உங்க புனைப்பெயர் வந்த கதை என்ன?

எனது பயனர் பெயர்காரணம் ஏற்கனவே என் அறிமுகப்பதிவில் பகிரப்பட்டது தான் என்றாலும், மீண்டும் ஒருமுறை பகிர வாய்ப்பு கிடைத்ததில் மிகிழ்ச்சி மற்றும் என் அதிர்ஷ்டம்!

முதலில், 24 பக்கங்களுக்கும் மேலாக சக்கைப்போடு போட்டுக்கொண்டிருக்கும் இந்த திரியை துவங்கிய கிருஷ்ணாம்மாவுக்கு என் நன்றிகள்.

‘விமந்தனி’ – என் குழந்தையின் பெயர். (தற்போது 6-வது படித்துக்கொண்டிருக்கிறாள் என்றாலும் அவள் எனக்கு குழந்தை தானே?) ‘விமந்தனி’ – என்றால் ‘ஆளப்பிறந்தவள்’ என்று அர்த்தம்.

புனைப்பெயர் வந்த கதை இது தான். கதை மட்டும் போதுமா? அதை எப்படி இந்த பெயர் வைத்தேன் என்ற வரலாறு வேண்டாமா...?

இந்த பெயரை கண்டுபிடிக்க எவ்வளவு பிராயத்தனப்பட்டேன் என்று எனக்கு தான் தெரியும். எனக்கு இணைய அறிமுகம் இல்லாத நேரம் அது. அதனால், இதற்காக நிறைய புத்தகங்களை வாங்கிப்பார்த்து, படித்து.... உஹும்.... எந்த பெயரிலும் திருப்தி இல்லை. எப்படிப்பட்ட பெயரை தேடுகிறேன் என்றுகூட தெரியாமல் தேடினேன். இலக்கில்லாத தேடல்.

வட எழுத்துக்கள் கலக்காமலும் இருக்கவேண்டும். முழுக்க தமிழ் எழுத்துக்களாகவும் இருக்கவேண்டும். பெயரும் அழகாக இருக்கவேண்டும். கடைசியில் , ஒருவழியாக 6 மாத தேடலின் பயனாக இந்த பெயரை கண்டுபிடித்தேன்.

முதன் முறையாக படித்தபோது எனக்கே சற்று வித்தியாசமாய் தான் பட்டது. ரொம்பவே யோசித்தேன்., வைக்கலாமா... வேண்டாமா என்று.

ஆனாலும், ‘விமந்தனி’ என்பதற்கு ‘ஆளப்பிறந்தவள்’ என்ற அர்த்தம் என்னை வெகுவாய் வசீகரித்தது. அதன் பிறகு அதிகம் யோசிக்கவில்லை. நியூமராலாஜி பார்த்து குபேர எண்ணில் என் குழந்தையின் பெயராக ‘விமந்தனி’ –யை சூட்டிவிட்டேன்.

அதிலிருந்து இன்று வரை, முதன்முறையாக அவள் பெயரை கேட்பவர்கள், ‘அட... புதியதாய் இருக்கிறதே...’ என்று வியக்கத்தான் செய்கிறார்கள்.  

இந்த பெயர், அவள் படிக்கும் பள்ளியில் வேறு யாருக்கும் இல்லை. பள்ளியில் மட்டுமல்ல, சென்னையில், தமிழ்நாட்டில், இந்தியாவில்...... ஏன் இணையத்தில்....? எங்கும் இல்லை. (சங்க காலத்தில் இருந்திருக்கலாம்) இந்த பெயரை பார்த்து இனிமேல் யாரேனும் புதியதாய் வைத்தால் தான் உண்டு.

அதுமட்டுமல்ல, இணையம் அறிமுகமான பிறகு, எந்த site –ல் User ID –யாக என் பெயரை போட்டாலும் ‘not available’ என்றே வரும். (நான் படிக்கும் போதே உடன் 4 சுமதிகள் இருந்தார்கள். இணையத்தில் கேட்கவா வேண்டும்....?) ஆனால், user id பிரச்சனை ‘விமந்தனி’க்கு இல்லை. அதனால், விமந்தனி என்ற பெயரிலேயே signup செய்வது வழக்கமாகி விட்டது.

இது தான் என் புனைப்பெயரின் வரலாறு.

இணைய அறிமுகத்திற்கு முன் எனக்கு இந்த பெயர் அவ்வளவாக பிரம்மிப்பை ஏற்படுத்தவில்லை. ஆனால், இன்று...... இந்த பெயரை என் குழந்தைக்கு வைத்ததற்காக உண்மையில் என் மனம் பெருமையும், கர்வமும் கொள்கிறது என்றே சொல்வேன்.

பின்னே, உலகிலேயே இல்லாத, தேடினாலும் கிடைக்காத (இப்போது கிடைக்கும்) தீந்தமிழ் பெயர் கொண்ட மகளை அல்லவா என் அம்மையப்பன் வரமாக தந்திருக்கிறார்கள்!

-ஓம் நமச்சிவாய

அதை தான் தொலைத்துவிட்டேன் ஐயா.

இத்தனைக்கும் அதிக விலை கொடுத்து வாங்கிய புத்தகத்தில் உள்ள எந்த பெயர்களும் எனக்கு நிறைவாக இல்லை. கடைசியில் 10 ருபாய் விலையுள்ள ஒரு சின்ன புத்தகத்தில் தான் இந்த பெயர் அகப்பட்டது.

எங்கு வாங்கினேன் என்று கூட நினைவிலில்லை. platform கடைகளிலா அல்லது ஏதேனும் கோவிலிலா என்றும் தெரியவில்லை. வெகு நாட்கள் ரொம்பவும் பத்திரமாய் வைத்திருந்தேன்.

அப்படியும் வீடு மாற்றும் போது எங்கோ மிஸ்ஸாகி விட்டிருக்கிறது ஐயா... எனக்கு அதில் மிகவும் வருத்தம் தான்.