இந்திய பங்குச் சந்தைகளின் வீழ்ச்சியால் முதலீட்டாளர்களின் பங்குகள் மதிப்பு ரூ.9 லட்சம் கோடி சரிவு

மும்பை:இந்திய பங்குச் சந்தையின் கடும் வீழ்ச்சியால், ஒரே மாதத்தில் முதலீட்டாளர்கள் கொண்டுள்ள நிறுவனப் பங்குகளின் மதிப்பு 9 லட்சம் கோடி ரூபாய் சரிவடைந்துள்ளது.அமெரிக்கா மற்றும் ஐரோப்பிய நாடுகளில் ஏற்பட்டுள்ள பொருளாதார நெருக்கடியால், சர்வதேச பங்குச் சந்தைகளில் வர்த்தகம் கடும் வீழ்ச்சி அடைந்துள்ளது.

கடந்த நான்கு வாரங்களில், மும்பை பங்குச் சந்தையின், குறியீட்டு எண் 'சென்செக்ஸ்' , 15 மாதங்களில் இல்லாத அளவிற்கு சரிவடைந்தது. 2010ம் ஆண்டு மே மாதத்திற்கு பிறகு, சென்ற வெள்ளியன்று 'சென்செக்ஸ்' 328 புள்ளிகள் குறைந்து 16,142 புள்ளிகளில் நிலை கொண்டது.சென்ற ஜூலை மாதம் 25ம் தேதி 'சென்செக்ஸ்' அதிகபட்சமாக 18,871 புள்ளிகள் வரை சென்றது. இதையடுத்து கடந்த 18 வர்த்தக தினங்களில் 14.5 சதவீதம், அதாவது 'சென்செக்ஸ்' 2,729 புள்ளிகள் சரிவடைந்துள்ளது.

பங்குகளின் விலை வீழ்ச்சியால், பங்கு முதலீட்டாளர்கள், பல்வேறு நிறுவனப் பங்குகளில் மேற்கொண்டிருந்த முதலீட்டின் மதிப்பு, 9 லட்சத்து 11ஆயிரத்து 740 கோடி ரூபாய் குறைந்து, 59 லட்சத்து 29 ஆயிரத்து 249 கோடி ரூபாய் என்ற அளவிற்கு குறைந்துள்ளது.அதாவது, இந்த 18 வர்த்தக தினங்களில், பங்குச் சந்தையில் பட்டியலிடப்பட்டுள்ள நிறுவனப் பங்குகளில் முதலீடு செய்துள்ளோர், தங்களிடம் உள்ள பங்குகளை விற்பனை செய்திருக்கும் பட்சத்தில், 9 லட்சத்து 11ஆயிரத்து 740 கோடி ரூபாய் இழப்பை கண்டிருப்பர்.

சிறப்பான நிர்வாகம், வலுவான நிதியாதாரம் என பல வகைகளில், முதலீட்டிற்கு அதிக இழப்பை தராத 'புளுசிப்' நிறுவனப் பங்குகளும், இந்த வீழ்ச்சியில் தப்பவில்லை. முன்னணி 10 நிறுவனங்களின் சந்தை மதிப்பு மூன்றில் ஒரு பங்கு, அதாவது 2 லட்சத்து 90 ஆயிரம் கோடி ரூபாய் குறைந்துள்ளது.இந்த பட்டியலில், ரிலையன்ஸ் இண்டஸ்ட்ரீஸ், டாட்டா கன்சல்டன்சி சர்வீசஸ், இன்போசிஸ், ஸ்டேட் பேங்க் ஆப் இந்தியா, ஐ.சி.ஐ.சி.ஐ பேங்க் உள்ளிட்டவை அடங்கும்.

பங்குச் சந்தையின் சரிவிற்கு, அன்னிய நிதி நிறுவனங்கள் அதிக அளவில் பங்கு முதலீட்டை திரும்பப் பெற்றதும் ஒரு காரணமாகும்.சர்வதேச பொருளாதார நெருக்கடியால், கார்ப்பரேட் நிறுவனங்களின் லாப வளர்ச்சி குறையும் என்ற கணிப்பும், பணவீக்கத்தை கட்டுப்படுத்த ரிசர்வ் வங்கி மீண்டும் வட்டியை உயர்த்தும் என்ற எதிர்பார்ப்பு காரணமாகவும், அன்னிய நிதி நிறுவனங்கள் அதிகளவில் பங்குகளை விற்று வெளியேறியுள்ளன.

கடந்த நான்கு வாரங்களில், அன்னிய நிதி நிறுவனங்கள் 9,547 கோடி ரூபாய் மதிப்பிற்கு பங்குகளை விற்பனை செய்துள்ளதாக, பங்குச் சந்தைகள் வெளியிட்டுள்ள தற்காலிக மதிப்பீட்டு அறிக்கையில் தெரிவிக்கப் பட்டுள்ளது. இவ் வாண்டில், இதுவரை அன்னிய நிதி நிறுவனங்கள் 13 ஆயிரத்து 996 கோடி ரூபாய் மதிப்பிலான பங்குகளை விற்பனை செய்துள்ளன. அதே சமயம், உள்நாட்டு நிதி நிறுவனங்கள் 21 ஆயிரத்து 32 கோடி ரூபாய் மதிப்பிலான பங்குகளை வாங்கியுள்ளன.

பங்குச் சந்தையில் பரபரப்பான வர்த்தகத்தை கொண்டிருந்த 3,286 நிறுவனப் பங்குகளில், 687 நிறுவனப் பங்குகளின் சந்தை மதிப்பு, நான்கில் ஒரு பங்கு குறைந்துள்ளது. 971 பங்குகளின் விலை 15 -25 சதவீதம் சரிவடைந்துள்ளது. 654 நிறுவனப் பங்குகள் விலை, கடந்த இரண்டு ஆண்டுகளில் இல்லாத அளவிற்கு வீழ்ச்சி கண்டுள்ளது. இதில், 'சென்செக்ஸ்' கணக்கிட உதவும் 30 நிறுவனங்களில், 12 நிறுவனப் பங்குகளும் அடக்கம் என்பது குறிப்பிடத்தக்கது.

மும்பை பங்குச் சந்தையில், ரிலையன்ஸ் கம்யூனிகேஷன்ஸ், ரிலையன்ஸ் பவர், எம்.டி.என்.எல், டீ.பீ. ரியாலிட்டி உள்ளிட்ட 164 நிறுவனங்களின் பங்குகள், இதுவரை காணாத அளவிற்கு வீழ்ச்சி கண்டுள்ளன. இச்சந்தையில் இடம் பெற்றுள்ள 13 துறைகள் சார்ந்த நிறுவனப் பங்குகளில், 8 துறைகளைச் சேர்ந்த நிறுவனப் பங்குகளின் விலை, கடந்த ஓராண்டில் இல்லாத அளவிற்கு குறைந்துள்ளது.

ரியல் எஸ்டேட், உலோகம் மற்றும் தகவல் தொழில்நுட்ப நிறுவனப் பங்குகள், மிக அதிகமாக தலா 20 சதவீதம் வரை குறைந்துள்ளன. வங்கி,பொறியியல் மற்றும் மின் நிறுவனப் பங்குகள் விலை 15 -20 சதவீதம் வரை சரிவடைந்துள்ளன.

அமெரிக்க வீட்டு வசதிக் கடன் சந்தையில் ஏற்பட்ட குளறுபடிகள் காரணமாக 2008ம் ஆண்டு சர்வதேச பங்குச் சந்தை கடும் வீழ்ச்சி கண்டது. இந்த பாதிப்பு 10 மாதங்கள் வரை நீடித்தது. தற்போதைய பாதிப்பும் 10 மாதங்களாக நீடித்து வருகிறது. 2008ம் ஆண்டுடன் ஒப்பிடும் போது, இது மிகக் குறைவான பாதிப்பு என்ற போதிலும், மதிப்பின் அடிப்படையில் இது குறிப்பிடத்தக்க வீழ்ச்சிதான் என, இத்துறையை சேர்ந்த வல்லுனர்கள் தெரிவித்தனர்.

கடந்த 2008ம் ஆண்டு ஜனவரி 8ம் தேதி முதல் அக்டோபர் 27ம் தேதி வரையிலான காலத்தில், 'சென்செக்ஸ்' 64 சதவீதம் வீழ்ச்சியடைந்தது. இதனால், முதலீட்டாளர்கள் கொண்டிருந்த பங்குகளின் மதிப்பு, 21 லட்சத்து 39 ஆயிரத்து 602 கோடி ரூபாய் குறைந்து போனது. ஒட்டு மொத்த சந்தை மதிப்பு 48 லட்சத்து 18 ஆயிரத்து 97 கோடி ரூபாயில் இருந்து 26 லட்சத்து 78 ஆயிரத்து 495 கோடி ரூபாயாக குறைந்தது.

தற்போதைய நிலவரப்படி,'சென்செக்ஸ்' 24 சதவீதம் சரிவடைந்துள்ளது. 2010ம் ஆண்டு நவம்பர் 5ம் தேதி முதல், நடப்பு ஆகஸ்ட் மாதம் 20 ம் தேதி வரையிலான காலத்தில், சந்தை மதிப்பு 78 லட்சத்து 8 ஆயிரத்து 67 கோடி ரூபாயில் இருந்து 59 லட்சத்து 29 ஆயிரத்து 249 கோடி ரூபாயாக குறைந்துள்ளது.

ஆக, இதுவரை முதலீட்டாளர்கள் வசம் உள்ள பங்குகளின் மதிப்பு 18 லட்சத்து 78 ஆயிரத்து 818 கோடி ரூபாய் என்ற அளவிற்கு வீழ்ச்சி கண்டுள்ளது.

படிக்கவே பயமாக இருக்கே, இது எங்க போயி முடியும்?

இந்தியா தனது சுயத்தை இழந்து பன்னாட்டு நிறுவனங்களின் வால் பிடிக்கும் வேலையை ஆரம்பித்த போதே யோசித்திருக்கணும், இப்போ குத்துதே குடையுதேண்ணா எப்படி??????

நல்ல வீழ்ச்சி அடையட்டும் அப்பாவாது விலைவாசி குறையுதா என்று பார்ப்போம்..!