கல்லூரி மாணவி முகத்தில் ஆசிட் வீசியவருக்கு 10 ஆண்டு சிறை

புதன்கிழமை, 27, ஜூலை 2011 (8:37 IST)



கல்லூரி மாணவி முகத்தில் ஆசிட் வீசியவருக்கு 10 ஆண்டு சிறை


சென்னை திருவான்மியூர் பகுதியை சேர்ந்தவர் சுந்தரம். இவரது மகள் சரண்யா (20)அங்குள்ள ஒரு பள்ளியில் பிளஸ்-2 படித்து வந்த போது அதே பகுதியை சேர்ந்த ஏழுமலை மகன் ராமஜெயம் (26) என்பவருடன் காதல் ஏற்பட்டது.


இதனை அறிந்த சரண்யாவின் பெற்றோர் அவரை திருச்சி கல்லுக்குழி கள்ளர் தெருவில் உள்ள தாத்தா பிச்சை வீட்டுக்கு அனுப்பி வைத்தனர். திருச்சியில் உள்ள ஒரு கல்லூரியில் சரண்யா மூன்றாம் ஆண்டு படித்து வந்தார்.

சரண்யா திருச்சியில் தாத்தா வீட்டில் தங்கி இருந்து படித்து வருவதை அறிந்த ராமஜெயம் திருச்சிக்கு வந்து மீண்டும் அவரை காதலிக்க தொடங்கினார். ராமஜெயத்தின் நடவடிக்கைகளை விரும்பாத சரண்யா இதுபற்றி தனது பெற்றோரிடம் தெரிவித்தார்.

இதனை தொடர்ந்து சரண்யாவின் பெற்றோர் ராமஜெயத்தை சென்னைக்கு அழைத்து தனது மகளை காதலிப்பதை கைவிடும்படி எச்சரிக்கை செய்து அனுப்பினர்.


இந்நிலையில் கடந்த 27-4-2010 அன்று ராமஜெயம் திருச்சிக்கு வந்தார். கல்லுக்குழி பகுதியில் உள்ள ஒரு கோவில் முன் நின்று கொண்டு சரண்யாவை செல்போன் மூலம் அழைத்தார். தான் நிற்கும் இடத்திற்கு வந்தால் காதலை முறித்துக்கொள்வதாகவும், காதல் தொடர்பான கடிதங்களை ஒப்படைப்பதாகவும் கூறினார்.

இதைத்தொடர்ந்து சரண்யா தனது சித்தியுடன் ராமஜெயம் கூறிய இடத்திற்கு சென்றார். அப்போது பையில் வைத்திருந்த கடிதங்களை எடுத்து கொடுப்பது போல் நடித்த ராமஜெயம் திடீர் என பாட்டிலில் வைத்து இருந்த `ஆசிட்'டை எடுத்து சரண்யாவின் முகத்தில் ஊற்றினார்.


இதில் சரண்யாவின் முகத்தின் ஒரு பகுதி, தலை, காது, கழுத்து, முதுகு ஆகிய பகுதிகள் வெந்து கருகின. இதையொட்டி கண்டோன்மெண்ட் போலீசார் ராமஜெயத்தை கைது செய்து திருச்சி மகளிர் நீதிமன்றத்தில் வழக்கு தொடர்ந்தனர்.


இந்த வழக்கை நீதிபதி எம். மாயாண்டி விசாரித்து குற்றம் சாட்டப்பட்ட ராமஜெயத்துக்கு கொலை முயற்சி சட்டபிரிவின் 10 ஆண்டு கடுங்காவல் ஜெயில் தண்டனையும், 10 ஆயிரம் ரூபாய் அபராதமும், பெண்களுக்கு எதிரான வன்கொடுமை சட்டத்தின் கீழ் 2 ஆண்டு ஜெயில் தண்டனையும், ரூ. 5 ஆயிரம் அபராதமும் அபராதம் கட்டத்தவறினால் மேலும் 3 மாதங்கள் ஜெயில் தண்டனையும், சிறைத்தண்டனைகளை ஏக காலத்தில் அனுபவிக்கவேண்டும் என்றும் உத்தரவிட்டு தீர்ப்பு கூறினார்.

காதல் என்றால் என்னவென்று தெரியாதவனெல்லாம் காதலித்தால் இப்படி தான்

எல்லாத்தையும் தனித்தனியே கொடுத்து அவனை உள்ளேயே வைதிருக்கவேண்டும் ...

பாவம் அந்த பெண்