பாப்பா போட்ட தாப்பா..!

**Tamilzhan** · **Tamilzhan** Wed Sep 16, 2009 1:51 pm

உட்புறம் தாளிடப்பட்ட அந்த அறைக்குள் யார் இருக்கிறார்கள் என்று யாருக்கும் தெரியவில்லை.

கதவை இடி இடியென்று இடித்து ‘யாரு உள்ளே?’ என்று கேட்டு எல்லாரும் அலுத்துப் போனார்கள். தலைகளை எண்ணிப்பார்த்த சுகுமார்,

“ரமாவைத்தான் காணும். அவளாத்தான் இருக்கும். நாளைக்கு அவளுக்குக் கல்யாணம். இப்பப் போய் உள்ளே கதவைத் தாப்பா போட்டுக்கிட்டு திறக்கவும் திறக்காம, பதிலும் சொல்லாம இருந்தா டென்ஷனா இருக்கே…” என்றான்.

ராணுவத்தில் பணி புரிந்து தன்னிச்சை ஒய்வு வாங்கிக் கொண்ட சுந்தரம் சாதனைக்கு முன் வந்தார்.

பாயப் போகிற புலி மாதிரி பதினைந்து அடி பின்னால் போனார். ஓஓஒடி வந்து தோள் பட்டையால் கதவை இடித்தார். மடேரென்று கதவு திறந்து கொண்டு உள்ளே போய் இசகு பிசகாக விழுந்து வாரினார். விளக்கில்லாத அந்த அறையில் அவர் எங்கே விழுந்தார் என்று தெரியாமல், அவரைத் தொடர்ந்து போனவர்கள் எகிடு தகிடாக அவரை மிதித்து அவர் லபோ திபோவேன்று அலறினார்.

“எங்கே ரமா?” என்று மாறி மாறி எல்லாரும் கேட்டுக் கொண்டிருக்க,

பின்னாலிருந்து “நான் இங்கே இருக்கேன்” என்று அமைதியாகக் குரல் கேட்டது.

ரமா!

“கைலே மருதாணி வெச்சிருந்ததாலே கதவை திறக்க முடியல்லே. அந்த ரூமுக்கு இன்னொரு கதவு இருக்கு. அது ஸ்டோர் ரூம் பக்கமா இருக்கு. அது திறந்தேதானே இருந்தது?”

எழுத்து ; ஜவஹர்