சச்சினுக்கு பாரத ரத்னா விருது கிடைக்க வாய்ப்பு

**இளமாறன்** · **இளமாறன்** Sat Jul 23, 2011 4:10 pm

புதுடில்லி: இந்திய கிரிக்கெட் நட்சத்திர நாயகன் ரசிகர்களின் மனதில் நீங்கா இடம்பெற்ற சச்சினுக்கு பாரத ரத்னா விருது கிடைக்க வாய்ப்பு இருப்பதாக டில்லி வட்டாரம் தெரிவிக்கிறது. விளையாட்டு துறையினருக்கு இந்த உயரிய பாரத ரத்னா விருது வழங்கப்படாமல் இருப்பது பெரும் குறையாக உள்ளது என்றும் எனவே பாரத ரத்னா பெறுவோர் தேர்வுக்கு விளையாட்டு துறையில் ஆற்றும் பணியையும் சேர்க்க வேண்டும் என்ற பரிந்துரை பிரதமர் அலுவலகத்திற்கு அனுப்பி வைக்கப்பட்டுள்ளது. சச்சினை கருத்தில் கொண்டே இந்த திருத்தம் கொண்டு வர மத்திய அரசு விரும்புவதாக தெரிகிறது.

இந்தியாவின் மிக உயரிய விருதாக மதிக்கப்படுவது பாரத்ரத்னா. மக்களுக்கு சமூக சேவையாற்றுவோர், கலை, இலக்கியம் மற்றும் அறிவியலில் தங்களுடைய பங்கை அளித்த சிறந்தவர்கள், இந்த விருதுக்கு தேர்வு செய்யப்பட்டு வந்தனர். வாழும்போதும், மறைந்த பின்னர் சிலரது பணியை பாராட்டியும் இந்த விருது வழங்கப்பட்டு வருகிறது.

இந்நிலையில் மத்திய அமைச்சர் மாக்கான் தலைமையிலான விளையாட்டு துறை அமைச்கம் விரும்புதலின்பேரில் மத்திய உள்துறை அமைச்சகம் பிரதமர் அலுவலகத்திற்கு ஒரு கடிதம் அனுப்பி வைத்துள்ளது. இதில் விளையாட்டு துறையில் தங்களுடைய திறமையை கொடுத்து பங்காற்றும் வீரர்களுக்கும் முக்கியத்துவம் அளிக்கப்பட வேண்டும். பாரதரத்னா தேர்வுக்கான விதிமுறையில் மாற்றம் கொண்டு வரவேண்டும் என்றும் கோரப்பட்டுள்ளது.

கிரிக்கெட் விளையாட்டில் சச்சின ஆற்றிய பங்கு பாராட்டத்தக்கது, அவர் பாரதரத்னா விருதுக்கு தகுதியுள்ளவர் என்றும் மும்பை கிரிக்கெட் அசோசியேஷன் தலைவராக பொறுப்பேற்ற மத்திய அமைச்சர் விலாஸ்ராவ் தேஷ்முக் கூறியிருந்தார். மேலும் அவர்கூறுகையில் இது தொடர்பாக பிரதமரிடம் பேசுவேன் என்றார். இந்நிலையில் மத்திய உள்துறை அமைச்சக பரிந்துரை மூலம் கிரிக்கெட் ரசிகர்களின் ஆசைநாயகன் சச்சினுக்கு பாரத ரத்னா விருது கிடைக்கும் என்ற நிலை நெருங்கி விட்டதாகவே கருதப்படுகிறது.

இதுவரை இந்த விருது பெற்ற பெருமைக்குரியவர்கள் : தமிழகத்தை சேர்ந்த சர்வபள்ளி ராதாகிருஷ்ணன்( 1954 ) , ராஜகோபாலாச்சாரி( 1954 ) , ஜவஹர்லால்நேரு( 1955 ) , டாக்டர் ராஜேந்திரபிரசாத் ( 1962) , இந்திரா (1971) , காமராஜ் (1976), அன்னைதெரசா (1980), எம்.ஜி.ஆர்., (1988) , நெல்சன்மன்டேலா (1990), ராஜிவ்(1991) , சத்தியஜித்ரே ( 1992), வல்லபாய் பட்டேல், அம்பேத்கர், லதாமங்கேஷ்கர், பிஸ்மில்லாகான், எம்.எஸ்., சுப்புலட்சுமி, அப்துல்கலாம், பண்டிட் ரவிசங்கர், ஜெயப்பிரகாஷ் நாராயணன், சிதம்பரம் சுப்பிரமணியம், பண்டிட் பீம்சன் குருராஜ் ஜோஷி உள்ளிட்டோர் இது வரை பாரதரத்னா பெற்றவர்களில் முக்கிய நபர்கள் ஆவர்.