலைகளில் ஸ்கார்பியோக்களும், இன்னோவாக்களும் புழுதி கிளப்பியபடி சீறிப் பாய்கின்றன, ஆங்காங்கே, `அடிக்கும்' வண்ணத்தில் பெயிண்ட் செய்யப்பட்ட மாளிகைகள் உயர்ந்து நிற்கின்றன, டீக்கடைகளில் `நூறுகளும்', `ஐநூறுகளும்' சர்வ சாதாரணமாய் புழங்குகின்றன...

எங்கேயிருக்கிறது இந்தச் செல்வபுரி கிராமம் என்கிறீர்களா? டெல்லி அருகே உள்ள நரங்புராதான் அது.

ஒன்றிரண்டு ஆண்டுகளுக்கு முன்புவரை, லட்சக்கணக்கான பிற இந்திய கிராமங்களைப் போலத்தான் நரங்புராவும் அழுதுவடிந்துகொண்டு இருந்தது.

மருத்துவமனை கிடையாது, கழிப்பறை, வடிகால் வசதி கிடையாது, ஒரு நாளைக்கு சில மணி நேரம் மட்டுமே `வந்து போகும்' மின்சாரம், பெயருக்கு ஒரு தொடக்கப் பள்ளி... என்று. பெரும்பாலானவர்கள் பள்ளிக்கூடப் பக்கம் ஒதுங்கியதில்லை, சத்தற்ற குழந்தைகள் புழுதியில் புரண்டு கொண்டிருக்கும்.

சரி, எந்த மந்திரவாதி தனது மாயாஜாலத்தால் இரவோடு இரவாக இக்கிராமத்தின் தலைவிதியை மாற்றினார்? மாயாஜாலமல்ல, `பார்முலா 1' கார் பந்தயத் தடம்!

இந்தியாவின் முதல் `பார்முலா 1' கார் பந்தயத் தடம் இப்பகுதியில் விறுவிறுவென்று உருவாகி வருகிறது. சுமார் ஆயிரம் கோடி ரூபாய் முதலீட்டில், 5 கிலோமீட்டர் நீளத்துக்கு சுழன்று சுழன்று வளரும் இந்தத் தடம்தான் நரங்புரா மற்றும் சுற்றுப்புற கிராம வாசிகளை செல்வச் சீமான்கள் ஆக்கியிருக்கிறது.

டெல்லி மற்றும் உத்திரப்பிரதேச மாநிலத்தை ஒட்டிய இப்பகுதியின் வறுமை, `புகழ் பெற்றது'. ஆப்பிரிக்காவின் சகாரா பகுதிகளுக்கு இணையானது.

திடீரென்று ஒருநாள் இங்கு புல்டோசர்களும், லாரிகளும் முற்றுகையிட்டன. 2 ஆயிரத்து 500 ஏக்கர் பரப்பளவில், ஒன்றரை லட்சம் பார்வையாளர்கள் அமரும் அதிநவீன பார்வையாளர் பகுதியுடன் பந்தயத் தடம், ஒரு ஆக்கி மைதானம், கிரிக்கெட் மைதானம், டென்னிஸ் அகாடமி அடங்கிய `விளையாட்டு நகரத்தை' உருவாக்கும் பிரம்மாண்டப் பணி தொடங்கியது.

அப்பகுதியின் நில உரிமையாளர்களுக்குத் தாராளமாக இழப்பீடு வழங்கப்பட்டு நிலம் கையகப்படுத்தப்பட்டது. நேற்று வரை, சிங்கிள் டீக்கு எப்படி சில்லரை தேற்றுவது என்று யோசித்துக் கொண்டிருந்தவர்களின் கைகளில் `கோடிகள்' திணிக்கப்பட்டன.

இப்படியாக பணம் கூரையைப் பிய்த்துக் கொண்டு கொட்ட, பலருக்கும் என்ன செய்வதென்றே தெரியவில்லை. பந்தாவான பங்களாக்களை கட்டுகிறார்கள், ஆடம்பர கார்களை வாங்கி அங்கும் இங்குமாக ஓட்டித் திரிகிறார்கள்.

பணம் தாராளமாகப் புரளும்போது, கிராமத்தில் மதுவுக்குக் கேட்க வேண்டுமா என்ன? அது ஆறாக ஓடுகிறது.

``இங்கே எப்போதுமே மதுபானம் புழங்கும் என்றாலும், இப்போ நிலைமை ரொம்பவே மோசமாயிடுச்சு'' என்கிறார் 36 வயது பெண்மணியான கிஷன்.

``ஆம்பளைங்களுக்கு வேலையில்ல, கையிலோ காசு நிறைய இருக்குது. அப்புறம் என்ன செய்வாங்க? நாள் முழுவதும் குடிச்சே கழிக்கிறாங்க. பெண்டாட்டி, பிள்ளைகளை
எல்லாம் மதிப்பதேயில்லை. `நீ போனா போ... ஒரே நாள்ல நான் இன்னொரு பெண்டாட்டி தேடிக்குவேன்' என்று எடுத்தெறிந்து பேசுகிறார்கள்'' என்று கிஷன் புலம்புகிறார்.

தினதந்தி