புதிய முதல்வரை தேர்ந்தெடுப்பதற்கான எம்எல்ஏக்கள் கூட்டம் ரத்து

**ந.கார்த்தி** · **ந.கார்த்தி** Sat Jul 30, 2011 4:36 pm

பெங்களூர் : கர்நாடக
முதல்வராக எடியூரப்பாவே நீடிக்க அனுமதிக்கும்படி அவருடைய ஆதரவு எம்.பி.,
எம்.எல்.ஏ.க்கள் போர்க்கொடி தூக்கியுள்ளனர். இதனால், புதிய முதல்வரை
தேர்ந்தெடுக்க நேற்று நடக்க இருந்த பா.ஜ. எம்.எல்.எ.க்கள் கூட்டம் ரத்து
செய்யப்பட்டது. கர்நாடகாவில் நடந்த சுரங்கத் தொழில் மோசடி பற்றி விசாரித்து
அறிக்கை அளித்த லோக் அயுக்தா, இந்த மோசடியில் முதல்வர் எடியூரப்பா, 4
அமைச்சர்கள், முன்னாள் முதல்வர் குமாரசாமி உள்ளிட்டோருக்கு தொடர்பு
இருப்பதாக குற்றம் சாட்டியுள்ளது.

இதைத் தொடர்ந்து, முதல்வர் பதவியில் இருந்து விலகும்படி எடியூரப்பாவை
பா.ஜ. மேலிடம் கேட்டுக் கொண்டது. அதன்படி, பதவியை ராஜினாமா செய்வதாக கூறிய
எடியூரப்பா, ஆதரவாளர்களுடன் தொடர்ந்து ஆலோசனை நடத்தி வருகிறார். நேற்று
அவர் அளித்த பேட்டியில், பதவியை நாளை ராஜினாமா செய்வதாக தெரிவித்தார்.
புதிய முதல்வரை தேர்ந்தெடுப்பதற்காக பெங்களூரில் பா.ஜ. எம்.எல்.ஏ.க்கள்
கூட்டம் நேற்று மாலை நடக்க இருந்தது.

இதை பார்வையிட மேலிடப் பார்வையாளர்களாக ராஜ்நாத் சிங், அருண் ஜெட்லி
வந்தனர். ஆனால், ‘எடியூரப்பாவுக்கு 75 எம்.எல்.ஏ.க்கள், 15 மக்களவை
எம்.பி.க்கள், 3 மாநிலங்களவை எம்.பி.க்கள் மற்றும் 20 எம்.எல்.சி.க்களின்
ஆதரவு உள்ளது. லோக் அயுக்தா கொடுத்த அறிக்கைக்காக அவரை முதல்வர் பதவியில்
இருந்து நீக்குவது கட்சி மேலிடம் பரிசீலனை செய்ய வேண்டும்’’ என்று அவருடைய
ஆதரவாளர்கள் வலியுறுத்தி உள்ளனர்.

மேலும், ராஜ்நாத் சிங், அருண் ஜெட்லியை சந்தித்த அவர்கள், முதல்வர்
மாற்றம் பற்றி எம்.எல்,ஏ.க்களிடம் தனித்தனியாக கருத்த கேட்க வேண்டும் என்று
வலியுறுத்தினர். இந்த குழப்பங்களின் காரணமாக, பெங்களூரில் நேற்று மாலை
நடைபெறுவதாக இருந்த எம்.எல்.ஏ.க்கள் கூட்டம் ரத்து செய்யப்பட்டது.
எடியூரப்பாவை ராஜ்நாத் சிங்கும், அருண் ஜெட்லியும் சமாதானப்படுத்தி
வருகின்றனர்.
tmt புதிய முதல்வரை தேர்ந்தெடுப்பதற்கான எம்எல்ஏக்கள் கூட்டம் ரத்து 678642