சிந்தாதிரிப்பேட்டையில் கடத்தல்: கூவத்தில் வீசி குழந்தை கொலையா? கடலில் பிணத்தை தேடுகிறார்கள்

சென்னை சிந்தாதிரிப் பேட்டை நாவலர் நெடுஞ்செழியன் நகரைச் சேர்ந்தவர் முகமது ரபி. தள்ளுவண்டியில் பகோடா வியாபாரம் செய்து வருகிறார். இவரது 10 மாத குழந்தை ஆரிப் பாட்ஷா.கடந்த வாரம் கணவனும் மனைவியும் பகோடா வியாபாரத்துக்கு சென்று விட்டனர். குழந்தையை பாட்டி சாயிராபானு வீட்டில் தூங்க வைத்து விட்டு வெளியே சென்றார்.

சிறிது நேரத்தில் வந்து பார்த்தபோது குழந்தை ஆரிப் பாட்ஷாவை காண வில்லை. குழந்தையை கண்டுபிடிக்க தனிப்படை அமைக்கப்பட்டது. பல்வேறு இடங்களில் தேடியும் குழந்தையை கண்டு பிடிக்க முடியவில்லை.

இந்த நிலையில் கடந்த வெள்ளிக்கிழமை காலை நேப்பியர் பாலம் அருகே கூவத்தில் ஒரு குழந்தை பிணம் மிதந்ததை புறநகர் போலீசார் 2 பேர் பார்த்து உள்ளனர். நீலமேகம், ஸ்ரீதர் என்ற அந்த 2 போலீஸ்காரர்கள் மெரீனா கடற்கரையில் போலீஸ் நாயை “வாக்கிங்” செல்ல அழைத்து வந்தனர். நேப்பியர் பாலம் அருகே காரை நிறுத்தி விட்டு நடந்து வந்தபோது கூவத்தில் சில பொருட்கள் மிதந்து வந்ததை கண்டனர். அந்த பொருட்களுடன் ஒரு குழந்தை பிணம் மிதந்து வந்ததை கண்டு அதிர்ச்சி அடைந்தனர்.

நீல நிற உடை அணிந்து இருந்த அந்த குழந்தையின் பிணத்தை பார்த்ததும் அருகில் உள்ள மத்திய தொழிற்சாலை பாதுகாப்புப்படை வீரர்களுக்கு தகவல் தெரிவித்தனர்.மேலும் தீயணைப்பு நிலையத்துக்கும் தகவல் கொடுத்தனர். அவர்கள் வந்து பார்த்த போது அந்த இடத்தில் குழந்தை இல்லை. கூவத்தில் அடித்துச் செல்லப்பட்ட குழந்தை மெரீனா கடலில் கலந்து இருக்கலாம் என கருதப்படுகிறது.

எனவே கூவத்தில் மிதந்த குழந்தை ஆரிப் பாட்ஷாவாக இருக்கலாம் என சந்தேகம் எழுந்தது. இருந்தாலும் குழந்தை பிணம் கிடைத்தால்தான் இதனை உறுதி செய்ய முடியும் என போலீசார் தெரிவித்தனர்.கடலோர காவல் படை உதவியுடன் கடலில் பிணத்தை தேடுகிறார்கள்.

இதற்கிடையே தமிழ்நாட்டில் மாதம் 100 குழந்தைகள் மாயமாகி வருவதாக போலீஸ் நிலைய புள்ளி விவரங்கள் தெரிவிக்கிறது. கடந்த ஆண்டு குழந்தை மாயமானதாக 598 வழக்குகள் பதிவாகி உள்ளது. இந்த ஆண்டு 799 வழக்குகள் பதிவாகி உள்ளது. இது கடந்த ஆண்டை விட 34 சதவீதம் அதிகம் ஆகும்.

கடந்த 2004-ம் ஆண்டு 1,882 குழந்தைகள் மாயமானதாக போலீசார் தெரிவித்தனர். 2010-ம் ஆண்டு 2,325 குழந்தைகள் மாயமாகி உள்ளன.சென்னை நகரில் கடந்த 2 மாதத்தில் 3 குழந்தைகள் கடத்தப்பட்டு உள்ளனர். மெரீனா கடற்கரையில் கடந்த மே 13-ந்தேதி தமன்னா என்ற 5 வயது குழந்தை கடத்தப்பட்டது.பின்னர் அரசு ஆஸ்பத்திரி அருகே அக்குழந்தை மீட்கப்பட்டது.

ஜூன் 28-ந்தேதி 18 மாத ஆண் குழந்தையை போரூரில் உள்ள ஆட்டோ ரிக்ஷாக்காரர் வீட்டில் இருந்து மீட்கப்பட்டது. அந்த குழந்தையை ஒரு பெண்ணிடம் இருந்து வாங்கியதாக தெரிவித்தார். சிந்தாதிரிப்பேட்டையில் குழந்தை ஆரிப் பாட்ஷா கடத்தப்பட்டது 3-வது சம்பவம் ஆகும்.

maalai malar

இதை படிக்கும் போது எனக்கு பயமா இருக்கு..கஷ்டப்பட்டு பெற்று வளர்க்கும் தாய்யின் மனம் எப்படி வேதனை அடையும்....

என் குழந்தையை கூட பத்திரமா பாத்துக்கணும்...
நன்றி ரஞ்சித்.