அணு கதிர்வீச்சை தடுப்பதற்கான புதிய கருவி: இந்திய விஞ்ஞானிகள் சாதனை

**இளமாறன்** · **இளமாறன்** Mon Aug 29, 2011 1:43 am

அணு கதிர்வீச்சை தடுப்பதற்கான புதிய கருவி: இந்திய விஞ்ஞானிகள் சாதனை

சென்னை, ஆக.27: நிலநடுக்கத்தின் போது ஏற்படும் அணுக் கதிர்வீச்சை தடுப்பதற்கான புதிய கருவியை இந்திய அணு சக்தி விஞ்ஞானிகள் உருவாக்கி சாதனை படைத்துள்ளனர்.

சென்னை தரமணியில் உள்ள பொறியியல் கட்டமைப்பு ஆராய்ச்சி மையத்தில் சனிக்கிழமை இந்தக் கருவி வெற்றிகரமாக சோதனை செய்து பார்க்கப்பட்டது.

இதுகுறித்து இந்திரா காந்தி அணுசக்தி ஆராய்ச்சி மையத்தின் இயக்குநர் எஸ்.சி.சேட்டால் கூறியதாவது:

கடுமையான நிலநடுக்கம் ஏற்படும் போது மக்களை அச்சுறுத்துவது அணுமின் நிலையத்தில் இருந்து வெளியேறும் கதிர் வீச்சுகளே. இந்தியாவில் நிலநடுக்கத்தால் இத்தகைய பாதிப்புகள் இதுவரை இல்லாத போதும், எதிர்காலத்தில் இத்தகைய பாதிப்புகள் ஏற்படாத வகையில் கருவி ஒன்று உருவாக்கப்பட்டுள்ளது.

உதாரணத்திற்கு இந்தக் கருவியை கல்பாக்கம் அணுமின் நிலையத்தில் அமைத்தால் நில நடுக்கத்தின் அதிர்வை அந்தக் கருவி உணர்ந்து ஒரு நொடியில் அணுமின் நிலையத்தின் செயல்பாடுகளை நிறுத்திவிடும். ன

இதனால் கதிர்வீச்சு தாக்கும் அபாயம் உடனடியாக நிறுத்தப்படும் என்றார் எஸ்.சி.சேட்டால்.

பொறியியல் கட்டமைப்பு ஆராய்ச்சி மையத்தின் (எஸ்.ஈ.ஆர்.சி) இயக்குநர் நாகேஷ் ஆர். ஐயர் கூறியதாவது:

இந்தச் சோதனை முதல்முறையாக பொறியியல் கட்டமைப்பு ஆராய்ச்சி மையத்தில் நடத்தப்படுகிறது. இந்த முயற்சிக்கு அங்கீகாரம் கொடுக்கப்பட்டால் பெரிய அளவில் வெற்றிபெறும். இந்தச் சோதனை முயற்சிக்கும், கட்டமைப்புக்கும் ரூ.40 கோடி செலவிடப்பட்டுள்ளது என்றார் அவர்.

ஆராய்ச்சியாளர் பி.செல்லப்பாண்டி கூறியதாவது:

இரண்டு மாதம் மேலும் சில சோதனைகளுக்கு உட்படுத்தப்பட்ட பிறகு, மும்பையில் உள்ள அணுசக்தி ஒழுங்குமுறை வாரியத்தின் ஒப்புதலைப் பெற்ற பின், 12 கருவிகள் கல்பாக்கம் அணுமின் நிலையத்தில் அமைக்கப்படும்.

நிலநடுக்கத்தின் போது ஏதாவது ஒரு கருவி இயங்காத பட்சத்தில் மற்ற கருவிகள் செயல்படும். ஜப்பானில் உள்ள ஃபுகுஷிமா அணுமின் நிலையத்தில் ஏற்பட்ட பாதிப்பின் காரணமாக முன்னெச்சரிக்கை நடவடிக்கையாக விஞ்ஞானிகள் இந்தக் கருவியை உருவாக்கியுள்ளனர்.

இந்நிகழ்ச்சியில் இந்திராகாந்தி அணுசக்தி ஆராய்ச்சி மையத்தின் ஆராய்ச்சியாளர்கள் ஆர்.விஜயஸ்ரீ, கே.முத்துமணி ஆகியோர் உடனிருந்தனர். தினமணி