நாய்களுக்கும் உரிமையுண்டு... எம் மனிதர்களுக்கு?

நாளிதழைப் புரட்டி
நான்கு பக்கம் பார்த்ததும்
அடி மனசைக் கடித்தது
அந்தச் செய்தி...

சிங்காரச் சென்னையிலே
நாய்களுக்காய் கண்காட்சி...
ஆஹா ஆஹா
நடிகை கையால் தொடங்கியாச்சு!

‘சுவரும் சுண்ணாம்பும்’
என்றொரு புத்தகத்தில்
உவமைக் கவிஞர் சுரதா
உண்மைக் கவிஞராகி சொன்னார்.
‘நடிகைகள் நாய்கள் வளர்ப்பதேன்?
காவல் காக்கவும்
ஆவல் தீர்க்கவும்..’

பாழாய்ப் போன மனசுக்குள்
அந்த பவள வரி பளிச்சிடவே...
மன்னித்தேன் மனசாட்சியை!

வெளிநாட்டு நாய்கள் எல்லாம்
விலை உயர்ந்த உடையணிந்து
கொலு போல வந்தது காண்...
கூட்டம்தான் குரைத்தது காண்!

மொசுமொசுன்னு முடியிருக்க...
மொழுமொழுன்னு நாக்கிருக்க...
கன்னியிளம் பெண்கள் எல்லாம்
கட்டிப் பிடித்து காட்சி தர...

ஒரு நாயின் விலை என்ன
உள்பக்கம் விசாரித்தேன்...
சில லட்சம் என்று சொன்னார்
பயமெல்லாம் விலை பார்த்தே!

ஏ.சி. காரில் வந்து
இறங்குது நாய்...
ஏதேதோ ஹெல்த் ட்ரிங்க்
குடிக்குது நாய்...
ஞாயிற்றுக் கிழமையென்றால்
நமக்கு
தெருமுனை பாய் மட்டன்...
எல்லா நாளும் இந்நாய்க்கோ
பேக்கேஜிங் மட்டன்தான்!

அடடா மனசுக்குள்

தெருநாயின் ஓசை..
தேவி தியேட்டரிலே
பேய் படம் பார்த்துவிட்டு
பின்னிரவு நேரத்திலே

எல்லீஸ் சாலையில் நடப்பேன்...
பேய் கூட காட்டாத பயத்தை
தெரு நாய் கூட்டம் காட்டும்!

கடுகடு குரைப்பொலியில்
கால்களெல்லாம் நடுநடுங்க....
உயிரைக் கைப்பிடித்து
அறை வந்தால் முழு மூச்சு...
இப்படி
தினம் தோறும் தெருநாய்கள்
தமிழ்நாட்டின் வீதிகளில்
இலவசக் கண்காட்சி

இன்றளவும் நடத்துதய்யா...
எவரேனும் பார்த்ததுண்டா?

ஆனால் நாய்களுக்காய்
ஆடம்பர கிளப் நடத்தும்
சர்வதேச நாய்களுக்காய்
அடடா ஆர்பாட்டம்...
என்னென்ன அழகூட்டம்?

சென்றமுறை இதுபோல
நாய்கட்காய் நடந்தபோது
தொடங்கிவைத்தவர்
மத்திய அமைச்சர்

அப்போது அவர் சொன்னார்
அடிக்கோடிட்டுப் படியுங்கள்!
‘நாய்கள் இறந்தால்
புதைக்க இடமில்லை.

சென்னையில் இரண்டிடத்தில்
நாய்கட்காய் சுடுகாடு’
அமைச்சரின் வாக்குறுதி
ஆஹா எப்படி காண்!

நரநாய்கள் வெறிவேட்டை
தமிழ்த் தாயை குதறுகையில்
நாடே சுடுகாடாய்
நாறியதே ஈழம்...?





அங்கே மனிதர்கள்
உடையின்றி உரிமையின்றி
உயிராயும் பிணமாயும்
அலைந்தனரே...

இன்றும் முள்வேலி
சிறையில் குலைந்தனரே...
அந்தக்
கண்ணீர்க் காட்சி
கண்ணுக்குள் தோன்றிவிட்டால்
நாய்களுக்காய் கண்காட்சி
நடத்தத் துணிவீரோ...

தமிழரெல்லாம் நாயினும்
தரம் தாழ்ந்து கிடக்கையிலே...
நாய்களுக்கு ஆடம்பரம்
நியாயமா மனிதர்களே...?

நாய்கள் உரிமையை மதிக்கிறேன்...
உங்களின்
மனித உரிமையை?

- திலீபன்

செருப்படி வரிகள்

மேல் மட்ட மக்களின் பொழுது போக்கு இந்த நாய் கலாச்சாரம்

உண்மையான வரிகள்