" டவுட்' தனபாலு

தி.மு.க., தலைவர் கருணாநிதி:

இன்றைக்கு கூட முன்னாள் அமைச்சர் வீரபாண்டி ஆறுமுகத்தை, திடீரென வேறொரு வழக்கில் மீண்டும் கைது செய்திருக்கின்றனர். இப்படிப்பட்ட, சட்டத்துக்கு எதிரான அக்கிரமங்கள், அராஜகங்கள் இந்த ஆட்சியில் நடந்து கொண்டிருக்கின்றன.

டவுட் தனபாலு:
என்னங்க இது... ஜெயலலிதா மட்டும் நேரடியா விசாரணையைச் சந்திக்கணும்கிறீங்க... உங்க கட்சிக்காரங்க மேல வழக்குன்னதும், அக்கிரமம், அராஜகம்னு கூவுறீங்க... சட்டம் அவங்களை வேற மாதிரி அணுகணும்; உங்களை வேற மாதிரி அணுகணுமா...?



தமிழக பா.ஜ., பொதுச் செயலர் மோகன் ராஜுலு:

கட்சியின் மாநில மையக்குழுக் கூட்டம், மாநிலத் தலைவர் பொன்.ராதாகிருஷ்ணன் தலைமையில் இன்று நடக்க உள்ளது. வரும் உள்ளாட்சித் தேர்தலுக்கான வேட்பாளர்கள் தேர்வு குறித்தும், கையாள வேண்டிய யுக்திகள் குறித்தும் இக்கூட்டத்தில் விவாதிக்கப்படும்.

டவுட் தனபாலு:

எல்லா கட்சியும் விறுவிறுப்பா விருப்ப மனுக்களை வாங்கிட்டு இருக்காங்க... நீங்க, இனிமே தான் ஆலோசனையே பண்ணப் போறீங்களா...? பேசாம, "நாட்டில் நடக்கும் அராஜக நிகழ்வுகளைக் கண்டித்து, உள்ளாட்சித் தேர்தலை புறக்கணிக்கிறோம்'னு அறிவிச்சுடுங்களேன்... கைக்காசை கரைக்க வேண்டியிருக்காதுல்ல...!

பத்திரிகைச் செய்தி:
அரசு விரைவு பஸ்களில், "ஆன்-லைன்' மூலம் டிக்கெட் முன்பதிவு செய்யும் வசதியை ஏற்படுத்த, "இ-பேமென்ட் கேட்வே' தேர்வு செய்வதற்காக, டெண்டர் அறிவிக்கப்பட்டுள்ளது.

டவுட் தனபாலு:

எதுக்குங்க,"டெண்டர்' எல்லாம் அறிவிச்சுட்டு... எப்படியும், நமக்கு தோதுப்படறவங்களுக்குத் தான் கொடுக்கப்போறீங்க... அதை, நேரடியாவே கொடுத்துட வேண்டியது தானே... மத்தவங்க நேரமாவது வீணாகாம இருக்கும்ல...!