இலங்கை இன்னல்!

**பார்த்திபன்** · 24/07/2011

(இந்தக் கவிதை ஈழ்ப் போர் உச்சத்தில் இருந்தபோது எழுதப்பட்டது)

இலங்கை இன்னல்!

இந்தியத்தாயின் கழன்று விழுந்த சலங்கை
உலக வரைபடத்தில் அதுவே இலங்கை!

ராவணன் முதல் ராஜபக்சே வரை அங்கு
அரக்கர் கையில்தான் ஆட்சிப்பொறுப்பு!

தமிழனின் மரண ஓலமே அங்கு தேசிய கீதம்!
அழிந்து வரும் உயிரின வரிசையில் அங்கு
தமிழினமே முதலிடம்!

போர் என்ற பெயரில் அங்கு
தூர் வாரப்படுகிறது தமிழினம்!

அங்கு தமிழன் வாழ்வு
பதுங்கு குழியில் தொடங்கி,
சவக்குழியில் முடிகிறது!

விமானத்தாக்குதலால் விதவையானோர் பாதி
கொத்தெரி குண்டுகளால் குத்துயிரானோர் மீதி!

பீரங்கிகளுக்கு இரையாய் பிஞ்சுகளையும்,
இயந்திர துப்பாக்கிகளுக்கு இரையாய் இளைஞர்களையும்,
பறிகொடுத்து பறிகொடுத்தே பறிதவிக்கிறது நம்மினம்!

ஈழத்தமிழனின் மரணச்செய்தி ஒவ்வொன்றும்
உலகத்தமிழனின் காதுகளில் கன்னி வெடிகளாய் ஒலிக்கிறது!
அதுவே சிங்கள காதுகளில் மங்கள இசையாய் இனிக்கிறது!

இலங்கைத்தீவுப் பிரச்சனை கன்னித்தீவாய் தொடர்கிறது!
இதைக்கண்டு எங்கள் நெஞ்சில் கவலை ரேகை படர்கிரது!

வெட்டிபோட்ட விரகாய் அங்கு தமிழர் கூட்டம் மடிகிறது
கட்டிக்கொண்ட கைகளை நீட்ட இந்திய அரசு மறுக்கிறது!

இரக்கம் மறந்த இந்திய அரசே
உறக்கம் கலைந்து உடனே உதவு!

ஈழத்தமிழர் வாழும் பொருட்டு
ஆயுத உதவி அனைத்தும் நிறுத்து!

போலிச் சாக்கு கூறல் தவிர்த்து
போரை நிறுத்த குரலை உயர்த்து!

தட்டிக் கேட்க தமிழகம் உண்டு
தட்டிக் கழிக்கும் தவறை நிறுத்து!

- நிலவை.பார்த்திபன்

கண்ணன்3536 · கண்ணன்3536 Fri Jul 29, 2011 9:58 pm

ராவணன் தமிழன் என்பதனை கருத்தில் எடுக்கவும் .நல்ல கவிதை பகிர்ந்த்மைக்கு நன்றி

**பார்த்திபன்** · 24/07/2011

ராவணன் அரக்க குலத்தைச் சேர்ந்தவன் என்பதைத் தவிர தவறாக எதுவும் குறிப்பிடவில்லை நண்பரே. உங்கள் பாராட்டிற்கு என் சிரம் தாழ்ந்த நன்றிகள்!

கண்ணன்3536 · கண்ணன்3536 Sat Jul 30, 2011 7:54 pm

ராவணன் உண்மையில் தமிழன் .அது தான் உண்மை .அவன் அரக்கநல்ல.ஆரியர்கள் அவனை அரக்கனாக சித்தரித்துவிட்டார்கள் .நாங்கள் விழித்துக்கொள்ளவே இல்லை ,சீதைக்கு எந்த பாதிப்பும் ஏற்படவில்லையே நான் குறிப்பிட்டதான் நோக்கம் நாங்களே எமக்கு சேறு பூசக்கூடாது அவ்வளவே

கவினா · கவினா Sat Jan 21, 2012 5:08 pm

இந்தியத்தாயின் கழன்று விழுந்த சலங்கை
உலக வரைபடத்தில் அதுவே இலங்கை!

என்று அழகாக தொடங்கி
ஆழமாக பதிவு செய்துள்ளீர்கள்
இலங்கை தமிழின பிரச்சனையை.

வாழ்த்துக்கள் நண்பரே.

(கண்ணன் அவர்களின் கருத்து எனக்கும் சரியென்றே படுகிறது)

வாஞ்சையுடன் சுந்தரபாண்டி