சிறுநீரகங்களைப் பாதிக்கும் நீரிழிவு

நீரிழிவு நோயாளிகளுக்கு மாரடைப்பு வரும் என்று இதுவரை கருதப்பட்டது. எனவே, அதைத் தடுப்பதில் மருத்துவர்கள் அதிகக் கவனம் செலுத்தினார்கள்.

ஆனால், மாரடைப்பு நோயாளிகளுக்கு சிறுநீரகம் பாதிக்கும் வாய்ப்பும் பெருமளவில் இருக்கிறது என்று கண்டுபிடித்திருக்கிறார்கள். சிறுநீரகம் செயல் இழப்பதும் மாரடைப்பு போன்று ஆபத்தானதுதான்.

எனவே, நீரிழிவு நோயாளிகள் சிறுநீரகம் பாதிக்காதபடி முன் எச்சரிக்கையாக இருக்க வேண்டும்.

15 ஆண்டு

நீரிழிவு உடனடியாக சிறுநீரகங்களைப் பாதிப்பதில்லை. 10 – 15 ஆண்டு கட்டுப்படுத்தாமல் நீரிழிவு இருந்தால், சிறுநீரகம் பாதிக்க வாய்ப்பு உண்டு.

நீரிழிவுடன் இரத்த அழுத்தமும் இருந்தால், விரைவில் பாதிக்கும்.

அடையாளம்

சிறுநீரகம் ஒரே நாளில் பாதிக்கப்படுவதில்லை. பாதித்ததும் ஒரே நாளில் தெரியாது. கொஞ்சம் கொஞ்சமாக மாதக் கணக்கில் பாதிக்கும். திடீர் என்று ஒருநாள் சிறுநீரகம் வேலை செய்வது முற்றிலும் நின்றுவிடும்.

சில அறிகுறிகளைக் கொண்டு, சிறுநீரகம் பாதிக்கப்படுவதை முன்கூட்டியே உணர்ந்து கொள்ளலாம். இரவில் அடிக்கடி சிறுநீர் போகும். தொடை இடுக்கு, காலில் வியர்த்துக் கொட்டும். காலில் திடீர் திடீர் என்று சுளுக்கும் ஏற்படும். சிறுநீரில் அல்புமின், புரோட்டீன் ஆகியவை இருக்கும். இரத்த அழுத்தம் அதிகமாகும். இரத்தத்தில் அல்புமின் மிகக் குறைவாக இருக்கும். இரத்தத்தில் ய+ரியா, கிரிட்டின் ஆகியவை கூடுதலாக இருக்கும்.

காலையில் எழும்ப முடியாது. களைப்பாக இருக்கும். மயக்கம் வரும். வாந்தி வரும். மிகவும் சோர்வாக இருக்கும். வியர்த்துக் கொட்டும். எரிச்சல், கோபம் ஏற்படும். சோகை தோன்றும்.

பரிசோதனை

இந்த அறிகுறிகள் இருக்கும் போதே, மருத்துவரிடம் போய் சோதித்துக் கொள்வது நல்லது.

முதலிலேயே பார்த்து, வைத்தியம் செய்துகொண்டால், சிறுநீரகம் பாதிப்பதைத் தடுக்க முடியும்.

நீரிழிவு மாத்திரைகளைத் தொடர்ந்து பயன்படுத்துவதாலும், சிறுநீரகம் பாதிக்கப்படலாம். அப்போது மருத்துவர், மருந்துகளை மாற்றிக்கொடுப்பார். இன்சுலின் ஊசி போட்டுக்கொள்ள வேண்டியிருக்கும்.

மாற்று சிறுநீரகம்

இரண்டு சிறுநீரகமும் பாதிக்கப்பட்டுவிட்டால், மிகவும் தொல்லைப்பட வேண்டியிருக்கும்.

இரத்தத்தை சுத்தம் செய்வதுதான் சிறுநீரகத்தின் முக்கிய வேலை. இது தடைப்பட்டால், வாரம் ஒருமுறை மருத்துவமனைக்குப் போய், எந்திரம் வழியே சிறுநீரை சுத்தம் செய்துகொள்ள வேண்டியதிருக்கும்.

இதற்கு நிரந்தரதீர்வு, மாற்று சிறுநீரகம் வைத்துக் கொள்ளுவது தான். இது செலவு நிறைந்தது. அதன் பின் நீரிழிவு மாத்திரைகள் பயன்படுத்த மாட்டார்கள். இன்சுலின் ஊசி போட்டுக்கொள்ள வேண்டும்.

எதற்கு இந்தத் தொல்லை? வருமுன் காத்துக்கொள்ளுவது நல்லது. நீரிழிவைக் கட்டுக்குள் வைத்துக்கொள்ளுங்கள். இரத்தக் கொதிப்பைக் கட்டுப்படுத்துங்கள். ஆண்டுக்கு ஒரு முறையாவது இரத்தம், சிறுநீர், சிறுநீரகங்களை சோதித்துக் கொள்ளுங்கள்.