“முதலில் மலாய்க்காரர்-அடுத்துதான் மலேசியர்”: திணறடிக்கும் கேள்வியைத் தவிர்த்தார் பிரதமர்

தாம் “முதலில் மலாய்க்காரர்-அடுத்துதான் மலேசியர்” என்று அம்னோவின் துணைத் தலைவரும் துணைப் பிரதமருமான முகைதின் யாசின் செய்திருந்த அறிவிப்பு குறித்து எழுப்பப்பட்ட மிகவும் ஆபத்தான கேள்விக்கு பிரதமர் நஜிப் பதில் அளிக்காமல் மழுப்பி விட்டார்.

இக்கேள்விக்கு தாம் “முதலில் மலாய்க்காரர் – அடுத்துதான் மலேசியர்” என்று அல்லது எதிரெதிர் மாறாக அவர் பதில் அளித்திருந்தால், அது அவரது துணைத் தலைவர் முகைதின் யாசின் மற்றும் அவரது ஒரே மலேசியா கோட்பாடு ஆகியவற்றுக்கிடையில் பெரும் கருத்து வேறுபாட்டை உருவாக்கி விடும்.

அவர்களுக்கிடையிலான பிளவு மலேசியாவில் உயர்மட்ட தலைமையத்துவத்தின் திடத்தன்மை மீது கடும் பின்விளைவுகளை ஏற்படுத்தும் என்று அவர் கூறினார்.

“என்னையும் எனது துணைத் தலைவரையும் பிரிக்கக்கூடிய வகையில் நான் பதில் அளிக்க மாட்டேன். மலேசியாவில், அது பெரும் ஆபத்தாகக்கூடும்.

“மக்கள் கூறுவார்கள், இங்கே பாருங்கள், பிரதமரும் அவரது துணைத் தலைவரும் ஒரே நிலைப்பாட்டைக் கொண்டிருக்கவில்லை”, என்று நஜிப் கூறினார்.

“நான் கூறுகிறேன்: ஒரே மலேசியாதான் நமது வழிகாட்டி சித்தாந்தம், நாம் நியாயமாக இருப்போம். நமது அரசமைப்புச் சட்டம் வழிகாட்டும்”, என்று கூறிய அவர் ஒரு வரையறையான பதில் அளிப்பதைத் தவிர்த்து விட்டார்.

கோலாலம்பூரில் இன்று நடந்த மலேசியா மாணவ தலைவர்களின் ஐந்தாவது உச்சநிலை பொதுக்கூட்டத்தில் உரையாற்றிய பின்னர் கேள்விக்களுக்குப் பதில் அளித்தார்.

கடந்த ஆண்டு நாடாளுமன்ற வளாகத்தில் நடந்த ஒரு செய்தியாளர் கூட்டத்தில் துணைப் பிரதமர் முகைதின் தாம் முதலில் மலாய்க்காரர், அடுத்துதான் மலேசியர் என்று கூறினார்.

பாரிசான் தலைவர்கள் எதிர்கொண்டுள்ள கடும் சோதனை அவர்கள் முதலில் மலேசியர்கள், அடுத்ததுதான் மற்றவைகள் என்பதை அறிவிப்பதாகும் என்று டிஎபியின் மூத்த தலைவர் லிம் கிட் சியாங் சவால் விடுத்திருந்தார்.

அச்சாவலுக்கு பதில் அளித்த பகோ நாடாளுமன்ற உறுப்பினரும் துணைப் பிரதமருமான முகைதின் யாசின் தாம் “முதலில் மலாய்க்காரர், அடுத்துதான் மலேசியர்” என்று அறிவித்தார். பெரும்பாலான மலாய்க்காரர்களை வாக்காளர்களாகக் கொண்ட அவரது தொகுதியில் அவர் மலாய் இனத் துரோகி என்று குற்றம் சாட்டப்படலாம் என்ற அச்சம் அவருக்கு இருந்தது.

லிம் கிட் சியாங் விடுத்திருந்த சவால் அவரை அப்படி ஒரு வலையில் சிக்க வைக்கும் விளைவைக் கொண்டிருந்தது என்றார் முகைதின் யாசின்.

முகைதினின் பதில் எதிரணித் தலைவர்கள் நஜிப் தானாக தேர்வு செய்த அவரது அமைச்சரவை உறுப்பினர்கள் அவரின் ஒரே மலேசியா கோட்பாட்டின் மீது கொண்டுள்ள ஈடுபாடு குறித்து கடும் விமர்சனம் செய்தனர்.

மலேசியாஇன்று