ரூ.1 கோடி நிதி மோசடி: பொதுமக்கள் புகார் பழனி

ரூ.1 கோடி நிதி மோசடி: பொதுமக்கள் புகார்

First Published : 26 Aug 2011 01:43:18 AM IST


பழனி, ஆக. 25:÷பழனியில் மல்டி லெவல் மார்க்கெட்டிங்கில் பணம் கட்டியதில் சுமார் ரூ.1 கோடி வரை ஏமாற்றப்பட்டதாக பொதுமக்கள் போலீஸôரிடம் வியாழக்கிழமை புகார் தெரிவித்தனர்.

பழனி தட்டான்குளத்தைச் சேர்ந்த ரவிச்சந்திரன் (40), அவரது மனைவி பூங்கொடி (35) மற்றும் கோபிநாத் (39) ஆகியோர் டைபூன் என்ற மல்டி லெவல் நிறுவனத்துக்கு முகவர்களாகச் செயல்பட்டனராம்.

இந்த நிறுவனத்தில் ரூ. 10 ஆயிரம் கட்டினால், மாதம் ரூ. 850 வீதம் 36 மாதங்களுக்குத் தருவதாகக் கூறி, ஏராளமான பொதுமக்களிடம் பணம் வசூலித்துள்ளனர். இதில் சேருவோர் புதிதாக ஒரு நபரை அறிமுகம் செய்தால், அவருக்கு ரூ. 10 ஆயிரத்தில் ஐந்து சதவீதம் கமிஷனாக வழங்குவதாக அறிவித்திருந்தனர். இத் திட்டத்தில் சேர்ந்த பலருக்கு சில மாதங்கள் மட்டுமே பணம் வந்ததாம். மீதிப் பணத்தை விரைவில் வழங்குவதாக அந்த நிறுவனத்தினர் தெரிவித்திருந்த நிலையில், சில வாரங்களுக்கு முன் அவர்கள் தலைமறைவாகி விட்டனராம்.

இந்நிலையில், வியாழக்கிழமை தட்டான்குளத்தில் இருந்த ரவிச்சந்திரன் உள்ளிட்ட மூவரை பிடித்த பொதுமக்கள், அவர்களை காவல் நிலையத்துக்கு அழைத்து வந்தனர். ÷இதுகுறித்து ரவிச்சந்திரன் கூறியது: டைபூன் நிறுவனம் தற்போது மூடப்பட்டு விட்டது. இந்தியாவில் பல மாநிலங்களிலும் இதேபோல, இந்நிறுவனத்தின் மீது பலரும் வழக்குத் தொடர்ந்துள்ளனர்.

நாங்கள் முகவர்கள் மட்டுமே. நாங்களும் பொதுமக்களோடு சேர்ந்து இந்நிறுவனத்தின் மீது புகார் தரத் தயாராக உள்ளோம் என்றார். இந்நிறுவனம் குறித்து புகார் தெரிவிக்க வந்திருந்த பழனி மதினா நகரைச் சேர்ந்த சுலைமான், ஜாபர் ஆகியோர் கூறியது: ராஜேஷ் என்பவர் மீது பல மோசடி வழக்குகள் உள்ளன. பழனியில் சுமார் 150-க்கும் மேற்பட்டோர் சுமார் ரூ.1 கோடி வரை ஏமாற்றப்பட்டுள்ளனர் என்றனர்.

இதுகுறித்து இரு தரப்பினரிடமும் புகாரை பெற்றுக்கொண்ட பழனி இன்ஸ்பெக்டர் ரவி, வழக்கு திண்டுக்கல் பொருளாதாரக் குற்றப் பிரிவுக்கு மாற்றப்படும் எனத் தெரிவித்தார்.