பாகிஸ்தானில் இருந்து காஷ்மீருக்குள் ஊடுருவ தயாராக 400 தீவிரவாதிகள்

பாகிஸ்தானில் இருந்து இந்தியாவுக்குள் ஊடுருவ 400 தீவிரவாதிகள் தயாராக இருப்பதாக, ராணுவ உயர் அதிகாரி கூறினார்.

காஷ்மீர் மாநிலம் ஜம்மு அருகே நக்ரோதா என்ற இடத்தில் மரம் நடும் திட்டத்தை, இந்திய ராணுவத்தின் 16-வது படைப்பிரிவின் லெப்டினட் ஜெனரல் ஜே.பி. நெஹ்ரா தொடங்கி வைத்தார். அப்போது அவர் நிருபர்களிடம் கூறியதாவது:-

400 தீவிரவாதிகள்

மும்பை தாக்குதல் சம்பவத்தை தொடர்ந்து இந்தியா-பாகிஸ்தான் எல்லையை தீவிரமாக கண்காணித்து வருகிறோம். இரு நாடுகளுக்கும் இடையே உள்ள எல்லை கட்டுப்பாடு கோடு பகுதியை உன்னிப்பாக காவல் காத்து வருகிறோம்.

இந்திய உளவுத்துறையின் தகவல் படி, பாகிஸ்தான் நாட்டுக்குள், எல்லைக்கட்டுப்பாடு கோடு பகுதியில், பயிற்சி பெற்ற 400 முதல் 450 தீவிரவாதிகள் தயாராக இருக்கிறார்கள். அவர்கள், இந்திய பகுதிக்குள் ஊடுருவ தகுந்த சமயத்தை எதிர்பார்க்கிறார்கள்.

முறியடித்து விட்டோம்

இரவு நேரத்திலும், பனிப்பொழிவு அதிகமாக இருக்கும் காலத்திலும், பாகிஸ்தான் பகுதியில் இருந்து இந்திய பகுதிக்குள் தீவிரவாதிகள் ஊடுருவ முயற்சி செய்வார்கள். எனவே இதுபோன்ற நேரத்தில் இந்திய ராணுவ வீரர்கள் மிகவும் கவனமாக செயல்படுகிறார்கள்.

கடந்த ஜனவரி மாதத்தில் இருந்து இதுவரை எந்த ஊடுருவலும் நடைபெற வில்லை. சில ஊடுருவல் சம்பவங்களை தடுத்து நிறுத்தி இருக்கிறோம். அதுபோன்ற சம்பவங்களில் தீவிரவாதிகள் தங்கள் முயற்சி பலிக்காததால், பின்னோக்கி சென்று விட்டனர்.

42 முகாம்கள்

பாகிஸ்தான் எல்லை பகுதியில், 42 தீவிரவாத முகாம்கள் செயல்பட்டு வருகின்றன. இந்த முகாம்களை, லக்ஷர்-இ-தொய்பா, ஹிஸ்புல்லா போன்ற தீவிரவாத இயக்கங்கள் நடத்தி வருகின்றன.

தீவிரவாதிகள் தற்போது மொபைல் போன்களை பயன்படுத்துவதை தவிர்த்து விட்டனர். மொபைல் போன் பேச்சை நாங்கள் இடை மறித்து கேட்கிறோம் என்பதால், செல்போன்கள் மூலம் தீவிரவாதிகள் தகவல்களை பரிமாறிக்கொள்வது இல்லை. இதற்கு பதிலாக பேஸ்புக், இண்டர்நெட் போன்ற நவீன வசதிகளை பயன்படுத்திக்கொள்கிறார்கள்.

அமர்நாத் யாத்திரைக்கு செல்வோருக்கு தேவையான பாதுகாப்பையும் நாங்கள் அளித்து வருகிறோம்.

இவ்வாறு ராணுவ உயர் அதிகாரி கூறினார்.

தினதந்தி

எந்திரிக்கவே முடியலையாம் ! இவங்களுக்கு ரெண்டு பொண்டாட்டி கேட்குதாம்