மரப்பெட்டிக்குள் ஒளிந்து விளையாடிய சிறுவன் சாவு

திருமங்கலம் அருகே பூட்டிய பள்ளிக்கூடத்தில் பெட்டிக்குள் ஒளிந்து விளையாடிய சிறுவன் பரிதாபமாக இறந்தான்.

மாணவன்

மதுரை மாவட்டம் திருமங்கலம் அருகே உள்ளது கிழவனேரி. இந்த ஊரைச் சேர்ந்தவர் பழனி. விவசாய கூலித்தொழிலாளி. இவரது மனைவி முத்துலட்சுமி. இவர்களுக்கு 3 மகன்கள் உள்ளனர். இவர்களில் 2-வது மகன் ஜெயசூர்யா (வயது8) ஆலம்பட்டி அருகே உள்ள தனியார் பள்ளியில் 3-ம் வகுப்பு படித்து வந்தான். தினமும் கிழவனேரியில் இருந்து ஆலம்பட்டிக்கு சென்று படித்து வந்தான்.

நேற்று முன்தினம் சனிக்கிழமை என்பதால் பள்ளிக்கு விடுமுறை. இதனால் ஜெயசூர்யா மற்ற சிறுவர்களுடன் ஊரில் விளையாட சென்று விட்டான். இரவு நேரமாகியும் வீடு திரும்பாததால் அவனை பெற்றோர் பல இடங்களில் தேடி பார்த்தனர். ஆனால் கண்டுபிடிக்க முடியவில்லை.

துர்நாற்றம்

இதுகுறித்து திருமங்கலம் தாலுகா போலீசுக்கு அவனது பெற்றோர் தகவல் தெரிவித்தனர். போலீசாரும் விசாரித்து வந்தனர்.

இந்த நிலையில் நேற்று கிழவனேரியில் உள்ள ஊராட்சி ஒன்றிய நடுநிலைப்பள்ளியில் இருந்து துர்நாற்றம் வீசியது. இதுபற்றி போலீசுக்கு தகவல் தெரிவித்தனர். போலீசார் விரைந்து சென்று பள்ளிக்கூட சாவியை வாங்கி கதவை திறந்து உள்ளே சென்றனர். அங்கே பூட்டப்படாத ஒரு பெட்டிக்குள் இருந்து துர்நாற்றம் வந்தது.

பெட்டிக்குள் பிணம்

அந்த பெட்டியை திறந்து பார்த்த போது கை, கால்கள் முடங்கிய நிலையில் சிறுவன் ஜெயசூர்யா பிணமாக கிடந்தது தெரியவந்தது. உடலில் காயம் எதுவும் காணப்படவில்லை. அவனது உடலைப்பார்த்து அவனது பெற்றோர் மற்றும் உறவினர்கள் கதறி அழுதது பரிதாபமாக இருந்தது.

சிறுவர்களுடன் விளையாடி கொண்டிருந்த போது பள்ளியில் உள்ள கம்பி இல்லாத ஜன்னல் வழியாக உள்ளே சென்று விளையாடி இருக்கிறான். அப்போது அங்கிருந்த பூட்டப்படாத இந்த பெட்டியில் ஒளிந்து இருக்கும்போது வெளிப்புற தாழ்ப்பாள் மூடி இருக்கலாம். உள்ளே சிக்கிக்கொண்ட சிறுவன் ஜெயசூர்யா உதவி கேட்டு அலறிய போதும் வெளியே சத்தம் கேட்காத நிலையில் பெட்டிக்குள்ளேயே முடங்கி பரிதாபமாக இறந்து இருக்கலாம் என்று தெரிகிறது.

இருந்தபோதிலும் திருமங்கலம் தாலுகா போலீசார் மர்ம சாவு என்று வழக்குப்பதிவு செய்து தொடர்ந்து விசாரித்து வருகிறார்கள்.