சென்னையில் பெருகும் குண்டு பையன்கள்; நீரிழிவு நோய் தாக்கும் அபாயம்

சென்னை, ஆக. 10-

சென்னையில் குண்டு பையன்களின் எண்ணிக்கை அதிகரித்து வருவதாக ஆய்வில் தெரியவந்துள்ளது. சென்னை நீரிழிவு நோய் ஆராய்ச்சி மையம் சார்பில் பள்ளி மாணவர்களிடையே “ஆரஞ்ச்” எனும் பெயரில் ஆய்வு மேற்கொள்ளப்பட்டது. “ஆரஞ்ச்” என்று குழு கல்வி மூலம் குண்டு உடலை (ஒபிசிட்டி) குறைப்பது மற்றும் பரவா நோய்கள் குறித்த விழிப்புணர்வு என்பதன் ஆங்கில வார்த்தைகளின் சுருக்கம் ஆகும்.

சென்னை நகரில் செயல்பட்டு வரும் 28 தனியார் பள்ளிகள் மற்றும் 23 அரசுப் பள்ளிகளைச் சேர்ந்த 19,060 மாணவ-மாணவிகளிடம் இந்த ஆய்வு மேற்கொள்ளப்பட்டது. இந்த ஆய்வில் தெரியவந்துள்ள விஷயங்கள் வருமாறு:-

ஆய்வின் முதல் கட்ட முடிவுகளின்படி 25 சதவீதம் தனியார் பள்ளி மாணவர்களும், 8 சதவீதம் அரசுப் பள்ளி மாணவர்களும் இயல்பான எடையை விட கூடுதல் எடை அல்லது குண்டாக இருக்கின்றனர். 4.1 சதவீதம் மாணவிகளிடமும், 2.9 சதவீதம் மாணவர்களிடமும் நீரிழிவு நோய்க்கு முந்தைய நிலை காணப்படுகிறது.

அதாவது ரத்தத்தில் சர்க்கரை அளவு அதிகமாக உள்ளது. ஆனால் இதை சர்க்கரை நோய் (நீரிழிவு) என்று இந்த நிலையில் கூற முடியாது. வாழ்க்கை முறையை மாற்றிக் கொள்ளாவிட்டால், இவர்களுக்கு நீரிழிவு நோய் ஏற்பட அதிகம் வாய்ப்பு உள்ளது. அதிக எடையுள்ள குழந்தைகளுக்கு தான் நீரிழிவு நோய் அபாயம் உள்ளது.

நிறைய பள்ளிக் குழந்தைகளிடம் கழுத்து பகுதியில் ஆழமான சதை மடிப்பு காணப்படுகிறது. இது இன்சுலின் குறைவுக்கான அறிகுறி ஆகும். இவர்களுக்கு நீரிழிவு நோய் வருவதற்கான ஆபத்து அதிகம் உள்ளது.

ஆண்களுக்கும், பெண்களுக்கும் இது பொதுவாக இருந்தாலும் வயதுக்கு வந்த மாணவிகளிடத்தில் ஒழுங்கற்ற மாதவிடாய் நிகழ்வு காணப்படுகிறது. இது போன்ற சூழ்நிலையில், பெண்களுக்கு நீரிழிவு நோய் ஆபத்து அதிகரிக்கும் வாய்ப்பு உள்ளது.

இவ்வாறு ஆய்வு முடிவில் தெரிவிக்கப்பட்டு உள்ளது. மாலைமலர்

நன்றி மாறன் என்ன அப்பா அம்மா இருவருக்கும் காசு சேர்ப்பதிலேயே கவனம் அதிகமாக உள்ளது, குழந்தைகளை கவனிக்க எது நேரம்?