வெளிநாட்டில் குற்றம்புரிந்தவர் மீது இந்தியாவில் விசாரணை நடத்தலாம்

புதுடெல்லி : ஆந்திராவில் பிரகாசம் மாவட்டம், அடங்கி பகுதியை சேர்ந்த
தோட்டா வெங்கடேஸ்வரலுவுக்கும், அதே பகுதியை சேர்ந்த சுனீதா என்பவருக்கும்
கடந்த சில ஆண்டுகளுக்கு முன் திருமணம் நடந்தது. திருமணத்துக்கு பின்
இருவரும் ஆப்ரிக்க நாடான போட்ஸ்வானாவில் குடியேறினர். அப்போது, சுனீதாவை
வெங்கடேஸ்வரலுவும், அவரது குடும்பத்தினரும் கொடுமைப்படுத்தினர்.
இதையடுத்து, சுனீதா, கணவர் வீட்டாருடன் கோபித்து கொண்டு ஊர் திரும்பினார்.
பின்னர், தனது கணவர் மற்றும் குடும்பத்தினர் மீது போலீசில் வரதட்சணை கொடுமை
புகார் கொடுத்தார். போலீசார் வழக்கு பதிவு செய்து விசாரித்தனர்.

இதை
எதிர்த்து, ஆந்திர உயர்நீதிமன்றத்தில் வெங்கடேஸ்வரலு மனு தாக்கல்
செய்தார். மனுவை விசாரித்த உயர்நீதிமன்றம், வெங்கடேஸ்வரலு மீதான வழக்கை
ரத்து செய்ய மறுத்தது. மற்றவர்கள் மீதான வழக்கை ரத்து செய்தது.
வெங்கடேஸ்வரலு மீது அடங்கி மாஜிஸ்திரேட் நீதிமன்றத்தில் குற்றப்பத்திரிகை
தாக்கல் செய்யப்பட்டது. தன் மீதான வழக்கை ரத்து செய்யக் கோரி, உச்ச
நீதிமன்றத்தில் வெங்கடேஸ்வரலு மனு தாக்கல் செய்தார். இதை விசாரித்த
நீதிபதிகள் அல்டாமஸ் கபீர், சிரியாக் ஜோசப், நிஜ்ஜார் ஆகியோர் அளித்த
தீர்ப்பு:

இந்தியர் ஒருவர் வெளிநாட்டில் இருக்கும் போது குற்றம்
புரிந்திருந்தால், அதை இந்தியாவில் விசாரிக்கலாம் என குற்றவியல் நடைமுறைச்
சட்டப்பிரிவு 188ல் அனுமதிக்கப்பட்டிருக்கிறது. ஆனால், வழக்கு விசாரணைக்கு
மத்திய அரசிடம் முன் அனுமதி பெற வேண்டும். போலீசார் விசாரணையை துவங்கும்
போது அனுமதி தேவையில்லை. வழக்கு தொடர மத்திய அரசின் முன் அனுமதி
பெறாவிட்டால், நீதிமன்றத்தில் வழக்கு விசாரிக்க முடியாது. மனு தள்ளுபடி
செய்யப்படுகிறது.

தினகரன்