தீவிரவாதத்தை ஒழிப்பதில் முதன்மையாக திகழ்பவர் ஜெயலலிதா

மதுரை,செப்.-3 - தீவிரவாத்தை ஒழிப்பதில் தமிழக முதல்வர் ஜெயலலிதா முதன்மையாக திகழ்கிறார் என்று கர்நாடக காங்கிரஸ் தலைவர்களில் ஒருவரான எஸ்.எஸ்.பிரகாசம் தெரிவித்துள்ளார். கர்நாடக மாநில தொழிற்சங்க தலைவரும், ராஜீவ் ஜோதி யாத்ரா கமிட்டியின் தலைவருமான எஸ்.எஸ்.பிரகாசம் நேற்று மதுரையில் பேட்டியளித்தார். அப்போது அவர் கூறியதாவது, ராஜீவ் காந்தி வழக்கில் தண்டனை வழங்கப்பட்டவர்களின் தூக்கு தண்டனையை நிறைவேற்ற வேண்டும். தீவிரவாதிகள் யாராக இருந்தாலும் சட்டப்படி நடவடிக்கை எடுக்கப்பட வேண்டும் என்பதில் காங்கிரஸ் கட்சி உறுதியாக இருக்கிறது. சுயநலத்திற்காக சிலர் போராடுகிறார்கள்.

தீவிர வாதிகள் விசயத்தில் மெத்தன போக்கை கடைபிடித்தால் இந்தியாவின் வளர்ச்சி பாதிக்கப்படும். இதற்கு மும்பை குண்டு வெடிப்பு சம்பவம் ஒரு எடுத்துக்காட்டாகும். தீவிரவாதிகள் மீதானா தண்டனையை நிறைவேற்ற கோரி ஜனாதிபதி பிரதிபா பட்டீலை சந்தித்து மனு கொடுக்க உள்ளோம். தமிழக முதல்வர் ஜெயலலிதாவை பல ஆண்டுகளாக நான் அறிவேன். தீவிரவாதத்திற்கு எதிராக முதன்மையாக செயல்படுபவர் தமிழக முதல்வர் ஜெயலலிதா. எனவே அவர் தீவிரவாவத்திற்கு ஆதரவாக ஒரு போதும் இருக்க மாட்டார்.

ராஜீவ் காந்தி மரணத்தின் போது சோனியாகாந்தி எவ்வளவு வேதனைஅடைந்திருப்பார். அவருடன் சேர்ந்து எத்தனை அதிகாரிகள் கொல்லப்பட்டார்கள் என்பதை எண்ணி பார்க்க வேண்டும். இந்த துயர சம்பவங்கள் இனிமேல் நடக்க கூடாது. இவர்களின் தூக்கை ரத்து செய்தால் மற்ற தீவிரவாதிகளுக்கு ஒரு வாய்ப்பாக அமைந்து விடும். நாடு வளர வேண்டுமானால் தீவிரவாதம் ஒழிக்கப்பட வேண்டும். காங்கிரஸ் சட்டப்படி எல்லாம் நடக்கும் என்ற நம்பிக்கையில் போராடாமல் இருக்கிறது.தீவிரவாதத்தை எதிர்த்து பெங்களூரில் எங்கள் அமைப்பு சார்பில் உண்ணாவிரத போராட்டம் நடைபெற உள்ளது என்றார்.

பேட்டியின் போது, மதுரை புறநகர் மாவட்ட காங்கிரஸ் துணை தலைவர் சைமன்பல்தேசிங், பசுமலை ரவி, செய்தி தொடர்பாளர் விஜயராகவன் ஆகியோர் உடனிருந்தனர்.

தினபூமி