2ஜி வழக்கு: செப்டம்பர் 15ம் தேதி மூன்றாவது குற்றப்பத்திரிகை

2ஜி வழக்கில் விசாரணையை சி.பி.ஐ., விசாரணையை முடித்து விட்டதாகவும் செப்டம்பர் 15ம் தேதி மூன்றாவது குற்றப்பத்திரிகை தாக்கல் செய்யப்படும் எனவும் சி.பி.ஐ., சுப்ரீம் கோர்ட்டில் தெரிவித்துள்ளது.

2ஜி ஸ்பெக்ட்ரம் முறைகேடு தொடர்பாக முன்னாள் மத்திய அமைச்சர் ராசா, தி.மு.க., எம்.பி., கனிமொழி, முன்னாள் தொலை தொடர்புத்துறை செயலாளர் பெகுரா ஆகியோர் மீது கைது செய்யப்பட்டு திகார் சிறையில் அடைக்கப்பட்டுள்ளனர். இந்த வழக்கில் ஏற்கனவே சி.பி.ஐ., 2 குற்றப்பத்திரிகை தாக்கல் செய்துள்ளது. 2வது குற்றப்பத்திரிகையில் தி.மு.க., தலைவர் கருணாநிதியின் மனைவி தயாளுவின் பெயர் இடம்பெற்றிருந்தது. இந்த வழக்கில் சி.பி.ஐ., 3வது குற்றப்பத்திரிகை தாக்கல் செய்யும் என தகவல்கள் வெளியாகி வந்தன. 3வது குற்றப்பத்திரிகையை தாக்கல் செய்வதற்கு ஆகஸ்ட் 31ம் தேதி கெடு விதிக்கப்பட்டிருந்தது.


இந்நிலையில் சுப்ரீம் கோர்ட்டில் நீதிபதிகள் ஜி எஸ் சிங்வி மற்றும் ஏ கே கங்கூலி தலைமையிலான பெஞ்ச் முன்பு சி.பி.ஐ., சார்பாக ஆஜரான மூத்த வழக்கறிஞர் வேணுகோபால், 2ஜி வழக்கு தொடர்பாக சி.பி.ஐ., விசாரணையை முடித்து விட்டதாகவும், செப்டம்பர் 15ம் தேதி மூன்றாவது குற்றப்பத்திரிகை தாக்கல் செய்ய உள்ளதாகவும், இதற்காக 15 நாள் அவகாசம் தேவை எனவும் மனு தாக்கல் செய்தார். இந்த வழக்கு செப்டம்ர் 1ம் தேதி விசாரணைக்கு வரும் போது, வழக்கின் தற்போதைய நிலை குறித்து சி.பி.ஐ., அமலாக்கத்துறை மற்றும் வருமான வரித்துறை ஆகியோர் புதிய அறிக்கை ஒன்றையும் தாக்கல் செய்வார்கள் எனவும் கூறினார்.


மேலும் அவர் இந்த வழக்கு தொடர்பாக, சில நிறுவனங்கள் மற்றும் அதன் அதிகாரிகள் மீது அந்நிய செலவாணி சட்டத்தின் கீழ் 6 வழக்குகளும், கறுப்பு பணப் புழக்கம் தொடர்பான சட்டத்தின் கீழும் வழக்கு பதிவு செய்யப்பட்டுள்ளதாகவும் தெரிவித்தார்.

- தினமலர்