சொந்த கிரவுண்டில் ‘கலக்கிய” அழகிரியை, ‘கலாய்க்கிறார்கள்!’

தாமு · தாமு Thu Jul 14, 2011 11:07 am

மதுரை, இந்தியா: மதுரையின் முடிசூடா மன்னராகச் செயற்பட்டுவந்த அழகிரி செய்த முறைகேடுகளுக்கு துணை போன மேயர், ராஜினாமா செய்ய வேண்டும் என்று மதுரை மாநகராட்சியில் நேற்று (திங்கட்கிழமை) வலியுறுத்தப்பட்டுள்ளது. மதுரை மாநகராட்சி சிறப்பு கூட்டம் மேயர் தேன்மொழி தலைமையில் நேற்று நடைபெற்ற போதே, இந்தக் கோரிக்கையை அ.தி.மு.க. உறுப்பினர்கள் வலியுறுத்தினர்.

தமிழகத்தின் ஆளும் கட்சியான அ.தி.மு.க.வின் வலியுறுத்தலுக்கு, தமிழக பிரதான எதிர்க்கட்சியான தே.மு.தி.க.வினரும் மதுரையில் ஆதரவு தெரிவித்தது, இதிலுள்ள மற்றைய ஹைலைட்!

தேன்மொழி ராஜினாமா செய்ய வேண்டும் என்று கோரி, மாமன்ற கூட்டத்தில் இருந்து அ.தி.மு.க. வெளிநடப்பு செய்தது. அவர்களுடன், தே.மு.தி.க.வினர், கம்யூனிஸ்ட் கட்சியினர், ஆகியோரும் வெளிநடப்பு செய்தனர்.

“அழகிரியின் கைப்பொம்மையாகச் செயற்படுபவர்” என்று மதுரை மேயர் தேன்மொழிமீது, அ.தி.மு.க.வினர் குற்றம் சாட்டுகின்றனர். இது உண்மைதான் என்பதுதை, அவர்களது நடவடிக்கைகளில் இருந்து மதுரை மக்களும் புரிந்து வைத்துள்ளனர்.

கடந்த ஆட்சியில் மதுரை மாநகராட்சிக்கு உட்பட்ட பகுதிகளில், இந்த ‘இருவர்’ கூட்டணியை மீறி ஒரு பெட்டிக்கடைகூட வைக்க முடியாது என்ற நிலையே இருந்து வந்தது. மாநகராட்சி ஏரியாவில் கடைகள், காம்பிளக்ஸ்கள் கட்டப்படுவதை இவர்கள் இருவருமே முழுமையாகத் தமது கட்டுப்பாட்டில் வைத்திருந்தனர்.

மதுரை ஏரியாவில் உள்ள புதிய கட்டடங்களில் பெரும்பாலானவை, தி.மு.க. வி.ஐ.பி.க்களுக்குச் சொந்தமானவை. அல்லது அவர்களின் பினாமிகளின் பெயர்களில் பதிவு செய்யப்பட்டவை என்பதில் மதுரைக்குள் எந்த ஒழிவு மறைவும் கிடையாது!

தற்போது ஆட்சி காலி. அஞ்சா நெஞ்சரும் அடக்கி வாசிக்கிறார். அப்படியிருக்கையில் அவரது ‘பாக்கெட்டில்’ இருந்த மேயர் மாத்திரம் முன்புபோல மதுரை மாநகராட்சியில் ஜமாய்க்க முடியுமா? எதிர்ப்புக் கிளம்பிவிட்டது.

மதுரையின் ‘மகிழ்ச்சிப் பொழுதுகளில்’ அண்ணன்!
நேற்று நடைபெற்ற மதுரை மாநகராட்சி சிறப்பு கூட்டத்தில், மேயர் தேன்மொழியின் முன்னிலையிலேயே, அவருக்கு எதிரான குற்றச்சாட்டுகள் ஒவ்வொன்றாகப் பட்டியலிடப்பட்டன.

• மதுரை மாட்டுத்தாவணி பஸ்நிலையம் எதிரே மத்திய அமைச்சர் மு.க.அழகிரியின் மகன் பெயரில் ஒரு கட்டிடம் கட்டப்பட்டுள்ளது. சுடுகாடு அருகில் கட்டிடம் கட்டக்கூடாது என்று விதி முறை உள்ளது. விதிமுறையை மீறி கட்டப்பட்ட இந்த கட்டிடத்தை இடிக்க வேண்டும்.

• மதுரை மாநகராட்சி பகுதியில் எங்கு பார்த்தாலும் மீன்கடைகளாக காட்சியளிக்கிறது. தி.மு.க. பிரமுகர்களே இந்த கடைகள் அனைத்தையும் தமது பினாமிகளின் பெயர்களில் பெற்றுள்ளனர்.

• புதிய சென்ட்ரல் மார்க்கெட்டில் 36 கடைகளை தி.மு.க.வில் இருந்த செல்லத்துரை என்பவர் பெற்றுள்ளார்.

• துணை மேயர், தனது மனைவி பெயரில் ஒரு காம்பிளக்ஸ் கட்டி வருகிறார். இது மாநகராட்சி விதிகளை மீறி கட்டப்பட்டுள்ளது.

• மாநகராட்சி முலம் ஏலம் விடப்பட்ட ரிங்ரோடு வசூல், எக்கோ பார்க் கட்டண வசூல், ஆகியவை முறைகேடாக தி.மு.க. வி.ஐ.பி.களுக்கே கொடுக்கப்பட்டன.

• சென்ட்ரல் மார்க்கெட் டெண்டர் விட்டது, ராஜாக்கூரில் வீடுகள் கட்டிய கன்ட்ராக்ட் ஆகியவை, அழகிரியால் கைகாட்டப்பட்ட ஆட்களுக்கே வழங்கப்பட்டன.

இந்தக் குற்றச்சாட்டுகளை மதுரை மாநகராட்சியில் முன்வைத்து, இதற்கு விசாரணை கமிஷன் அமைக்க வேண்டும் என்று கோரிக்கை விட்டுள்ளனர், மதுரை அ.தி.மு.க.வினரும், அவர்களுடன் தே.மு.தி.க.வினர், கம்யூனிஸ்ட் கட்சியினரும்.

கடந்த ஆட்சியில் அவையெல்லாம் ஊரறிய நடந்த விஷயங்கள்தான்! முறையாக விசாரிக்கத் தொடங்கினால், மேயரும் சிக்கலில் மாட்டிக் கொள்வார்! சொந்த கிரவுண்டிலேயே அழகிரி ‘கிளீன் போல்ட்’ என்பதே நிலை!

-மதுரையிலிருந்து இரா.பிரபாகரின் குறிப்புகளுடன், ரிஷி