பத்மநாபசாமி கோவில் பொற்குவியலை அம்பலப்படுத்திய தமிழக வக்கீல் திடீர் மரணம்

திருவனந்தபுரம், ஜுலை.18- திருவனந்தபுரம் பத்மநாபசாமி கோவில் பொற்குவியலை அம்பலப்படுத்த காரணமாக இருந்த தமிழக வக்கீல் டி.பி.சுந்தரராஜன் திடீர் மரணம் அடைந்தார்.

ரூ.1 1/2 லட்சம் கோடி பொற்குவியல்

பிரசித்தி பெற்ற திருவனந்தபுரம் பத்மநாபசாமி கோவில் ரகசிய அறைகள், சுப்ரீம் கோர்ட்டு உத்தரவுப்படி திறந்து பார்க்கப்பட்டது. அப்போது அந்த அறைகளில் ரூ.11/2 கோடிக்கும் அதிகமான அரிய பொற்குவியல் பொக்கிஷங்கள் இருந்தது கண்டுபிடிக்கப்பட்டது.

அதைத் தொடர்ந்து, பத்மநாபசாமி கோவில் அளவில் பிரபலமாகி, பொக்கிஷங்களை பாதுகாப்பதற்காக கோவிலுக்கு பலத்த போலீஸ் பாதுகாப்பு ஏற்பாடுகள் செய்யப்பட்டு உள்ளன. 70 வயதான வக்கீல் டி.பி.சுந்தரராஜன் என்பவர்தான், இந்த விவகாரம் தொடர்பாக முதலில் வழக்கு தொடர்ந்து இருந்தார்.

திடீர் மரணம்

இந்த வழக்கில், ரகசிய அறைகளை திறந்து நகைகளை கணக்கிடுவதற்காக சுப்ரீம் கோர்ட்டு உத்தரவுப்படி நியமிக்கப்பட்ட 7 பேர் குழுவிலும் அவர் இடம் பெற்று இருந்தார். பொற்குவியல் அம்பலமானபின், டி.பி.சுந்தரராஜனுக்கு சிவசேனா உள்ளிட்ட அமைப்பினர் கடும் எதிர்ப்பு தெரிவித்திருந்தனர்.

குழுவினருடன் ரகசிய அறையில் கணக்கெடுப்பு பணியில் ஈடுபட்டு இருந்தபோது அவருடைய உடல் நிலை சற்று பாதிக்கப்பட்டு இருந்தது. இந்த நிலையில், டி.பி.சுந்தரராஜனுக்கு 3 நாட்களுக்கு முன்பு காய்ச்சல் ஏற்பட்டது, திருவனந்தபுரம் கோட்டை மேற்கு வாசல் பகுதியில் உள்ள வீட்டில் சிகிச்சை பெற்று வந்தார். நேற்று முன்தினம் நள்ளிரவில், திடீர் மாரடைப்பால் அவர் மரணம் அடைந்தார்.

உடல் தகனம்

நேற்று காலையில் அவருடைய உடல் தகனம் புத்தன்கோட்டை பகுதியில் உள்ள பிராமணர் சங்கம் வகை மயானத்தில் நடைபெற்றது. அவருடைய அண்ணன் டி.பி.கிருஷ்ணனின் மகன் அனந்தபத்மநாபன் சிதைக்கு தீ மூட்டினார்.

ஐ.பி.எஸ். அதிகாரி

திருமணமாகாத ஐ.பி.எஸ். அதிகாரியான சுந்தரராஜன், மத்திய புலனாய்வு பிரிவில் (ஐ.பி.) நீண்ட காலம் பணிபுரிந்தார். மறைந்த முன்னாள் பிரதமர் இந்திராகாந்தியின் பாதுகாப்புப்படை அதிகாரியாகவும் அவர் பணிபுரிந்து இருக்கிறார்.

பின்னர், அவரது தந்தையும், திருவனந்தபுரம் சாலை அரசு தமிழ் உயர்நிலைப்பள்ளியில் தலைமை ஆசிரியராக பணியாற்றியவருமான டி.கே.பத்மநாப அய்யங்காருக்கு வயோதிக காலத்தில் கண் தெரியாமல் போய்விட்டது. இவர் திருவிதாங்கூர் மன்னர் சமஸ்தானத்தில் சட்ட ஆலோசகராகவும் பணிபுரிந்தவர்.

தமிழகத்தை சேர்ந்தவர்

அவர் தினசரி பத்மநாபசாமி கோவிலுக்கு தரிசனத்துக்கு செல்வது வழக்கம். அவரை பராமரிப்பதற்காக சுந்தரராஜன் வேலையை ராஜினாமா செய்துவிட்டு திருவனந்தபுரத்துக்கு வந்து கோவிலுக்கு அருகே உள்ள வீட்டில் தங்கினார்.

சுந்தரராஜனின் பூர்வீகம், தமிழ்நாட்டில் திருநெல்வேலி மாவட்டத்தில் உள்ள அம்பாசமுத்திரம் ஆகும். திருவனந்தபுரத்துக்கு வந்தபின், அவர் சட்டம் பயின்று, சுப்ரீம் கோர்ட்டு வக்கீலாக பணிபுரிந்தார். திருவனந்தபுரத்தில் உள்ள சட்டக்கல்லூரியிலும், `சட்ட அகாடமி' யிலும் கவுரவ பேராசிரியராகவும் அவர் பணிபுரிந்து இருக்கிறார்.

தினதந்தி