"பேஸ்புக், ட்விட்டர்' மூலம் உருவான அரசியல் சாசனம் : ஐஸ்லாந்து நாட்டில் புதுமை

ரெய்க்ஜாவிக் : இருபத்தோராம் நூற்றாண்டின் முதல் புதுமையாக, ஐஸ்லாந்து நாட்டின் அரசியல் சாசனம், "பேஸ்புக், ட்விட்டர்' போன்ற சமூக வலைத் தளங்களில் விவாதிக்கப்பட்டு, பொதுமக்களின் கருத்துக்கள் அடிப்படையில் உருவாக்கப்பட்டுள்ளது. கடந்த 1944ல் டென்மார்க் நாட்டிடம் இருந்து விடுதலை பெற்ற ஐஸ்லாந்து, டென்மார்க்கின் அரசியல் சாசனத்தை சில சில மாற்றங்களுடன் அப்படியே ஏற்றுக் கொண்டது. 2008ல் அந்நாட்டின் பிரதான வங்கி திவாலாகி, நாட்டின் பொருளாதாரம் கேள்விக்குள்ளான நிலையில், புதிய அரசியல் சாசனம் உருவாக்கப்பட வேண்டும் என்ற கோரிக்கை எழுந்தது.

மொத்தம், மூன்று லட்சத்து 20 ஆயிரம் பேரை மட்டுமே மக்கள் தொகையாகக் கொண்ட அந்நாட்டில், 80 சதவீதம் பேர் இணையதளங்களோடு தொடர்பில் இருந்தனர். ஒட்டு மொத்த மக்கள் தொகையும் கல்வியறிவு பெற்றதாக இருந்தது. இந்நிலையில், புதிய அரசியல் சாசனம் காலத்திற்கேற்ற மாறுதலுடன் இருக்க வேண்டும் என, அந்நாட்டு அரசு முடிவெடுத்தது. அதன்படி, 950 நிபுணர்கள் அடங்கிய குழு ஒன்று, 700க்கும் அதிகமான பக்கங்களில், 9 அட்டவணைகளில் 114 பிரிவுகள் கொண்ட புதிய அரசியல் சாசனத்தை உருவாக்கியது.

இந்த அரசியல் சாசனம் குறித்த மக்களின் கருத்தை அறிவதற்காக, ஒரு குழு அமைக்க அரசு திட்டமிட்டது. அந்தக் குழு உறுப்பினர்களைத் தேர்ந்தெடுக்க ஒரு தேர்தல் நடத்தப்பட்டது. அதன்படி மொத்தம் 522 வேட்பாளர்கள் போட்டியிட்ட தேர்தலில், 25 பேர் குழு உறுப்பினர்களாக மக்களால் தேர்ந்தெடுக்கப்பட்டனர். இவர்களில், வழக்கறிஞர்கள், அரசியல் கற்பிக்கும் பேராசிரியர்கள், பத்திரிகையாளர்கள் மற்றும் பிற தொழில்களைச் சார்ந்தவர்கள் என, சமுதாயத்தின் அனைத்துத் தரப்பினரும் இடம்பெற்றுள்ளனர்.

இந்த 25 பேரும், புதிய அரசியல் சாசனத்தை அதற்கான இணையதளத்தில் முழுவதுமாக பதிவு செய்வது, தொலைக்காட்சி, வானொலி, விக்கிபீடியா, "பேஸ்புக், ட்விட்டர்' உள்ளிட்ட சமூக வலைத் தளங்களில் தினசரி அரசியல் சாசனத்தின் ஒவ்வொரு பிரிவு தொடர்பாக விவாதிப்பது, சமூக வலைத் தளங்கள், மற்றும் அரசியல் சாசன இணைய தளங்களில் மக்கள் பதிவு செய்துள்ள விமர்சனங்களை ஆராய்வது, தகுதியான விமர்சனங்களை அரசியல் சாசனப் பிரிவுகளில் சேர்த்து, தேவையான மாற்றங்களை மேற்கொள்வது என, தன் பணிகளை வரையறை செய்து கொண்டது.

இந்த ஆக்கப்பூர்வமான பணிகளால் உந்தப்பட்ட ஐஸ்லாந்து மக்கள், சமூக வலைத் தளங்கள் மற்றும் இணையதளங்களில், பொருள் திருடு போனால் மீட்பது, கால்நடைகளைப் பாதுகாப்பது ஆகிய துறைகளில் துவங்கி, வெளியுறவுக் கொள்கை வரை அனைத்துப் பிரிவுகளையும் பற்றிய தங்கள் கருத்துக்களைப் பதிவு செய்தனர்.

இந்தக் கருத்துக்கள் அனைத்தையும் ஆய்வு செய்த 25 பேர் குழு, அவற்றில் இருந்து தகுதியான 3,500 கருத்துக்களை மற்றும் ஏற்றுக் கொண்டு அவற்றை அரசியல் சாசனத்தில் சேர்த்து உரிய மாற்றங்களைச் செய்தது.

இந்த 21ம் நூற்றாண்டில் உலகில் முதன்முறையாக சமூக வலைத் தளங்கள் மூலம் அரசியல் சாசனத்தை பொதுமக்கள் பங்களிப்போடு உருவாக்க முடியும் என்பதை ஐஸ்லாந்து சாதித்துக் காட்டியுள்ளது. ஐஸ்லாந்தின் புதிய அரசியல் சாசனம், வரும் அக்டோபர் மாதம் பொது ஓட்டெடுப்புக்கு விடப்பட உள்ளது. இதையடுத்து அது அமலுக்கு வரும். தினமலர்