கவிதையால் ஒரு போராட்டம்!

இலக்கியப் படைப்புகள் குறிப்பிட்ட இலக்கினையும் ஆற்றலையும் உடையன. நன்நோக்கமும் நற்சிந்தனையும் கொண்ட இலக்கியப் படைப்புகள் புதிய புதிய ஆக்கங்களுக்கு வழிவகுக்கின்றன. இதற்குரிய சான்றுகள் பல உள்ளன. கடந்த 9.7.2011-இல் நடைபெற்ற பெர்சே 2.0 பேரணிக்காக தேசிய இலக்கியவாதி ஏ.சமாட் சையிட் அவர்கள் இயற்றிய கவிதை பொருள் பொதிந்ததாகும். கடந்த 19.6.2011-இல் பெர்சே 2.0 பேரணிக்கான தொடக்கக் கூட்டம் கோலாலம்பூரில் நடைபெற்றது. அக்கூட்டத்தில் கலந்துக் கொண்ட ஏ.சமாட் சையிட் அவர்கள் உரையாற்றி “உங்குன் பெர்சே” என்னும் தலைப்பிலான கவிதையையும் படைத்தார். மக்களின் சிந்தனையையும் உணர்வினையும் தூண்டுவதற்கு இக்கவிதை வழிவகுத்தது. பெர்சே 2.0 பேரணியின் வெற்றிக்கு ஓர் இலக்கியப் படைப்பு துணை புரிந்ததை மறுப்பதற்கில்லை.

ஏ.சமாட் சையிட் அவர்கள் இயற்றிய மலாய்மொழி கவிதையின் மொழியாக்கம் :


பெர்சேவின் தீச்சுடர்


தீயின் வெங்கொடுமை நம்மை வதைக்கின்றது

விடுதலைக்கான வேட்கையை எழுப்புகின்றோம்

வெம்மைமிக்க மக்களாட்சி

நம்முடைய சுயமரியாதைக்கு ஒப்பானது நம் நோக்கம்


நீண்ட நாள் கவலையுற்றுள்ளோம் – சிதைந்துள்ளது மக்களாட்சி

வெகு நாள் இன்னலுற்றோம் – துன்புற்றுள்ளது மக்களாட்சி

ஆணவம் மிகுந்த மக்களாட்சியை வெறுக்கின்றோம்

நிறைவான கருத்துச் சுதந்திரத்தை வேண்டுகிறோம்!


இரண்டு நூற்றாண்டுகளுக்கு முன்னர் “சேம் எடம்ஸ்” குரலொழித்தது

(போஸ்டனில் தேயிலை நீலக்கடலில் வீசப்பட்டது)

மகிழ்ச்சி ஆரவாரத்தில் திளைத்திருக்க வேண்டாம்

தீச்சடர் மட்டுமே தேவைப்படுகின்றது


ஆற்றல்மிக்க தீச்சுடர் இப்போது எரிகின்றது

தீச்சுடர் வெளிச்சம் எங்கும் பரவுகின்றது


படைப்பிலக்கியத்தின் பயன்பாட்டினை மக்கள் அறிந்து கொள்வதற்கான வாய்ப்பு ஏற்பட்டுள்ளது. இதுமட்டுமின்றி, படைப்பாளர்கள் பலர் பெர்சே 2.0 போராட்டம் தொடர்பான இலக்கியப் படைப்புகளை எழுதியுள்ளனர். அப்படைப்புகள் யாவும் இப்போராட்டத்திற்கான வெற்றிக்கு உறுதுணையாக அமைந்துள்ளன.

மலேசியாஇன்று -சீ.அருண்