மட்டமான டேப்! மயில்சாமி சொன்ன எம்ஜிஆர் கதை!

மறைந்த முன்னாள் முதல்வரும், நடிகருமான எம்.ஜி.ஆர்., பாடல்களை மட்டமான டேப் செட்டில்தான் போட்டு கேட்பார் என்று காமெடி நடிகர் மயில்சாமி பேசினார். வேலூர் மாவட்டம் படத்தின் பாடல் வெளியீட்டு விழாவில் பங்கேற்ற மயில்சாமி வழக்கம்போலவே சுவாரஸ்யமாக பேசினார். அவர் பேசும்போது, எம்ஜிஆர் பற்றிய சில தகவல்களை தெரிவித்தார்.

அவர் பேசியதாவது: மியூசிக் டைரக்டர் எம்.எஸ்.வி. சார், வெளிநாட்டுக்கு போனபோது ஒரு பெரிய டேப் ரெக்கார்டர் வாங்கிட்டு வந்தார். எம்.ஜி.ஆருக்கு பாட்டை போட்டு அசத்தணும்னுதான் இதை வாங்கிட்டு வந்தேன் என்று சொன்னார் எல்லாரிடமும். அதே மாதிரி எம்.ஜி.ஆர் வந்ததும் அதில் தான் இசையமைச்ச பாடலை போட்டுக் காட்டினார். பிரமாதம் என்று பாராட்டிய புரட்சித்தலைவர், காரில் இருந்து அவர் கொண்டு வந்த டேப்பை எடுத்து வர செய்தார். அது மட்டமான டில்லி செட். அதில் அந்த பாட்டை போட்டு ஒருமுறை கேட்டார். ஓ.கே. நல்லாயிருக்கு என்று பாராட்டினார். எம்.எஸ்.வி.க்கு புரியவே இல்லை.

அண்ணே, இந்த டேப்ல கேட்டீங்க. மறுபடியும் ஏன் அதிலேயும் கேட்டீங்க என்றார். அதற்கு தலைவர் சொன்ன பதிலைத்தான் கவனிக்கணும். என் ரசிகர்கள் எல்லாம் ரிக்ஷா ஓட்டுறவங்களும், ஏழை தொழிலாளர்களும்தான். அவங்களுக்கு எங்கேயிருந்து கிடைக்கும் ஃபாரின் டேப்? அதனால்தான் மட்டமான செட்ல போட்டு கேட்டேன்னார், என்று பேசிய மயில்சாமி, வேலூர் மாவட்டம் படத்தின் பாடல்களும் நல்லாயிருந்துச்சு. சாதாரண மக்களும் ரசிக்கிற மாதிரி இருக்கு, என்று விழாவுக்கு வந்ததை மறக்காமல் பாடல் வெளியீட்டு விழா சம்பந்தமாக பேசி பேச்சை முடித்துக் கொண்டார்.

நிகழ்ச்சியில் நடிகர்கள் கார்த்தி, நந்தா, ஈரம் அறிவழகன், டைரக்டர் கண்ணன் உள்ளிட்ட பலரும் பங்கேற்றனர்.

நன்றி தினமலர்

பின்குறிப்பு :- அதனால் தான் புரட்சி தலைவர் இன்றும் நம்முடன் வாழ்ந்துகொண்டுள்ளார்

அதுதான் புரட்சித்தலைவர்...