பகிர்ந்து கொள்ள முடிவதில்லை...எல்லோருடனும்.

**rameshnaga** · **rameshnaga** Thu Jul 28, 2011 8:34 pm

வீடேறி வந்து பிச்சை கேட்கிறான் ...
'பிச்சைக் காரன்".

"இல்லை"-என்று சொல்லித்
திருப்பி அனுப்புகிறேன்..நான்.

திரும்பும் "பிச்சைக்காரன்"
தானமாகத் தந்துவிட்டு செல்கிறான்..
எனக்கு-
அவனது பெயரின் "அடை மொழியை".
****************************************

கரையில் இருக்கும் மனித முகங்களை
வித்தியாசப் படுத்தத் தெரிவதில்லை..
குளத்தில் குதிக்கும் மீன்களுக்கு.

தனக்கு "பொரி போட்டவனைத்" தேடி
நன்றி சொல்லக் குதித்துக் கொண்டிருக்கின்றன..
நீண்ட நேரமாய்.
***************************************

இரவில் கண் விழித்து
கவிதை எழுதுகையில்..
அப்பாவின் குரல் நீளும்..
"ஏதாச்சும் உருப்படற வழியைப் பாரு"-என.
அம்மாவின் கண்களில் திரளும் கண்ணீர்
எனக்குத் தெரியாமலேயே அழித்துவிடும்
என் கவிதையை.
இப்படித்தான்-
காதலைப் போலவேதான் கவிதையும்..
பகிர்ந்துகொள்ள முடிவதில்லை
எல்லோரோடும்.