குடும்ப கட்டுப்பாடு சிகிச்சையில் தவறு நடக்க வாய்ப்பு உள்ளது ?

கு.க., அறுவைக்குப் பின், குழந்தை பெற்ற பெண்ணுக்கு ரூ.1.08 லட்சம் இழப்பீடு வழங்க,
கீழ் கோர்ட் அளித்த தீர்ப்பை, கோவை விரைவு கோர்ட் ரத்து செய்தது. பொள்ளாச்சி, கோட்டூரைச் சேர்ந்தவர் நடராஜ், 38; கூலித் தொழிலாளி. இவரது மனைவி சுமதி, 32. இரண்டாவது பிரசவத்துக்காக 1997, டிச., 22ல் கோட்டூர் அரசு மருத்துவமனையில் அனுமதிக்கப்பட்டார். அன்றே சுகப்பிரசவமாகி, பெண் குழந்தை பிறந்தது. அடுத்தடுத்து இரண்டு குழந்தைகளும் பெண்ணாக பிறந்ததால், குடும்பக் கட்டுப்பாடு அறுவை சிகிச்சை செய்து கொள்ள முடிவெடுத்தார் சுமதி. பரிசோதனைகளுக்குப் பின், 1997, டிச., 25ல் சுமதிக்கு கு.க., அறுவை செய்யப்பட்டது. இதன்பின், 1999ல் சுமதி மீண்டும் கர்ப்பமானார். கு.க., செய்த பின்பும் கர்ப்பமானதால் அதிர்ச்சி அடைந்தார். ஆனாலும், கர்ப்பத்தை கலைக்கவில்லை. 2000, மார்ச் 3 அன்று அதே மருத்துவமனையில் அனுமதிக்கப்பட்டு, ஆண் குழந்தை பெற்றெடுத்தார்.



"கு.க., அறுவை சிகிச்சைக்குப் பிறகும் கர்ப்பம் அடைந்ததற்கு டாக்டரின் தவறான சிகிச்சையே காரணம். இத்தவறுக்கு இழப்பீடாக மூன்று லட்சம் ரூபாய் தர வேண்டும்' என, பொள்ளாச்சி சார்பு கோர்ட்டில் சுமதி சார்பில் வழக்கு தொடரப்பட்டது. தமிழக தலைமைச் செயலர், மருத்துவம் மற்றும் குடும்ப நலத்துறை இணை இயக்குனர், கோட்டூர் அரசு மருத்துவமனை தலைமை டாக்டர், கு.க., அறுவை சிகிச்சை மேற்கொண்ட டாக்டர் மாரியம்மாள் ஆகியோர் குற்றம் சாட்டப்பட்டனர்.

வழக்கை விசாரித்த கோர்ட், " கு.க., அறுவை சிகிச்சையில் தவறு நடந்துள்ளது. எனவே, மீண்டும் கர்ப்பம் அடைந்த சுமதிக்கு 1.08 லட்சம் ரூபாய் இழப்பீடு வழங்க வேண்டும்' என, தீர்ப்புக் கூறியது. இத்தீர்ப்பை எதிர்த்து, கோவை மாவட்ட நீதிமன்றத்தில் அரசு தரப்பில் மேல்முறையீடு செய்யப்பட்டது. இவ்வழக்கு, இரண்டாவது விரைவு கோர்ட் நீதிபதி அலமேலு நடராஜன் முன்னிலையில் விசாரணைக்கு வந்தது.

அரசு தரப்பில் அரசு பிளீடர் அருள்மொழி ஆஜராகி, "இரண்டாவது குழந்தைக்குப் பின் கு.க., அறுவை செய்து கொண்ட சுமதி, அரசு வழங்கிய ஊக்கத் தொகை மற்றும் பரிசுப் பொருள்களை பெற்றுள்ளார். இரு பெண் குழந்தைகளுக்கு அரசு வழங்கும் பரிசுத்தொகை 5,000 ரூபாயையும் பெற்றுள்ளார். மூன்றாவது குழந்தை தேவை இல்லை என அவர் முடிவு செய்திருந்தால், 20 வாரங்களில் கருவை கலைத்திருக்கலாம். இதற்கு சட்டம் இடம் கொடுக்கிறது. அதையும் செய்யவில்லை.

கு.க., சிகிச்சையில் 5 சதவீதம் தவறு நடக்க வாய்ப்பு உள்ளது. உடலில் ஏற்படும் வளர்ச்சி காரணமாக, கு.க., அறுவைக்குப் பின்னும், கருக்குழாய் வளர்ச்சிக்கு வாய்ப்பு உண்டு. எல்லாவற்றுக்கும் மேலாக, டாக்டர்கள் மீது நேரடியாக வழக்கு தொடர முடியாது. மெடிக்கல் போர்டுக்கு அனுப்பி முடிவு கிடைத்த பிறகே, வழக்கு தொடர முடியும். இந்த வழக்கில் அந்த நடைமுறை காணப்படவில்லை. கு.க., செய்வதன் மூலம் அரசு தரும் சலுகைகளை பெற்றுக் கொண்டு, அரசு மருத்துவத்துறை மீது புகார் தெரிவிப்பது நியாயமில்லை' என, வாதிட்டார். நீதிபதி அலமேலு நடராஜன், இரு தரப்பு வாதத்தைக் கேட்டு, கீழ் கோர்ட் உத்தரவை ரத்து செய்து உத்தரவிட்டார்.

gm