ஈகரையின் ஈத் மூபாரக் பெருநாள் வாழ்த்துக்கள்

**சிவா** · **சிவா** Sun 20 Sep 2009 - 9:31

சாந்தி சமாதானம் தழைக்கட்டும் - ஈகரையின் ஈத் மூபாரக் பெருநாள் வாழ்த்துக்கள்

நாள்தோறும் நாட்கள் பூக்கின்றன. அவை மலர்வது, மணம் வீசுவது பெருநாட்களில் திருநாட்களில்தான்.

ஒருவருக்கு இன்பமிருக்கும், வேறொருவருக்கு அது இருக்காது. இது உலக வாழ்வில் நாளும் நடைமுறை, ஆனால், வறியோர், வசதியுள்ளோர் இருவருக்கும் ஏக காலத்தில் ஒரே விதமான மகிழ்ச்சி பொதுவான புன்னகை விளைவிப்பது பெருநாள், திருநாள் ஒன்றே.

இருப்பவரும், இல்லாத வரும் அவரவர் சக்திக்கேற்ப புத்தாடை பூண்டு, சமத்துவமான சந்தோசத்தைச் சந்திக்கின்ற நாட்களே பண்டிகை நாட்கள்.

பண்டிகைகள் வேறுபடலாம். ஆனால் அவற்றின் நோக்கங்கள் பொதுவானவை. உயர்வானவை. மானுடம் மட்டற்ற மகிழ்ச்சியில் தினந்தோறும் திளைக்க வாய்ப்பில்லை என்றாலும், வசந்தம்போல வாழ்க்கையில் அவ்வப்போது மகிழ்ச்சியில் மலர்ந்திட வேண்டும். அதற்கு வாய்ப்பினை நல்குபவை பெருநாட்களும், திருநாட்களும் தான்.

உலகம், நாள்தோறும் சுழன்று கொண்டிருப்பதற்கு உண்மைக் காரணம் வேறெதுவாக இருந்தாலும் அதன் உள்ளீடான காரணம் சாந்தி, சமாதானம், சகோதரத்துவம் ஆகியவைகளைத் தேடித்தான் உலக உருண்டை ஓடிக்கொண்டிருக்கிறது எனலாம்.

ஒரு வீடும் வீதியும் அமைதியாக இருக்குமானால், ஊரும் உலகும் அமைதியில் ஆரோகணித்திடும். நோன்பை நுகர்ந்து பொறுமையின் மாண்பை பகிர்ந்து, மகிழ்வைப் பகிர்ந்து பூத்து மலர்ந்துள்ளது பெருநாள் இந்நாள்.

இந்நாளில், நபிகள் நாயகம் (ஸல்) அவர்களின் சாத்வீகம் தழைக்க சௌஜன்யம் நிலைக்க சத்தியம் பிழைக்க, சகோதரத் துவத்திற்காக அனைவரும் உழைக்க உறுதி பூணுவோம், ஒற்றுமை காணுவோம் என்று சொல்லி அனைவருக்கும் ஈத் மூபாரக் பெருநாள் வாழ்த்தை உரித்தாக்குகிறேன்.