டாக்டர்களை நியமிக்க தனி வாரியம்: பறிபோகும் டி.என்.பி.எஸ்.சி. உரிமைகள்!

டாக்டர்களை நியமிக்க தனி வாரியம்: பறிபோகும் டி.என்.பி.எஸ்.சி. உரிமைகள்!

First Published : 28 Aug 2011 02:04:09 AM IST


சென்னை, ஆக. 27: டாக்டர்களை நியமிக்க தனி வாரியம் அமைக்கப்படும் என அரசு அறிவித்துள்ளது. இது, தமிழ்நாடு அரசுப் பணியாளர் தேர்வாணையத்தின் (டி.என்.பி.எஸ்.சி) முக்கியத்துவத்தைக் குறைக்கும் என்ற கருத்து எழுந்துள்ளது.

டி.என்.பி.எஸ்.சி. கடந்த 75 ஆண்டுகளுக்கும் மேலாக செயல்பட்டு வருகிறது. 1970-கள் வரை தமிழக போலீஸ் உதவி இன்ஸ்பெக்டர் உள்ளிட்ட பணியிடங்களுக்குக் கூட தேர்வுகளை நடத்தி பணியாளர்களைத் தேர்வு செய்தது.

1972-ம் ஆண்டுகளில், காவல் துறையில் பணியாளர்களைத் தேர்வு (குரூப் 1 பணியிடங்களைத் தவிர்த்து) செய்யும் பணி டி.என்.பி.எஸ்.சி.யிடம் இருந்து பறிபோனது. சீருடைப் பணியாளர் தேர்வு வாரியம் மூலம் சப்-இன்பெஸ்க்டர் உள்ளிட்ட காவலர் பணியிடங்கள் நிரப்பப்படுகின்றன.

ஆசிரியர்கள் நியமனம்: காவல் துறையில் ஆள் சேர்க்கும் உரிமை பறிபோனாலும், ஆசிரியர்கள் போன்ற பணியிடங்களுக்கு பணியாளர்களை தேர்வு செய்துவந்தது. ஒருகட்டத்தில் இதுவும் கையை விட்டுச் சென்றது. 1987-ம் ஆண்டில் ஆசிரியர் தேர்வு வாரியம் அமைக்கப்பட்டது. அன்று முதல், பள்ளிகளில் ஆசிரியர்களை நியமிக்கும் பணியை அந்த வாரியம் மேற்கொண்டு வருகிறது.

டாக்டர்கள் நியமனம்: காவலர்கள், ஆசிரியர்கள் பணியிடங்களுக்கு தேர்வு செய்யும் பணிகளைத் தொடர்ந்து, இப்போது டாக்டர்களை நியமிக்கும் பணியும் தேர்வாணையத்தை விட்டுச் செல்லும் நிலை ஏற்பட்டுள்ளது.

டாக்டர்கள் நியமனத்துக்கென தனி வாரியம் அமைக்கப்படும் என சுகாதாரத் துறை அமைச்சர் வி.எஸ்.விஜய், சட்டப் பேரவையில் அறிவித்துள்ளார். எம்.பி.பி.எஸ்., படித்தவர்கள் மட்டுமின்றி சித்தா, யுனானி போன்ற இந்திய மருத்துவத் துறையில் ஏற்படும் டாக்டர்கள் காலியிடங்களை நிரப்பும் பணியை அரசுப் பணியாளர் தேர்வாணையம் இப்போது மேற்கொண்டு வருகிறது.

அமைச்சரின் இந்த அறிவிப்பால், டாக்டர்களை நியமிக்கும் பணியை சம்பந்தப்பட்ட வாரியமே மேற்கொள்ளும். ஆனால், கேரளம் போன்ற அண்டை மாநிலங்களில் காவலர், ஆசிரியர் உள்பட அனைத்துப் பணியிடங்களுக்கான தேர்வை பணியாளர் தேர்வாணையமே மேற்கொள்கிறது.

காரணம் என்ன? தமிழகத்தில் 15 ஆயிரத்துக்கும் மேற்பட்ட டாக்டர்கள், செலிவியர்கள் காலிப் பணியிடங்கள் உள்ளன. அவற்றை நிரப்புவதில் தமிழ்நாடு அரசுப் பணியாளர் தேர்வாணையம் சுணக்கம் காட்டுவதாக புகார்கள் எழுகின்றன.

""டாக்டர்கள் காலிப் பணியிடங்களுக்கு தேர்வுகளை நடத்தி அதில் வெற்றி பெறுவோரை பணியமர்த்தும் வேலையை டி.என்.பி.எஸ்.சி. மேற்கொள்கிறது. ஆனால், அதில் தாமதங்கள் ஏற்படுகின்றன. இந்த நியமனங்கள் தொடர்பாக நீதிமன்றத்தில் வழக்கும் தொடரப்படுகிறது. காலிப் பணியிடங்களை விரைந்து நிரப்பாத காரணத்தால் மருத்துவமனைகளின் பணிகளில் பாதிக்கப்படுகின்றன. வாரியத்தின் மூலம் பணியிடங்களுக்கு டாக்டர்களை நிரப்பும் போது அதற்கான தேர்வு முறையை விரைந்து மேற்கொள்ள முடியும்'' என சுகாதாரத் துறை வட்டாரங்கள் தெரிவிக்கின்றன.

அரசுப் பணியாளர் தேர்வாணையத்தில் பணியாளர்கள் பற்றாக்குறை நிலவுவதால் தேர்வு முடிவுகளை விரைந்து வெளியிட முடியாத நிலை ஏற்பட்டிருப்பதாக பணியாளர் மற்றும் நிர்வாகச் சீர்திருத்தத் துறை அதிகாரிகள் தெரிவிக்கின்றனர்.

குறைந்த அளவு பணியாளர்களையும், அதிகாரிகளையும் வைத்துக் கொண்டு வேலை வாங்கும்போது அவர்களுக்கு பணிச் சுமை அதிகரிக்கிறது. இதனால், ஏற்படும் மனிதப் பிழைகளுக்கு தேர்வர்கள் பாதிக்கப்படும் சூழல் உருவாகிறது. இதைக் கருத்தில் கொண்டே தனி வாரியம் அமைக்கும் சூழ்நிலைக்கு அரசு தள்ளப்பட்டுள்ளதாக தலைமைச் செயலக வட்டாரங்கள் தெரிவிக்கின்றன.

அனைத்து வகையான துறைகளுக்கும் பணியாளர்களை தேர்வு செய்து பலம் பொருந்திய தன்னாட்சி பெற்ற அமைப்பாக இருந்த டி.என்.பி.எஸ்.சி., தனது உரிமைகளை சிறிது சிறிதாக இழந்து வருகிறது என்பதே உண்மை தினமணி