பூச்சிக் கடி

சுரேஷ்குமார் · 18/05/2011

பூச்சிக் கடி என்பது நம் வாழ்வில் நிச்சயம் நிகழ்ந்த, நிகழும் சம்பவமாகும். இயற்கைச் சூழல் நிறைந்த கிராமப் புறங்களில் மட்டுமின்றி, நகரத்து வாழ்க்கையிலும் நாம் பலர் பூச்சிக் கடிக்கு ஆளாகிறோம். வீடுகளில் கூட நம்மை சில பூச்சிகள் கடித்து, நம்மை பயமுறுத்து கின்றன. மூட்டைப் பூச்சி, கொசு, எறும்பு, தீ எறும்பு, தேனீ, சிலந்தி, கரப்பான், குழவி, கருவண்டு எனப் பலவகையான பூச்சிகள் நம்மைச் சுற்றி இருந்து கடிக்கின்றன.
நம்மை ஒரு பூச்சி கடித்து விட்டதென்றால், நமக்கு அனுதாப வார்த்தை கூறும் சிலர், ""இதென்ன பூச்சிக் கடி? போன வருஷம் என் மாமா மகனை, மலை ஏறும்போது என்னன்னே தெரியாத பூச்சி கடிச்சு, மூன்று மாதம் வீங்கிய கால், கை மூஞ்சியுடன் இருந்தான்னா பார்த்துக்கயேன்'' என்று கூறுவார்கள். (சொல்பவரே அவரைப் பார்த்திருக்க மாட்டார் என்பதெல்லாம் தனிக்கதை) இது நம் கடி வலியை, எரிச்சலைக் குறைப்பதற்காக என்று எடுத்துக் கொள்ளலாம். அதே போல பல வகையான பூச்சிக் கடிகள் குறித்த தகவலை, பாதிக்கப்பட்டவர்களின் பாதிப்புகளை, போட்டோக்களுடன் போட்டு வைத்துள்ளது ஓர் இணைய தளம். இதன் முகவரி http://www.mybugbites.com/. இதில் சென்றால் பிளாக்ஸ் போல பல தகவல் கட்டுரைகள் உள்ளன. வலது பக்கம் இந்த பூச்சிக் கடிகளை வகைப் படுத்தியும் கட்டுரைகள் உள்ளன. மூட்டுவலிக்கு ஒரு வகை எட்டுக் கால் பூச்சியின் கடி நல்லது என்று ஒரு கட்டுரையும் உள்ளது. ஒருமுறை சென்று பார்த்தால், பூச்சிக் கடி சாதாரணமாகவே தோன்றும்.