இசா சட்டத்தைப் பயன்படுத்த அரசாங்கம் “வெட்கப்பட்டிருக்க” வேண்டும்

பிஎஸ்எம் என்ற மலேசிய சோஷலிசக் கட்சியின் ஆறு தலைவர்கள் அவசர காலச் சட்டத்தின் கீழ் தடுத்து வைக்கப்பட்டுள்ளது, கொடுமையான இசா என்ற உள்நாட்டுப் பாதுகாப்புச் சட்டத்தைப் பயன்படுத்துவதற்கு அரசாங்கம் வெட்கப்பட்டிருக்க வேண்டும் என்பதைக் காட்டுவதாக வழக்குரைஞர் மன்றம் கூறுகிறது.

இன்னொரு “விசாரணை இல்லாத தடுப்புக் காவல்” அவசர காலச் சட்டத்தைப் பயன்படுத்தியதின் மூலம் அரசாங்கம் அதற்கான பழியை ஆளும் பிஎன்னிடமிருந்து போலீஸுக்கு மாற்றி விட்டதாகத் தெரிகிறது என வழக்குரைஞர் மன்ற உதவித் தலைவர் கிறிஸ்டபர் லியோங் கூறினார்.

அவர் “அவசர காலச் சட்டம்: இசாவின் இன்னொரு வடிவம், அரசாங்கத்தின் அரசியல் ஆயுதம்” என்னும் தலைப்பில் நேற்றிரவு நடைபெற்ற கலந்துரையாடலில் பேசினார்.

இரண்டு சட்டங்களும் ஒரே மாதிரியானவை. அந்த அறுவர் மீதும் இசா பயன்படுத்தப்பட்டிருந்தால் அது பிஎன் அரசாங்கத்துக்கு பாதகமான தோற்றத்தை அளித்திருக்கும். அத்துடன் இசா சட்டத்தைத் திருத்திக் கொண்டிருப்பதாகவும் அரசாங்கம் கூறியுள்ளது.

“ஆகவே திருத்தப்படவிருக்கும் ஒன்றை அரசாங்கம் பயன்படுத்தினால் அது மேலும் கண்டனத்துக்கு இலக்காகும். அவசர காலச் சட்டத்தைப் பயன்படுத்துவதின் மூலம் அதற்கான உத்தரவை போலீஸ் பிறப்பித்தது. அரசாங்கம் அல்ல என்று போலீஸ் மீது பழியைப் போட்டு விடலாம்.”

“இசாவைப் பொறுத்த வரையில் ஒருவரை கைது செய்வதற்கான ஆணை அரசாங்கத்திடமிருந்து குறிப்பாக உள்துறை அமைச்சரிடமிருந்து வர வேண்டும். ஆனால் அவசரகால சட்டத்தின் கீழ் ஆணை போலீஸிடமிருந்து வருகிறது. அதன் காரணமாகவே அந்த அறுவரையும் தடுத்து வைக்க அவசர காலச் சட்டம் பயன்படுத்தப்பட்டதாக நான் எண்ணுகிறேன்,” என்றார் அவர்.

அரசியல்வாதிகளைத் தடுத்து வைப்பதற்கு அவசர காலச் சட்டம் பயன்படுத்தப்பட்டுள்ளது புதிய விஷயமாகும். கிரிமினல் குற்றவாளிகள் எனக் கருதப்படுகின்றவர்கள் மீது அது பெரும்பாலும் பயன்படுத்தப்பட்டது. அதன் கீழ் கைது செய்யப்படுகின்றவர்கள் ஜோகூர் சிமாங் ரெங்காமில் அல்லது வேறு இடங்களில் தடுத்த வைக்கப்படுவர்.

சுங்கை சிப்புட் எம்பி டாக்டர் ஜெயகுமார் தேவராஜ், எ லட்சுமணன், எம் சுகுமாரன், சரஸ்வதி முத்து , சூ சோன் காய், சரத் பாபு ஆகிய பிஎஸ்எம் கட்சியைச் சார்ந்த அறுவரும் ஜுன் 24ம் தேதி முதல் தடுத்து வைக்கப்பட்டுள்ளனர்.

அவர்களுக்கு ஆதரவாக நடத்தப்பட்ட அந்த கலந்துரையாடலில் பல்வேறு இனங்களையும் சேர்ந்த 200க்கும் அதிகமான மக்கள் கலந்து கொண்டனர். அதற்கு முன்னர் நடத்தப்பட்ட மெழுகுவர்த்தி விழிப்பு நிலையில் அவர்கள் பங்கு கொண்டனர். அந்த நிகவை 50க்கும் மேற்பட்ட போலீசார் கண்காணித்தனர்.

அந்த பிஎஸ்எம் அறுவரின் வழக்குரைஞருமான எட்மண்ட் போன் என்பவரும் அந்த நிகழ்வில் உரையாற்றினார்.

ஈராயிரத்தாவது ஆண்டு தொடக்கம் 2009ம் ஆண்டு வரை அவசர காலச் சட்டத்தின் கீழ் 3,701 பேர் தடுத்து வைக்கப்பட்டுள்ளதாக அவர் தெரிவித்தார்.

போலீஸ் ஒருவரை விசாரணைக்காக தடுத்து வைப்பதற்குப் போலீஸ் இன்ஸ்பெக்டர் ஒருவருடைய கையெழுத்து போதும். அவசர காலச் சட்டத்தைப் பயன்படுத்த ஏஎஸ்பி ஒருவர் கையெழுத்திட வேண்டும்..

ஆகவே அந்த ஆணை வெளியிடப்படுவது வெளிப்படையாக இருப்பதைக் கண்காணிப்பதற்கு எதுவும் இல்லை என்றார் அவர்.

“ஆகவே விசாரணை இல்லாமல் ஒருவரைத் தடுத்து வைக்கும் அத்தகைய சட்டத்தை மக்கள் எதிர்க்க வேண்டும்,” என போன் குறிப்பிட்டார். அவர் அரசியலமைப்பு, மனித உரிமைகளுக்கான மலேசிய மையத்தின் பிரச்சார உறுப்பினரும் ஆவார்.

மலேசியாஇன்று