வரி விதிப்பு எதிரொலி: பீடி, சிகரெட் விலை திடீர் உயர்வு; பாக்கெட்டுக்கு 5 ரூபாய் கூடுதலாக விற்பனை

எலக்ட்ரானிக்ஸ் பொருட்கள் சமையல் எண்ணை, ஜவுளி, புகையிலை உள்ளிட்ட பல பொருட்களுக்கு மதிப்பு கூட்டு வரியை தமிழக அரசு உயர்த்தியது. வரி வருவாயை பெருக்கும் வகையில் இந்த நடவடிக்கை மேற்கொள்ளப்பட்டது.இதன் காரணமாக அந்த பொருட்களின் விலை உயர்ந்துள்ளது.

புகையிலை பொருட்கள் மீது 2.5 சதவீதம் வாட் வரி கூடுதலாக விதிக்கப்பட்டுள்ளது. இதனால் அதன் அதிகபட்ச விலையை புகையிலை தயாரிப்பாளர்கள் உயர்த்தவில்லை. ஆனாலும் அதன் லாபத்தை குறைத்து விலையை சிறிது உயர்த்தி உள்ளனர். இதனால் பீடி, சிகரெட், புகையிலை பயன்படுத்துபவர்கள் பாதிக்கக்கூடாது என்பதற்காக அதே விலையில் விற்க அறிவுறுத்தப்பட்டுள்ளது.

ஆனால் தமிழகம் முழுவதும் அனைத்து பீடி, சிகரெட் விலைகள் திடீரென அதிக விலைக்கு விற்கப்படுகின்றனர். சிகரெட் பாக்கெட்டிற்கு ரூ.5 வரை கூடுதலாக விற்கப்படுகிறது. வரி விதிப்பு அறிவித்த உடன் சிகரெட் விற்பனை அளவை குறைத்து விட்டனர். மொத்த விற்பனையாளர்கள் சில்லறை விற்பனையாளர்களுக்கு குறைந்த அளவில் சிகரெட் வினியோகம் செய்தனர்.

இதன் காரணமாக சில்லறை வியாபாரிகள் அவரவர் இஷ்டத்துக்கு சிகரெட் விலையை உயர்த்தி விட்டனர். ஒரு சிகரெட்டிற்கு 50 பைசா அதிகமாக நிர்ணயம் செய்தனர். பாக்கெட்டாக வாங்கும்போது ரூ.2 முதல் ரூ.5 வரை கூடுதல் விலைக்கு விற்கப்படுகிறது.

இது குறித்து சிகரெட் மொத்த வியாபாரி காரட் ஞானராஜ் கூறியதாவது:-

சிகரெட்டின் அதிகபட்ச விற்பனை விலையில் (எம்.ஆர்.பி.) எந்த மாற்றமும் இல்லை. ஏற்கனவே உள்ள விலையில்தான் விற்க வேண்டும். கோல்டு பிளாக் பில்டர், வில்ஸ் பில்டர் சிகரெட் ஒரு பாக்கெட் மொத்த விற்பனைக்கு ஏற்கனவே ரூ.36.25 பைசாவிற்கு வழங்கப்பட்டது. தற்போது ஒரு ரூபாய் கூடுதலாக ரூ.37.25 பைசாவிற்கு விற்கப்படுகிறது. அதிகபட்ச விலையாக சில்லறையில் ரூ.40-க்கு விற்கவேண்டும்.

வரி உயர்வு அறிவிக்கப்பட்டவுடன் சிகரெட்டை “ஸ்டாக்” செய்து விட்டனர். வழக்கமாக கேட்ட அளவிற்கு சிகரெட் பெட்டிகள் வழங்கப்படவில்லை. திடீரென சரக்கு நிறுத்தப்பட்டதால் சில்லறை விலையில் தாறுமாறாக சிகரெட் விற்கப்படுகிறது.

புதிய விலை உயர்வு நேற்று தினம் நிர்ணயிக்கப்பட்டுள்ளது. கூடுதல் வரி விதிப்பால் சிகரெட் விலை உயரவில்லை. மொத்த விற்பனையாளர்களின் லாபம் குறைந்துள்ளது.

இவ்வாறு அவர் கூறினார்.

சென்னை உள்பட அனைத்து நகரங்களிலும் சிகரெட் விலை பல மடங்கு உயர்த்தி விற்கப்படுகிறது. கோல்டு கிங்ஸ் முன்பு ரூ.5 விற்கப்பட்டது. தற்போது ரூ.5.50-க்கு விற்கப்படுகிறது. முழு பாக்கெட் விலை ரூ.52, ரூ.55 என்று நிர்ணயிக்கப்பட்டுள்ளது.

கோல்டு பில்டர், வில்ஸ் பில்டர் ரூ.4.50-க்கு பெட்டி கடைகளில் விற்கிறார்கள். இதேபோல பீடியின் விலையும் உயர்த்தப்பட்டுள்ளது. ஒரு கட்டு கணேஷ் பீடியின் விலை ரூ.2 கூடியுள்ளது. ஒரு பண்டல் ரூ.156 கடைகளுக்கு வழங்கப்பட்டது. தற்போது ரூ.181-க்கு விற்கப் படுகிறது. இதனால் சில்லறை கடைக்காரர்கள் பீடி விலையையும் இஷ்டத்துக்கு கூட்டி விற்கிறார்கள்.

மாலை மலர்