'பதிவு மூப்பு அடிப்படையில் ஆசிரியரை தேர்வு செய்க'

பதிவு மூப்பு அடிப்படையில் ஆசிரியர்களை தேர்வு செய்ய வேண்டும் என்று பாமக நிறுவனர் ராமதாஸ் வேண்டுகோள் விடுத்துள்ளார்.

இதுகுறித்து அவர் வெளியிட்ட அறிக்கையில், "தமிழ்நாட்டில் மொத்தம் 17,387 ஆசிரியர் பணியிடங்களும், 16,549 பகுதிநேர ஆசிரியர் பணியிடங்களும் ஏற்படுத்தப்படும் - பள்ளிகளில் காலியாக உள்ள 14,377 ஆசிரியர் பணியிடங்கள் நிரப்பப்படும் என்றும் தமிழக அரசு அறிவித்துள்ளது. இதன்படி மொத்தம் 48,313 ஆசிரியர்கள் தேர்வு செய்யப்பட உள்ளனர்.

இந்த ஆசிரியர்கள் அனைவரும் எவ்வாறு தேர்வு செய்யப்படுவார்கள்? என்பதில் நிலவும் குழப்பம் கவலையில் ஆழ்த்தியிருக்கிறது. தமிழகத்தில் பெரும்பாலான காலங்களில் வேலைவாய்ப்பு அலுவலக பதிவு மூப்பின் அடிப்படையிலேயே ஆசிரியர்கள் தேர்வு செய்யப்பட்டு வந்திருக்கின்றனர்.

ஆனால், தற்போது அ.தி.மு.க. அரசு, வேலைவாய்ப்பு அலுவலக பதிவு மூப்பு அடிப்படையில் ஆசிரியர்கள் தேர்வு செய்யப்படமாட்டார்கள் என்றும், போட்டித் தேர்வுகளின் அடிப்படையில்தான் ஆசிரியர்கள் தேர்வு செய்யப்படுவார்கள் என்றும் கல்வித்துறை அதிகாரிகள் சிலர் அதிகாரப்பூர்வமற்ற வகையில் கருத்து தெரிவித்திருக்கின்றனர்.

இதனால், வேலைவாய்ப்பு அலுவலகங்களில் பதிவு செய்து 20 ஆண்டுகளுக்கும் மேலாக காத்திருக்கும் பட்டதாரி ஆசிரியர்கள் கவலையடைந்துள்ளனர். ஆசிரியர் பணிக்காக மீண்டும் ஒரு போட்டித் தேர்வை நடத்துவது, தமிழக அரசின் பல்கலைக்கழகங்களால் நடத்தப்படும் தேர்வுகளின் தரத்தின் மீதே ஐயம் கொள்வது போன்றதாகும்.

2010-ம் ஆண்டு டிசம்பர் மாத நிலவரப்படி வேலைவாய்ப்பு அலுவலகங்களில் 1,22,000 முதுநிலை பட்டதாரி ஆசிரியர்கள் உள்பட 7 லட்சத்திற்கும் மேற்பட்ட ஆசிரியர்கள் பதிவு செய்து காத்திருக்கிறார்கள். பதிவு மூப்பின் அடிப்படையில் அவர்களுக்கு வேலை வழங்குவதுதான் நியாயமானதாக இருக்கும். மாறாக போட்டித் தேர்வுகளை நடத்துவது பல்வேறு முறைகேடுகளுக்கு வழிவகுக்கும். பணம் இருப்பவர்களுக்கு மட்டும்தான் ஆசிரியர் பணி கிடைக்கும் என்ற நிலையை ஏற்படுத்திவிடும்.

எனவே, ஆசிரியர் பணிக்காக காத்துக்கிடக்கும் 7 லட்சம் பேரின் நலன் கருதி, வேலைவாய்ப்பு அலுவலக பதிவு மூப்பு அடிப்படையில் ஆசிரியர்களை தேர்வு செய்ய வேண்டும். இதுதொடர்பான அறிவிப்பை ஆசிரியர் தினமான இன்று வெளியிட வேண்டும் என்று கேட்டுக் கொள்கிறேன்," என்று ராமதாஸ் கூறியுள்ளார்.

விகடன்