கெட்ட பழக்கங்களுக்கு அடிமையாகாமல் 100 ஐ தொட்ட "இளைஞர்'

positivekarthick · positivekarthick Mon Jul 18, 2011 6:49 pm

தாண்டிக்குடி:பண்ணைக்காட்டில் நூறு வயதான முதியவர், கொள்ளுபேத்தி, பேரன்களுடன் பிறந்தநாளை கொண்டாடி மகிழ்ந்தார். திண்டுக்கல் மாவட்டம் பண்ணைக்காட்டை சேர்ந்தவர் வரத ராஜூலு. இவர் 16.7.1912ல் பிறந்தவர். இவரது மனைவி பொன்னம்மாள் 65 வயதில் இறந்தார். வரதராஜூக்கு 5 சகோதரர்கள், 5 சகோதரிகள் உள்ளனர். வரதராஜூக்கு 8 ஆண், 2 பெண் குழந்தைகள் உள்ளனர். பேரன்கள் 18 , பேத்திகள் 17, கொள்ளுப்பேத்தி 19, கொள்ளுப்பேரன் 14, எள்ளுபேரன் ஒருவரும் உள்ளனர்.
இவருக்கு நூறாவது வயது நேற்று முதல் துவங்கியது. இதை உறவினர்கள் பத்திரிகை அடித்து, ஆடல், பாடல் நிகழ்ச்சியுடன் விழாவாக பண்ணைக்காட்டில் உள்ள அவரது வீட்டில் கொண்டாடினர். நூறு வயது வாழ்வதின் ரகசியம் குறித்து வரதராஜூலு கூறியதாவது: அலோபதி மருந்துக்களை உட்கொள்ளாமல் மூலிகை, சித்த மருந்துக்களை சாப்பிடுவேன். தினமும் நடைபயிற்சி செய்வேன். அனைத்து வேலைகளையும் பிறரை எதிர்பார்க்காமல், நானே செய்து வந்தேன்.
மது, சிகரெட் பழக்கம் இல்லை. பொறுமையாக கோபப்படாமல் அனைத்து பிரச்னைகளையும் கையாள்வேன். நேர்மையாகவும், கெட்ட பழக்கங்களுக்கு அடிமையாகாமல் இருந்தால், என்னை போல் நூறு வயது இனிமையாக வாழலாம். இதை இளைஞர்கள் பின்பற்ற வேண்டும், என்றார்.
தினமலர்