அமைச்சர்: பெர்சே 2.0 பேரணி மீதான இணையத்தளப் போரில் தோற்றோம்

உயர்க்கல்வி அமைச்சர் முகம்மட் காலிட் நோர்டின், இணையத்தளத்தில் பெர்சே 2.0இன் பரப்புரைகளை முறியடிக்க அரசாங்கத்தாலும் தம் அமைச்சினாலும் முடியவில்லை என்பதை ஒப்புக்கொண்டிருக்கிறார்.

“அங்கு நாங்கள் பலவீனமாக இருப்பதை மறுக்க இயலாது”, என்றாரவர்.

“நடைமுறை உலகில் தேர்தல் அறிவிக்கப்பட்டதும்தான் பரப்புரைகள் தொடங்கும். ஆனால், மின்வெளியில் ஒவ்வொரு நாளிலும் பரப்புரை செய்யப்படுகிறது”, என்று காலிட் கூறினார்.

பெர்சே 2.0 பேரணி பற்றி மாணவர்களுக்குச் சரியான தகவல்கள் சென்றடையாதது பற்றிக் கேட்கப்பட்டபோது காலிட் இவ்வாறு கூறினார்.

இன்று கோலாலம்பூரில், சித்யாவங்சா மெட்ரோ போலிடெக்னிக்கைத் தொடக்கி வைத்த பின்னர் செய்தியாளர்களிடம் பேசிய அமைச்சர், சில தரப்புகள் இணையத்தை நாடுவதை வழக்கமாகக் கொண்டிருப்பதால் அரசாங்கத்தின் முயற்சிகளுக்கு அவர்களின் ஆதரவு குறைந்து போகிறது என்றார்.

“அரசாங்கம் எவ்வளவோ நன்மைகளைச் செய்துள்ளது.ஆனால்,அவை பற்றிய செய்திகள் மக்களைச் சென்றடைவதில்லை. மின்வெளியில் வலுவாக பிரதிநிதிக்கப்படவில்லை என்பது இதற்கு ஒரு காரணமாக இருக்கலாம். மக்கள் ஊடகங்களைவிட மின்வெளியிலிருந்து தகவல் பெறுவதில்தான் நாட்டம் காட்டுகிறார்கள்”, என்றாரவர். .

பெர்சே, பேரணிக்கு முன்னதாக அது பற்றிய செய்திகளை இணையத்தில் பரப்புவதில் மிகுந்த தீவிரம் காட்டியது.

ஜூலை9-இல், இங்கு நடந்ததைப் போன்ற பேரணிகள் அமெரிக்கா, எகிப்து ஆகியவற்றிலும் இன்னும் பல நாடுகளிலும் அங்கு பயிலும் மாணவர்களால் நடத்தப்பட்டன.

கோலாலம்பூர் பேரணியில் கலந்துகொண்ட 21 மாணவர்களைப் போலீசார் கைது செய்திருப்பதாக பெர்னாமா ஜூலை 19-இல் அறிவித்திருந்தது.அவர்கள் நிலை பற்றி அவர்கள் கல்வி பயிலும் கல்விக்கழகங்களே முடிவு செய்யும்.

மாணவர்களுக்கு விதிக்கப்படும் தண்டனை பற்றித் தமக்கு இன்னும் தெரிவிக்கப்படவில்லை என்றும் காலிட் கூறினார்.

மலேசியாஇன்று