கிளிநொச்சி கிளர்ந்தெழுகிறது! கறுப்பு யூலையின் நினைவு நாளில் வரலாற்றை மாற்ற உங்களை அழைக்கிறது!!

உங்களின் ஒரு தொலைபேசி அழைப்பு ஈழத்தமிழர்களின் வாழ்க்கையில் பாரியதொரு மாற்றத்தை ஏற்படுத்தும் என்ற அவசர வேண்டுகோளே இன்றைய செய்தியாகிறது.

தாயகத்திலுள்ள எங்களின் உறவுகளிற்கு “தமிழ்த் தேசியக் கூட்டமைப்பிற்கு” வாக்களியுங்கள் என்ற வேண்டுகோளை விடுப்பதே உங்களின் இந்தத் தொலைபேசி அழைப்பின் நோக்கமாகும்.

புலம்பெயர்ந்த மக்களாகிய எமது பலம் எமக்கே தெரியாமல் இருந்திருந்தால் அதனை விலாவாரியாக விளக்கி “உங்களால் தான் முடியும்” என உரிமையுடன் உதவியைக் கோருகிறார்கள் எம் உடன் பிறப்புக்கள். நிச்சயமாக நம்புங்கள் எங்களால் இந்த மாற்றத்தை ஏற்படுத்த முடியும்.

1983ம் ஆண்டு யூலை 23ம் திகதி இனப்பிசாசின் கோரப்பற்களில் தமிழினம் சிக்குண்ட போது இனப்பிரச்சினை நிரந்தரமாக உலகின் கண் அடையாளப்படுத்தப்பட்டது. அது நடந்து 28 ஆண்டுகளின் பின்னான 2011 யூலை 23ம் திகதி தமிழர்களின் ஜனநாயகத்தை நசுக்குவதற்காக சிங்களம் தீவிரமாக முயற்சி செய்து வருகிறது.

அமைச்சர்களின் தலைமையில் இன்னபல சிங்களப் பிரபலங்கள் வடக்கில் குவிந்துள்ளன. தமிழரின் வாக்குக்கள் தமிழரிற்குப் போகக்கூடாது என்பதற்காக அது பண, பொருள் உதவிகளை மக்களிற்கு வாரி வழங்கி அவர்களைத் திசை திருப்பப் பார்க்கிறது. சிங்கள தேசமே திரண்டு வந்த போதிலும் இல்லை இதை நாங்கள் விடமாட்டோம் என ஜனநாயகப் போரில் இறங்கியுள்ளது தமிழர் தரப்பு.

தங்களின் இந்த முயற்சிக்கு வலுச் சேர்க்கவே உங்களின் ஒரு தொலைபேசி அழைப்பு அந்த மண் உரிமையுடன் நாடி நிற்கிறது. அதன் தேவையும் இன்றைய பொழுதில் மிக மிகப் பெரியது. தமிழர்களிற்கான ஒரு தலைமை எழக்கூடாது என்பதற்காக சிங்களம் செய்யும் இந்தச் சதியை நாங்கள் வென்றேயாக வேண்டும்.

சிங்களம் இத் தேர்தலில் வென்றால் தமிழர்களின் பேச்சுப்பலம் இல்லாமற் செய்யப்படுவது மாத்திரமல்ல... தமிழர்களின் “தேர்ந்தெடுக்கப்பட்ட” தலைமையாக அவர்களின் ஐந்தாம்படையாக, அடிவருடிகளாகச் செயற்படுபவர்களையே உலகிற்கு அவர்கள் காட்டுவார்கள்.

எந்த ஒரு காரியத்திலும் தகுந்த நேரத்தில், தேவையான பொழுதில் முடிவெடுத்தலைத் தள்ளிப் போடுவதும், பிற்போடுதலும் அவர்களிற்கு பல எதிர்பாராத விளைவுகளைத் தரும் என்ற உண்மை தெரிந்த பின்னரும் நாங்கள் மற்றவர்கள் தொலைபேசி எடுப்பார்கள் என்ற சாக்கைச் சொல்லி இந்தக் காரியத்தைத் தள்ளிப் போடக்கூடாது.

உலகம் என்றுமே தொடர்ந்தும் எமது பிரச்சினையில் கரிசனை கொண்டிருக்கும் என்று எதிர்பார்க்க முடியாத ஒரு நிலையில் அவர்கள் தேடுகின்ற “தமிழர்களின் பிரதிநிதிகள்” யாரென்பதை அடையாளப்படுத்தும் எங்களின் மக்களின் வாக்குகளே இந்த முறை தீர்மானிக்கப் போகின்றன.

எனவே கறுப்பு யூலையின் நினைவு தினத்தில் இடம்பெறவுள்ள இந்தத் தேர்தலில் தமிழ்த் தேசியக் கூட்டமைப்பிற்கு வாக்களிக்க தேவையான காரணங்களை தாயகத்திலுள்ள மக்களிற்கு தொலைபேசி மூலம் பகிருங்கள்.

எமது இந்த வரலாற்றுப் புதிப்பித்தலில் நாங்கள் துணிந்து முடிவெடுத்து ஒரு மாற்றத்திற்கு வழி சமைக்க வேண்டுமென உங்களை அன்போடும் உரிமையோடும் கேட்டுக் கொள்கின்றோம்.