எல்லாமே தவறாகிப் போனது! தோல்வி குறித்து தோனி புலம்பல்..!

**ரா.ரமேஷ்குமார்** · 23/01/2011

லண்டன்:"ஜாகிர் கான், காம்பிர் காயம், சச்சின் உள்ளிட்ட முன்னணி வீரர்கள் ரன்கள் சேர்க்க முடியாமல் போனது என, எல்லாமே தவறாகிப் போனதால், இந்திய அணி முதல் டெஸ்டில் தோல்வியடைய நேரிட்டது,'' என, இந்திய அணி கேப்டன் தோனி புலம்பியுள்ளார்.
இங்கிலாந்து சென்றுள்ள இந்திய அணி நான்கு போட்டிகள் கொண்ட டெஸ்ட் தொடரில் பங்கேற்கிறது. லண்டன், லார்ட்சில் நடந்த முதல் டெஸ்ட் போட்டியில் இந்திய அணி மோசமாக தோல்வியடைந்தது.

எல்லாமே தவறாகிப் போனது! தோல்வி குறித்து தோனி புலம்பல்..! Dhoni_80_80

இதுகுறித்து இந்திய அணி கேப்டன் தோனி கூறியது:
கடந்த 2007 தொடரின் போது இருந்ததை விட, இம்முறை லார்ட்ஸ் ஆடுகளத்தில் வழக்கத்துக்கு மாறாக பந்துகள் அதிகளவிலும், ஒவ்வொன்றும் வித்தியாசமாகவும் "பவுன்ஸ்' ஆனது. இதை கணித்து விளையாடுவது சிரமமாகி போனது. 2007ல் நான் விக்கெட் கீப்பராக இருந்தேன். அப்போது ஜாகிர் கான் பவுலிங் செய்யும் போது, 3 மீ., தூரம் பின்னால் தள்ளி நின்றிருந்தேன்.
இப்போது இவரது பவுலிங்கில், இதே அளவு தூரம் முன்னால் வந்து நிற்க வேண்டியது இருந்தது. இம்முறை ஒவ்வொரு பந்துகளும் வெவ்வேறு அளவுகளில் வந்தது. சில பந்துகள் அளவுக்கு சற்று குறைவாக வந்ததால், இவற்றை பிடிக்கவே முடியவில்லை. இதனால் தான் பேட்ஸ்மேன்களால் சாதிக்க முடியவில்லை.
எல்லாமே தவறானது:
போட்டி துவங்கிய நிலையில், சீனியர் வீரர் சச்சின் காய்ச்சலால் அவதிப்பட்டது, காம்பிர், ஜாகிர் கான் காயமடைந்தது என எல்லாமே தவறாகி போனது. இதனால் இரண்டாவது இன்னிங்சில் டிராவிட் துவக்க வீரராக களமிறங்க நேரிட்டது. பேட்ஸ்மேன்கள் வழக்கத்துக்கு மாறாக தங்களது இடத்தில் இருந்து, மாறி விளையாடுவது என்பது மிகவும் சிரமமானது. இதனால் சச்சின், காம்பிர், டிராவிட் ஆகியோர் தங்களது வழக்கமான ஆட்டத்தை வெளிப்படுத்த முடியாமல் போனது.
அதிக பாதிப்பு:
ஜாகிர் கான் இல்லாத நிலையில், மூன்று பவுலர்களை கொண்டு சமாளிக்க நேரிட்டது. இதனால் மற்றபவுலர்களை சரியாக பயன்படுத்துவதில் சிக்கல் ஏற்பட்டது. பந்துகளில் அதிக திருப்பம் ஏற்படாத நிலையில், மூன்று பவுலர்களை வைத்துக்கொண்டு அதிகம் திட்டமிட முடியாது. ஒருவேளை கூடுதலாக ஒரு பவுலர் இருந்திருந்தால், அனைத்துமே மாறியிருக்கும்.
முன்னதாக தெரியாது:
ஜாகிர் கான் காயத்தை முன்னதாகவே கணிக்கவில்லை என்பது தவறு. ஏனெனில் தொடையின் பின்பகுதியில் ஏற்படும் காயம் என்பது வித்தியாசமான ஒன்று. அதாவது ஓடிவந்து பந்துவீசிய பிறகுதான் இது ஏற்படும். அதுவரை எதுவும் தெரியாது. சச்சின் தனது காய்ச்சலில் இருந்து மீண்டுள்ளார்.
ஆனால் 100 சதவீதம் சரியாகிவிட்டார் என்று சொல்லமுடியாது. காய்ச்சலுடன் இரு இன்னிங்சிலும் விளையாடிய அவர், சற்று பலவீனமாகத்தான் இருந்தார். எப்போதெல்லாம் அதிக ஸ்கோர் செய்ய முடியாதோ, அப்போதெல்லாம் வருத்தப்படுவார். இம்முறையும் மிகவும் ஏமாற்றத்துடன் தான் இருந்தார்.
விரைவில் மீள்வோம்:
இங்கிலாந்து வீரர் பிராட், சரியான அளவில் பவுலிங் செய்து மிரட்டினார். தவிர, பேட்டிங்கி<லும் அசத்தினார். இவரும், பிரையரும் சேர்ந்து "பார்ட்னர்ஷிப்' அமைத்து சேர்த்த ரன்களால் தான் போட்டியின் முடிவு மாறிவிட்டது.
இத்தொடரில் இன்னும் மூன்று போட்டிகள் மீதமுள்ளன. பேட்ஸ்மேன்களும், பவுலர்களும் தங்களது குறைகளை சரிசெய்து, ஆட்டத்தில் முன்னேற்றம் காண்பார்கள் என்ற நம்பிக்கை உள்ளது. இதனால் மீதமுள்ள போட்டிகளில் வெற்றிபெற முயற்சிப்போம்.
இவ்வாறு தோனி கூறினார்.
--
ஜாகிர் கான் ஓய்வு
காயம் காரணமாக அடுத்த டெஸ்டில் ஜாகிர் கான் பங்கேற்க மாட்டார் என்று தெரிகிறது. இதுகுறித்து தோனி கூறுகையில்,"" இரண்டாவது டெஸ்ட் போட்டி வரும் 29ம் தேதி துவங்கவுள்ள நிலையில், ஜாகிர் கான் விளையாடுவாரா இல்லையா என்பது குறித்து 100 சதவீதம் உறுதியாக சொல்லமுடியாது. இன்னும் நிறைய போட்டிகளில் அவர் பங்கேற்க வேண்டும். ஒருவேளை அவர் விளையாட விரும்பினாலும், ஒரு போட்டிக்காக நாங்கள் "ரிஸ்க்' எடுக்க விரும்பவில்லை,'' என்றார்.
--
ரெய்னா அபாரம்
சமீபத்தில் முடிந்த வெஸ்ட் இண்டீஸ் அணிக்கு எதிரான மூன்று டெஸ்டில் இந்திய அணியின் ரெய்னா, மூன்று அரைசதம் (82, 53, 50 ரன்கள்) அடித்து இருந்தார். இப்போது தொடர்ந்து நான்காவது முறையாக லார்ட்ஸ் டெஸ்டில் அரைசதம் (78) அடித்து அசத்தியுள்ளார்.