கூவம் மற்றும் கடல்நீரில் மின்சார உற்பத்தி திட்டம்

கூவம் நதி நீர் மற்றும் கடல் நீரை சுத்திகரித்து, குடிநீராகவும்,
மின்சாரமாகவும் தயாரிக்கும் புதிய திட்டத்தை ஜெர்மன் நிறுவனத்துடன்
இணைந்து, தமிழக அரசு கொண்டு வருவதற்கான பேச்சு நடந்து வருகிறது. சென்னைக்கு
தேவையான குடிநீரில் 10 சதவீதமும், 600 மெகாவாட் மின்சாரமும்
இத்திட்டத்தில் கிடைக்கும் என எதிர்பார்க்கப்படுகிறது. தமிழகத்தில்
கடுமையான மின்பற்றாக்குறை நிலவுகிறது. தற்போதைய நிலையில், தினமும் 2,000
மெகாவாட் மின் பற்றாக்குறையை சமாளிக்க, சென்னையில் ஒரு மணி நேரமும்,
மாவட்டங்களில் இரண்டு மணி நேரமும் மின்வெட்டு அமலாகிறது.
மின்பற்றாக்குறையை சமாளிக்க தனியாரிடம் மின்சாரம் விலைக்கு
வாங்கப்படுகிறது. எதிர்கால பற்றாக்குறையை சமாளிக்க கூடுதல் மின் உற்பத்தி
நிலையங்களை அமைக்க அரசு முடிவு செய்துள்ளது. வரும் ஐந்தாண்டுகளில்,
கூடுதலாக 10 ஆயிரம் மெகாவாட் காற்றாலை மின் நிலையங்கள் மற்றும் 3,000
மெகாவாட் சூரிய மின்சக்தி உற்பத்தி நிலையங்கள் அமைக்க, தமிழக மின் வாரியம்
முடிவு செய்துள்ளது.
இந்நிலையில், ஜெர்மனை சேர்ந்த டிரைட்டன் குளோபல் எல்.எல்.சி., என்ற
நிறுவனம், புதிய வகையில் மின் உற்பத்தி செய்ய தமிழக அரசிடம் பேச்சு நடத்தி
வருகிறது. கழிவுநீரை சுத்திகரித்து குடிநீராகவும், மின்சாரமாகவும் உற்பத்தி
செய்யும் தொழில்நுட்பத்தை முதல் முறையாக உலகிற்கு அறிமுகப்படுத்தியுள்ளது.
அமெரிக்காவில், பல்வேறு இடங்களில் மின் உற்பத்தி நிலையங்களை டிரைட்டன்
நிறுவனம் அமைத்துள்ளது.
சென்னையில், 600 மெகாவாட் மின் உற்பத்திக்கான புதிய திட்டத்தை, தமிழக
மின்வாரியத்துடன் இணைந்து செயல்படுத்த உள்ளது. தமிழக அரசின் மரபுசாரா
எரிசக்தி நிறுவனமான, தமிழ்நாடு எரிசக்தி மேம்பாட்டு முகமை (டெடா)வுடன்,
டிரைட்டன் நிறுவனம் பேச்சு நடத்தி, தமிழக மின்வாரியத்திற்கு
பரிந்துரைக்கப்பட்டுள்ளது. இத்திட்டப்படி, சென்னையில், கூவம் நதி கடலில்
கலக்கும் இடம் (மெரீனாவை ஒட்டிய பகுதி), அடையாறு கடலில் கலக்கும் பகுதி,
கூவத்தில் இறுதியாக நீர் தேங்கும் பகுதி ஆகியவற்றில் ஏதாவது ஓர் இடத்திலோ
அல்லது பல இடங்களிலோ, மின் உற்பத்தி நிலையங்கள் அமைக்கப்படும். சென்னையின்
பல பகுதிகளிலிருந்து வரும் கழிவுநீரில், பெரும் பகுதியை சேர்த்து வைத்து,
அதை சுத்திகரித்து குடிநீரும், மின்சாரமும் தயாரிக்கப்படும்.
இத்திட்டத்திற்கு, 15 ஆயிரம் சதுரஅடி இடத்தில் உற்பத்தி நிலையம்
அமைக்கப்படுகிறது. இதுதவிர, தண்ணீர் சப்ளைக்கான குழாய்கள் அமைத்தல்,
கழிவுகளை அகற்றுதல், மின்சாரம் கொண்டு செல்வதற்கான மின்தொடர் (கிரிட்)
அமைத்தல் ஆகிய பணிகள் மேற்கொள்ளப்படும். அரசின் அனுமதி மற்றும் மின்சாரம்
பெறும் ஒப்பந்தத்துடன், 600 மெகாவாட் மின் உற்பத்தி, தினமும் 7.5 கோடி
லிட்டர் சுத்திகரிக்கப்பட்ட குடிநீர் தயாரிக்கும் நிலையம் அமைக்க, 2,000
கோடி ரூபாய் மற்றும் குழாய்கள் மற்றும் மின்சார, "கிரிட்' அமைக்க 3,000
கோடி செலவாகும் என மதிப்பிடப்பட்டுள்ளது. இதற்கான முழு நிதியை, ஜெர்மன்
நிறுவனம் முதலீடு செய்ய உள்ளது.
மின்சாரத்தை, தமிழக மின்வாரியத்திற்கு குறைந்த விலைக்கு சப்ளை
செய்வதற்கான பேச்சுவார்த்தைகள் நடந்து வருகின்றன. இதில், உற்பத்தியாகும்
சுத்திகரிப்பு குடிநீரை, மருத்துவமனைகள், தொழிற்சாலைகள் உள்ளிட்ட
தனியாருக்கு விற்கப்போவதாக டிரைட்டன் நிறுவனம், அரசிடம் கூறியுள்ளது.
"இத்திட்டத்தின் தொழில்நுட்பங்கள், நடைமுறை சிக்கல்கள், சுற்றுச்சூழலை
பாதிக்காமல் இருப்பதற்கான வழிகள் ஆகியவை குறித்து, தனியார் நிறுவனத்துடன்,
எரிசக்தித்துறை அதிகாரிகள் பேச்சு நடத்தி வருகின்றனர். அரசின் நிபந்தனைகளை
தனியார் நிறுவனம் ஏற்றால், இரு தரப்பிலும் புரிந்துணர்வு ஒப்பந்தம்
கையெழுத்தாகும்' என, எரிசக்தித்துறை அதிகாரிகள் தெரிவித்தனர்.
கூவமும் சுத்தமாகும்!
எரிசக்தித்துறை அதிகாரி ஒருவர் கூறியதாவது: கூவம் அல்லது வேறு நதிகள்
மற்றும் கடல்நீரை, குழாய்மூலம் எடுத்து மின் நிலையத்தில் வைக்கப்படும்.
முதற்கட்டமாக, 5,000 பி.எஸ்.ஐ., அளவு அதிவேக காற்றை செலுத்தி, கண்ணுக்கு
தெரியாத, "மைக்ரோ' உயிரிகள் நீக்கம், ரசாயனங்கள் பிரித்தல், அணு மற்றும்
ரேடியோ கதிர்வீச்சிருந்தால் அவற்றை நீக்குதல், தொழிற்சாலைகள் மற்றும்
ஹைட்ரோ கார்பன் ரசாயனம் நீக்குதல் ஆகிய நடவடிக்கைகள் மேற்கொள்ளப்படும்.
பின், சுத்தமான தண்ணீரை மீண்டும் சுத்திகரித்து, குடிநீராகவும்,
உடல்நலத்திற்கு ஏற்ற நீராகவும் மற்றும் மருத்துவமனைகளுக்கு தேவையான
தரத்துடனும் தயாரிப்பதாக கூறியுள்ளனர்.
இதில் கிடைக்கும் கழிவுகளை எரித்து, அதில் வரும் வாயுவை அப்படியே
மின்சாரமாக மாற்ற தனியார் நிறுவனம் திட்ட நடைமுறைகளை கொடுத்துள்ளது.
இதற்கான அனைத்து பரிசோதனைகளையும் தனியார் நிறுவனம், தமிழக அரசிடம்
நிரூபிப்பதாக உறுதியளித்துள்ளது. இத்திட்டத்தால், கூவம் நீர்
உறிஞ்சப்பட்டு, தண்ணீர் அளவு குறையும். அப்போது, பொதுப்பணித்துறை மற்றும்
மாநகராட்சி மூலம் கூவத்தை எளிதாக சுத்தப்படுத்தவும் வாய்ப்புள்ளது. இவ்வாறு
அவர் கூறினார்.
தினமலர்

நல்ல முயற்சி