தாமரையைக் காணவில்லை!!

ஆண்டு விடுமுறை!!

வீட்டில் சும்மா இருக்க பிடிக்கவில்லை. ஏதாவது உருப்படியாக படிக்கலாம் என்று தோன்றியது.


"கம்ப்யூட்டர்ல எதாவது படித்தால் பின்னாளில் பயன்படும்" என்று அறிவுரை கூறினார்கள்!!

அப்போது கணிணி பரவலாக பிரபலமடைய துவங்கி இருந்த காலம்...
எனது வீட்டின் அருகிலும் ஒரு கணிணி மையம் முளைத்து இருந்தது.
அங்கு சென்று எதாவது படிக்கலாம் என்று நினைத்தேன்..

"இங்க கம்ப்யூட்டர் சம்பந்தமாக நிறைய சொல்லிக் கொடுக்கிறோம்ங்க.. டாஸ்,
லோட்டஸ், வேர்ட் ஸ்டார்.." என்று அடுக்கிக் கொண்டே போனார் நிறுவனர் .

"இதில் எதைப் படித்தால் பின்னாளில் நல்ல எதிர்காலம்?" என்று அப்பாவியாய்க் கேட்டேன்!

"எதைப் படித்தாலும் உங்க எதிர்காலம் ஒளிமயமாய் இருக்கும்"

பள்ளியில் நடத்தப்பட்ட சிறப்பு கணிணி பயிற்சியில் "டாஸ்" படித்து இருந்தேன்..

"லோட்டஸ் என்றால் என்ன சார்?"

"அது ஒரு ஸ்ப்ரெட் சீட் தம்பி. டேட்டா வச்சு நிறைய கணக்குகளை எளிதா போடலாம். நம்ம டேட்டாவை வச்சு கிராப் கூட வரையலாம்"

வேர்ட் ஸ்டார் என்பது தட்டச்சு செய்ய உதவும் ஒரு மென்பொருள் என்று சொல்லப்பட்டது!

'தட்டச்சு செய்வதற்கெல்லாம் பின்னாளில் கம்பியூட்டர் பயன்படாது.... அதனை
வைத்து பெரிய பெரிய கணக்குகள் தான் போடுவார்கள்' என்று தோன்றியது.

"நான் லோட்டஸ் படிக்கிறேன்" என்று சேர்ந்தேன்!!

சேர்ந்த பின்னர் அதன் பெயர் Lotus 1-2-3 என்று அறிந்து கொண்டேன். முதலில் எளிமையான கணக்குகள் மூலம் துவங்கிய கற்றல் ஒரு மாதத்திற்குள் அதில் வல்லவனாக்கியது.
அந்த மென்பொருளில் எந்த பணியையும் செய்யும் திறம் வாய்த்தது !!


நான் மிகவும் பாடுபட்டு கற்ற மென்பொருள் ஆகையால், எனக்கு லோட்டஸின் மீது ஒரு தனி ஈர்ப்பு உண்டு..

ஒரு வருடம் கழிந்தது..
வேறொரு மையத்தில் சேர்ந்தேன்.. அங்கு எனக்கு விண்டோஸ் மற்றும் "MS Office" ஐ
அறிமுகப்படுத்தினர். அதில் உள்ள வேர்ட், எக்சல், பவர்பாயிண்ட் என்று
பலவும் அறிமுகம் செய்து வைக்கப்பட்டது!!
எக்சல் ஒரு ஸ்ப்ரெட் சீட் என்று சொல்லிய போது, எனக்கு உடனே லோட்டஸ் ஞாபகம் வந்தது.. எக்சல் அதற்கு இணையாக வருமா என்று தோன்றியது..

"இங்க லோட்டஸ் இருக்கா சார்?" என்று கேட்டேன்

"இல்ல தம்பி." என்று பதில் வந்தது.

நான் கற்ற மென்பொருள் இல்லை என்ற போது, வருத்தம் வந்தது. கூடவே, 'என்னடா..
லோட்டஸ் என்ற பெரிய சாப்ட்வேர் பற்றி தெரியாமல் இருக்கிறார்களே!!' என்று
தோன்றியது

சில வருடங்களுக்குப் பின்..
கல்லூரியில் முதல் கணிணி வகுப்பு

"இங்க யாரெல்லாம் முன்னாடியே கம்ப்யூட்டர் படித்து இருக்கீங்க?" என்று கேட்டார் கணிணி ஆசிரியர்.

கையை உயர்த்தியவர்களுள் நானும் ஒருவன்.


"உனக்கு என்ன தெரியும்?"

"சார்.. டாஸ், விண்டோஸ், ஆபிஸ்"

"இது நிறைய பேருக்குத் தெரியும். ஸ்பெ ஷலாக என்ன தெரியும்? "

"லோட்டஸ்" என்றேன்..

கையைத் தூக்கி இருந்த மற்றவர்கள் விழுந்து விழுந்து சிரித்தனர்!!

"அதெல்லாம் outdate ஆகிடுச்சுப்பா!! சரி.. உட்கார்!!"

எனக்கு அதிர்ச்சியாக இருந்தது.. அத்தனை வசதிகள் கொண்டிருந்த ஒரு மென்பொருள் எப்படி காலாவதி ஆகும்?

எப்படியாவது லோட்டஸ் பயன்படும் இடத்தைக் கண்டு பிடித்து அவரிடம் காட்ட வேண்டும் என்று தோன்றியது..
அன்றிலிருந்து காணும் அனைத்து கணிணிகளிலும் லோட்டஸ் இருக்கிறதா என்று தேடுவது ஒரு வேலையாகி விட்டது..

சில நாட்களுக்கு முன் எங்கள் அலுவலகத்தில் வாங்கிய முதல் கணிணியைப் பற்றிய பேச்சு வந்தது..

அதனை விவரிக்கும் போது ஒருவர் "அது ரொம்ப பெருசுங்க.. அதுக்காகவே ஒரு ஏசி
ரூம் இருந்தது.. அதுல இருந்த வேர்ட் ஸ்டார்ல தான் ரிப்போர்ட் அடிப்போம்..
அப்புறம், கிராப் போட ஒண்ணு இருந்தது..ஆங்.. லோட்டஸ்!!'



என் புருவங்கள் உயர்ந்தது..

"அந்த கம்ப்யூட்டர் இப்ப எங்க இருக்கு சார்?"

"அது ரொம்ப பழசுங்க.. எல்லாத்தையும் தூக்கிட்டாங்க.. தெரியல"

வருடங்கள் பலவாகி விட்ட போதும்.....
இன்னும் தேடிக் கொண்டு தான் இருக்கிறேன்!!
இன்றும் நான் கற்ற 'தாமரையை" எங்கும் காணவில்லை!!

நிறைய மென்பொருள் இப்பொழுது பிளாஸ்டிக் பை போல தூக்கி எறியும் பொருளாக தான் இருக்கிறது

இது தான் வளர்ச்சி...
வளர்ச்சியுடன் வளரவில்லை எனில்
நம்மையும் தூக்கி போட்டுடுவாங்க - இதுவே
இன்றைய நிலை - மனதை தேற்றிக் கொள்ளுங்கள் தாமரை மணாளனே...

.

இப்போ சன் microsystem - தின் லோட்டஸ் ஐ பயன்படுத்துங்கள் ..( இது இமெயில் வசதிக்கு!)

Qbasic GWbasic Wordstar Dbase Foxpro போன்றவற்றின் நிலையும் இப்படியே ஏனெனில் இவை சமகால மென்பொருட்கள்

pgasok wrote:Qbasic GWbasic Wordstar Dbase Foxpro போன்றவற்றின் நிலையும் இப்படியே ஏனெனில் இவை சமகால மென்பொருட்கள்

மிகவும் சரி!!

காலத்தின் வேகத்தைப் போலவே தான் மென்பொருட்களும்..
அவற்றின் வளர்ச்சியும் மறைவும் விரைவாக நடக்கிறன.

சிறிது காலம் முன்பு பயன்படுத்திய பல மென்பொருட்கள் "காணாமல் போனவை" பட்டியலில் இடம் பெற்று விட்டன.
இன்று நான் பயன்படுத்துபவற்றில் சிலவும் நாளை அப்படி ஆகலாம் என்பதில் ஐயமேதும் இல்லை...

கருத்துரைத்த அனைவருக்கும் நன்றிகள் !

பாவம் தாமரை

அதுனாலத்தான் நான் கணினி கற்க்காமல் காலத்தை கற்றேன் அதுனால எது புதுசா வந்தாலும் என்னை தயார் செய்துகொள்ள முடிகிறது